ރާއްޖެ ޓްރާންސްޕޯޓް ލިންކް، އާރް.ޓީ.އެލްގެ ފެރީއަށް އާއްމުން އަހުލުވެރިކުރުމުގެ ދަތުރުތައް ޅ. އަތޮޅުގައި ފަށައިފިއެވެ. ޅ. އަތޮޅުގައި އާރް.ޓީ.އެލް ފެރީގެ ޚިދުމަތް 3 ރޫޓަކުން ކުރުމަށް އެމް.ޓީ.ސީ.ސީން ވަނީ ނިންމާފައެވެ.
އާރް.ޓީ.އެލްގެ ޚިދުމަތް ޒޯން 2 ގައި ހިމެނޭ ޅ. އަތޮޅަށް ފެށުމަށްޓަކާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން ސްޕީޑް ފެރީތައް އެ އަތޮޅަށް ފޮނުވާފައިވަނީ މިމަހުގެ 16 ވަނަ ދުވަހުއެވެ. އަދި މިމަހުގެ 17 އިން 20 އަށް އެންމެ ފުރަތަމަ ކުރިއަށްގެންގޮސްފައިވަނީ ފެރީތަކުގެ ޓެކްނިކަލް ޓެސްޓު ދަތުރުތަކެކެވެ.
މި ދަތުރުތަކަށްފަހު، އާއްމުން މި ޚިދުމަތަށް އަހުލުވެރިކުރުމުގެ ދަތުރުތައް މިމަހުގެ 21 ވަނަ ދުވަހު ވަނީ ފަށާފައެވެ. މި ދަތުރުތައް މިމަހުގެ 27 އާއި ހަމައަށް ކުރިއަށްގެންދާއިރު، މި މުއްދަތުގައި ދަތުރުތައް ކޮށްދޭނީ މުޅިން ހިލޭއެވެ.
ޅ. އަތޮޅުގައި އާރް.ޓީ.އެލްގެ ޚިދުމަތަށް 2 ފެރީއެއް ބޭނުންކުރާއިރު، އަތޮޅުގެ 6 ރަށަކަށް މި ދަތުރުތައް ކުރާނެއެވެ. އެގޮތުން ޅ. އަތޮޅުގައި 3 ރޫޓަކުން މި ދަތުރުތައް އެމްޓީސީސީން ކުރާގޮތަށް ވަނީ ހަމަޖެހިފައެވެ. ރޫޓް R1C1 ގެ ދަތުރުތައް އޮޅުވެލިފުށި، ކުރެންދޫ، ފެލިވަރު، މަޑިވަރު އަދި ނައިފަރަށް ކުރާނެއެވެ. R1C2 ރޫޓުގެ ތެރެއިން ހިންނަވަރު، ފެލިވަރު، މަޑިވަރު، އަދި ނައިފަރަށް ދަތުރުކުރާނެއެވެ. އަދި R1C3 ގެ ދަތުރުތައް ނައިފަރު، ކުރެންދޫ އަދި އޮޅުވެލިފުއްޓަށް ކުރާނެއެވެ.
އެމް.ޓީ.ސީ.ސީން ވިދާޅުވީ، ހިލޭ މި ދަތުރުތައް ކޮށްދިނުމަށް ކަނޑައަޅާފައިވާ މުއްދަތުގެ މައިގަނޑު މަޤްޞަދަކީ އާއްމުން ފެރީ ޝެޑިއުލަށް އަހުލުވެރިކޮށް، މި ޚިދުމަތް ރަނގަޅަށް ތަޖުރިބާކޮށްދިނުމުގެ ފުރުޞަތު އާއްމުންނަށް ދިނުންކަމަށެވެ. އަދި އާއްމުންގެ ޚިޔާލާ އެއްގޮތަށް ޚިދުމަތުގެ ފެންވަރު ރަނގަޅުކޮށް ޚިދުމަތް ހަރުދަނާކޮށްދިނުމަށްކަމަށެވެ. ދަތުރުތައް ހިލޭ ކޮށްދޭ މުއްދަތުގައި، އެރަށެއްގެ ރަށު ކައުންސިލު މެދުވެރިކޮށް ފެރީން ޖާގަ ހޯދޭނެކަމަށް އެކުންފުނިން ވިދާޅުވެއެވެ.
އާރް.ޓީ.އެލްގެ ޚިދުމަތް ޅ. އަތޮޅުގައި އަގުނަގައިގެން ފެށުމަށް ހަމަޖެހިފައިވަނީ މިމަހުގެ 28 އިން ފެށިގެންނެވެ. ރަސްމީކޮށް އަގު ނަގައިގެން ދަތުރުތައް ފެށުމާއެކު، ކައުންސިލް މެދުވެރިކޮށް ފެރީގެ ޖާގަ ދޫކުރުން ހުއްޓާލެވޭނެއެވެ. އަދި މިމަހުގެ 24 އިން ފެށިގެން އާރް.ޓީ.އެލްގެ ވެބްސައިޓް އަދި ޓްރެވަލް އެޕް ޓިކެޓް ގަތުމަށް ބޭނުންކުރެވޭނެކަމަށް އެމް.ޓީ.ސީ.ސީން ވިދާޅުވެއެވެ. ޅ. އަތޮޅުގައި އާރް.ޓީ.އެލްގެ ފެރީ ޚިދުމަތުގެ އަގުތައް އުޅެނީ 35 ރުފިޔާއާއި 125 ރުފިޔާއާއި ދެމެދުގައެވެ.
އެމް.ޓީ.ސީ.ސީން އާރް.ޓީ.އެލް ފެރީގެ ޚިދުމަތް ޒޯން އެކެއްގެ ހއ، ހދ އަދި ށ. އަތޮޅުގައި މިހާރު ފޯރުކޮށްދެމުން އަންނައިރު، މި ޚިދުމަތް ވެފައިވަނީ އާއްމުންގެ އިތުބާރާއި ލޯބި ލިބިފައިވާ ޚިދުމަތަކަށެވެ. ސަރުކާރުގެ އަމާޒަކީ އަންނަ އަހަރުގެ ނިޔަލަށް އާރް.ޓީ.އެލްގެ ފެރީ ޚިދުމަތް އެކި ސަރަހައްދުތަކަށް ފުޅާކޮށް، ހަރުދަނާ ދަތުރުފަތުރުގެ ނިޒާމަކުން މުޅި ރާއްޖެ ގުޅާލުމެވެ.