ޗައިނާގެ އިތުރު އެއަރލައިނަކުން އަންނަމަހު ރާއްޖެއަށް ދަތުރު ފަށަނީ

ޗައިނާގެ ސިޗުއާން އެއަރލައިންގެ ދަތުރުތައް ރާއްޖެއަށް ފެށުމަށް ތައްޔާރުވެއްޖެއެވެ. މި އެއަރލައިންގެ ދަތުރުތައް ރާއްޖެއަށް ފެށުމާއެކު ޗައިނާއިން ރާއްޖެއަށް ދަތުރުތައް ބާއްވާ އެއަރލައިންތަކުގެ ޢަދަދު 3 އަކަށް އިތުރުވެގެންދާނެއެވެ.

ކޯވިޑް-19 އާއި ގުޅިގެން 3 އަހަރެއްހާ ދުވަސް ވަންދެން ޗައިނާއިން ރާއްޖެއަށް އެއްވެސް ފަތުރުވެރިންނެއް އައިސްފައެެއް ނުވެއެވެ. ނަމަވެސް މި އަހަރުގެ ޖަނަވަރީ 18 ވަނަ ދުވަހު އަލުން ވަނީ އެ ޤައުމުން ރާއްޖެއަށް ދަތުރުތައް ފަށާފައެވެ.

ޗައިނާއިން ރާއްޖެއަށް އަންނަ ފަތުރުވެރިންގެ ޢަދަދަށް ކުރިއެރުން ލިބެން ފަށާފައިވާއިރު، އެ ޤައުމުގެ ސިޗުއާން އެއަރލައިންގެ ދަތުރުތައް ރާއްޖެއަށް ފެށުމަށް މިވަނީ ނިންމާފައެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލްއިން ބުނީ، ސިޗުއާން އެއަރލައިންގެ ދަތުރުތައް ރާއްޖެއަށް އަންނަ މަހުގެ 1 ވަނަ ދުވަހުން ފެށިގެން ފަށާނެކަމަށެވެ. މި އެއަރލައިނުން ރާއްޖެއަށް ކުރާނީ ހަފްތާއަކު 3 ދަތުރެވެ.

ޗައިނާއިން މިހާރު ރާއްޖެއަށް ދަތުރުކުރަނީ ޗައިނާ ބެއިޖިންގ ކެޕިޓަލް އެއަރލައިނާއި އަދި ޗައިނާ އީސްޓަން އެއަރލައިނުންނެވެ.

ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ޗައިނާ މިވަގުތު ހިމެނެނީ ރާއްޖެއަށް 4 ވަނައަށް އެންމެ ގިނައިން ފަތުރުވެރިން އަންނަ ޤައުމުގެ ގޮތުގައެވެ. އެގޮތުން މިމަހުގެ 15 ވަނަ ދުވަހުގެ ނިޔަލަށް ޗައިނާއިން ރާއްޖެއަށް 77202 ފަތުރުވެރިން ވަނީ ޒިޔާރަތްކޮށްފައެވެ.