ރާއްޖޭގެ ފުރަތަމަ ފަރޓިލިޓީ ސެންޓަރު، ޓްރީ ޓޮޕް ހޮސްޕިޓަލުގައި ހުޅުވައިފިއެވެ.
ޓްރީ ޓޮޕް ހޮސްޕިޓަލުގައި ބޭއްވި ރަސްމިއްޔާތެއްގައި މި ޚިދުމަތް އިފްތިތާޙްކޮށްދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދާއި، ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވަނީ ބައިވެރިވެވަޑައިގެންފައެވެ.
އިން ވިޓްރޯ ފަރޓިލައިޒޭޝަން، އައިވީއެފް ނުވަތަ ދަރިމައިވުމުގައި އެހީވުމަށް ފެށި މި ޚިދުމަތާއެކު އެތައް ދުވަހެއް ވަންދެން އެތައް ބަޔަކު ކުރަމުން އައި ދިގު އިންތިޒާރަކަށް ނިމުމެއް މިވަނީ ގެނުވާފައެވެ.
ޓްރީ ޓޮޕް ހޮސްޕިޓަލުން ބުނީ މިހާރުވެސް ބޮޑު ހޭދައެއްކޮށްގެން ފަރުވާއަށް އެތައް ބަޔަކު ރާއްޖެއިން ބޭރަށް ދާކަމަށެވެ. އެހެންކަމުން ޓްރީ ޓޮޕްގައި ފެށުނު އައިވީއެފްގެ ޚިދުމަތާއެކު ބޭރަށް ދިޔުމަށް ކުރި ބޮޑު ހޭދައާއި، ރާއްޖޭގެ އިޤްތިޞާދަށް އޭގެ ސަބަބުން ކުރި އަސަރު ދެން ކުޑަވާނެކަމަށް ޓްރީ ޓޮޕް ހޮސްޕިޓަލުން ބުނެއެވެ.
ފަރޓިލިޓީ ސެންޓަރުގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ހޮސްޕިޓަލްގެ މެނޭޖިންގ ޑިރެކްޓަރ އަޙްމަދު ނަޒީރު ވިދާޅުވީ، މި ސެންޓަރަކީ ރާއްޖޭގެ ޞިއްޙީ ނިޒާމަށް އިންޤިލާބީ ބޮޑު ބަދަލެއް ގެނުވާނެކަމެއްކަމަށެވެ.
"ޓީޓީއެޗް، ފަރޓިލިޓީ ސެންޓަރުގެ ސަބަބުން، ޚިދުމަތް ހޯދުމަށް ރާއްޖެއިން ބޭރަށް ދާ މީހުންގެ ޢަދަދު، އެއްދުވަހުން އަނެއްދުވަހަށް ދަށަށް ދާނެކަމަށް އަޅުގަނޑު އުއްމީދުކުރަން. އަޑުއިވޭ ގޮތުގައި ފަރޓިލިޓީގެ ޚިދުމަތް ހޯދުމަށް ގިނަ ބޭފުޅުންތަކެއް ރާއްޖޭން ބޭރަށް ވަޑައިގަންނެވުމަށްޓަކައި ބޮޑު ހޭދައެއް ކުރައްވަމުންދޭ. ޓީޓީއެޗް ފަރޓިލިޓީ ކްލިނިކް ހުޅުވުމުން ޚިދުމަތް ހޯއްދެވުމަށް ރާއްޖެއިން ބޭރަށް ވަޑައިގަންނަވާ ބޭފުޅުންގެ ޢަދަދު މަދުވެ، އެކަމަށްޓަކައި ހޭދަވާ ބޭރު ފައިސާގެ ޢަދަދު އެއްދުވަހުން އަނެއް ދުވަހަށް ދަށަށް ދާނެކަމަށް އަޅުގަނޑު އުއްމީދުކުރަން" ނަޒީރު ވިދާޅުވިއެވެ.
ޓްރީ ޓޮޕް ފާރޓިލިޓީ ސެންޓަރ ހުޅުވާފައިވަނީ އެ ހޮސްޕިޓަލުގެ 3 ވަނަ ފަންގިފިލާގެ ވިމަން އެންޑް ޗައިލްޑް ސެންޓަރުގައެވެ. ޚާއްސަ ތަޖުރިބާކާރުންގެ އެހީއާއެކު ދަރިމައިވުމައި ގުޅޭ ފަރުވާ މި ސެންޓަރުން ފޯރުކޮށްދޭނެކަމަށް އެ ހޮސްޕިޓަލުން ބުނެއެވެ.
އެގޮތުން އިން ވިޓްރޯ ފަރޓިލައިޒޭޝަން (އައިވީއެފް) އަދި އިންޓްރައުޓަރިން އިންސެމިނޭޝަން (އައިޔޫއައި) ފަދަ މި ދާއިރާގައި ކުރިއަރާފައިވާ ޚިދުމަތް ހިމެނޭކަމަށް ހޮސްޕިޓަލުން ބުނެއެވެ. ޓްރީ ޓޮޕް ހޮސްޕިޓަލުގައި އައިވީއެފްގެ ޚިދުމަތް ފެށިއިރު، ހޮސްޕިޓަލުގެ ރަޖިސްޓްރީގައި މި ޚިދުމަތް ހޯދުމަށް ސްކްރީންކުރުމަށް މިހާރުވެސް 250 އެއްހާ މީހުން ރަޖިސްޓަރވެފައިވާކަމަށް ޓްރީ ޓޮޕް ހޮސްޕިޓަލުން ބުނެއެވެ.
އިންޑިއާގެ ސިމަރ ހޮސްޕިޓަލާއި ގުޅިގެން ޓްރީ ޓޮޕް ހޮސްޕިޓަލުން މި ޚިދުމަތް ދޭން ފަށާފައިވަނީ މިޚިދުމަތް އަވައްޓެރި ޤައުމުތަކުން ދޭ އަގަށްވުރެ ކުޑަ އަގެއްގައިކަމަށް ޓްރީ ޓޮޕް ހޮސްޕިޓަލުން ހާމަކުރެއެވެ.
އެގޮތުން ކޮންސަލްޓޭޝަންއިން ފެށިގެން އައިވީއެފް ނުވަތަ އައިޔޫއައިގެ ޚިދުމަތް ދިނުމަށް ކުރިއަށްގެންދާ އެއް ސައިކަލްއަށް 46000 ރުފިޔާގެ އަގެއް އެހޮސްޕިޓަލުން ކަނޑައަޅާފައިވެއެވެ. އަދި ޕްރޮސީޖަރއަށް ދާން ނުޖެހޭ ފަރާތްތަކުން ބޮޑު ހޭދައެއް ކުރަން ނުޖެހޭނެކަމަށް އެހޮސްޕިޓަލުން ފާހަގަކުރެއެވެ.
އައިވީއެފް އަދި އައިޔޫއައި ގެ ޕްރޮސީޖަރއަށް ދަނީ އެންމެ ފުރަތަމަ ބޭހާއި، ދިރިއުޅުމުގެ އާދަކާދަތަކަށް ބަދަލު ގެނެސްގެން ވެސް ދަރިމައިވުމުގައި ހުރަސް ހުންނަ ފަރާތްތަކެވެ. ފަރޓިލިޓީ ސެންޓަރު ހުޅުވުމާއެކު މި ޚިދުމަތް މިހާރު ލިބޭނެކަމަށް ޓްރީ ޓޮޕް ހޮސްޕިޓަލުން ވިދާޅުވެއެވެ.