ވެލިދޫ ޖޫނިއަރ ކޮލެޖުގެ ޢަމަލީ މަސައްކަތް ފަށަން ތައްޔާރުވެއްޖެ

ނ.ވެލިދޫގައި ސަރުކާރުން ތަރައްޤީކުރުމަށް ހަމަޖެހިފައިވާ ޖޫނިއަރ ކޮލެޖުގެ ޢަމަލީ މަސައްކަތް ފެށުމަށް ތައްޔާރުވެއްޖެއެވެ.

މި މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާއި ހަވާލުކުރައްވާފައިވަނީ މިމަހުގެ 10ވަނަ ދުވަހުއެވެ.

މިޖޫނިއަރ ކޮލެޖު ޢިމާރާތް ކުރުމަށް ހަމަޖެހިފައިވަނީ 10225.7 އަކަފޫޓްގެ ބިމެއްގައެވެ. މި އިންސްޓިޓިއުޓަކީ ސިންގަލް ސްޓޯރީ (އެއް ބުރިއަށް) ވާ ގޮތަށް އަޅާ އިމާރާތެކެވެ.

މިމަސައްކަތަށް ބޭނުންވާ ބިން ކޮންޓްރެކްޓަރާއި ހަވާލުކޮށްފައިވަނީ އިއްޔެއެވެ. ނ.ވެލިދޫ ކައުންސިލް ހިމެނޭހެން، ބިން ހަވާލުކުރުމުގެ ބައްދަލުވުން ބާއްވާފައިވަނީ މިނިސްޓްރީ އޮފް ހަޔަރ އެޑިއުކޭޝަންގައެވެ.

The official project site handover meeting for N. Velidhoo Junior College was conducted earlier today with the contractor MTCC. This marks a new step forward in amplifying higher education opportunities in the outer islands of Maldives. #NVelidhooJC #SiteHandover #TVETEducation pic.twitter.com/t3mQBiiTo1

— Ministry of Higher Education (@MoHEmv) August 20, 2023

މި ޖޫނިއަރ ކޮލެޖް ނިމޭއިރު ކިޔަވައިދިނުމަށް ބޭނުންކުރާ ސްމާޓް ކްލާސްރޫމްގެ އިތުރުން އައި.ސީ.ޓީ ލެބޯޓަރީއަކާއި އިދާރީ ޚިދުމަތްތަކަށް ޚާއްޞަ އޭރިއާއަކާއި ލައިބްރަރީ ވެސް ހުންނާނެއެވެ. އަދި މިއިންސްޓިޓިއުޓުގައި ތަފާތު އެކި ދާއިރާތަކުން ވޮކޭޝަނަލް ޕްރޮގްރާމްތައް ހިންގުމަށް މަލްޓިޕާޕަސް ވޯކްޝޮޕްތައްވެސް ތަރައްޤީ ކުރެވޭނެއެވެ.

ޖޫނިއަރ ކޮލެޖްގެ މަސައްކަތުގެ އެއްބަސްވުމުގައި މިމަހު 10 ވަނަ ދުވަހު ސޮއިކޮށްފައިވާއިރު، ޢަމަލީ މަސައްކަތަށް ބޭނުންވާ ސާމާނު ރަށަށް ގެންދިއުމުގެ މަސައްކަތް އެމްޓީސީސީން ވަނީ ފަށާފައެވެ. ވެލިދޫ ޖޫނިއަރ ކޮލެޖުގެ ޕްރޮޖެކްޓް އެމް.ޓީ.ސީ.ސީ އާ ހަވާލުކޮށްފައިވަނީ 9 މަސް ދުވަހުގެ ތެރޭގައި ނިންމާގޮތަށެވެ.

ހަޔަރ އެޑިއުކޭޝަން މިނިސްޓްރީން ވިދާޅުވީ، މަސައްކަތް ހަވާލުކޮށް އަހަރެއްހާދުވަހުގެ ތެރޭގައި ކޮލެޖުގައި ކިޔަވައިދޭން ފެށުމަކީ މިނިސްޓްރީގެ ޢަމާޒެއްކަމަށެވެ.

މި 11.91 މިލިއަން ރުފިޔާ ޚަރަދުކުރައްވައިގެން ކުރިއަށްގެންދަވާ މަސައްކަތެކެވެ.

ދިވެހި ޒުވާނުންނަށް މަސައްކަތާއި ހުނަރުގެ ތަޢުލީމާއި ތަމްރީނުގެ ފުރުޞަތުތައް ފަހިކުރުމަކީ ސަރުކާރުން ވަރަށް އިސްކަމެއްދެއްވައިގެން ކުރައްވަމުން އަންނަ މަސައްކަތެކެވެ. އެގޮތުން ޓިވެޓް ސެންޓަރުތަކާއި، ޖޫނިއަރ ކޮލެޖްތަކުގެ މަސައްކަތް ރާއްޖޭގެ އެކި ސަރަޙައްދުގައި އަންނަނީ ކުރިއަށްގެންދަމުންނެވެ.

ނ،ވެލިދޫގެ އިތުރުން ހއ.ދިއްދޫގައި ޖޫނިއަރ ކޮލެޖެއް ތަރައްޤީކުރުމުގެ މަޝްރޫއާއި ރ.އަލިފުށީގައި ޓިވެޓް ސެންޓަރެއް އިމާރާތް ކުރުމުގެ މަސައްކަތުގެ ބޮޑުބައެއް މިހާރުވަނީ ނިމިފައެވެ.

އަތޮޅުތަކުގައި މަތީތަޢުލީމާއި ތަމްރީނުގެ ފުރުޞަތުތައް ފަހިކުރުމަށާއި ޚާއްސަކޮށް މަސައްކަތުގެ ތަޢުލީމާއި ތަމްރީން މިހާރަށްވުރެބޮޑަށް ފުޅާކުރެއްވުމަށް ތަފާތު ގިނަ މަސައްކަތްތަކެއް މިސަރުކާރުން ގެންދަވަނީ ކުރައްވަމުންނެވެ.