ވެލާނާ އިންޓަރނޭޝަނަލް އެއަރޕޯޓުގެ އައު ރަންވޭއާއި ސީޕްލޭން ޓަރމިނަލް އޮޕަރޭޝަނަށް ގެނެއުމާއެކު އޮޕަރޭޝަންތައް ބޮޑުތަނުން އަވަސްވެގެންދާނެކަމަށް މޯލްޑިވްސް އެއަރޕޯޓްސް ކޮމްޕެނީ، އެމް.އޭ.ސީ.އެލްގެ މެނޭޖިންގ ޑިރެކްޓަރ މަޙުޖޫބް ޝުޖާޢު ވިދާޅުވެއްޖެއެވެ.
އެމް.އޭ.ސީ.އެލްގެ މެނޭޖިންގ ޑިރެކްޓަރ މިހެން ވިދާޅުވީ، ވީ.އައި.އޭގެ އައު ރަންވޭއާއި އައު ސީޕްލޭން ޓަރމިނަލް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ވެލާނާ އިންޓަރނޭޝަނަލް އެއަރޕޯޓު ހިންގާ އެމް.އޭ.ސީ.އެލްގެ މެނޭޖިންގ ޑިރެކްޓަރ އަދި ސީއީއޯ މަޙުޖޫބް ޝުޖާޢު ވިދާޅުވީ، ވެލާނާ އިންޓަރނޭޝަނަލް އެއަރޕޯޓުގައި އަލަށް ތަރައްޤީކުރި ރަންވޭ ބޭނުންކުރަން ފެށުމަކީ، އެއަރޕޯޓުގެ ތަރައްޤީއަށް އެޅުނު ތާރީޚީ ކުރިއެރުމެއް ކަމަށެވެ. އައު ރަންވޭއަކީ ބައިނަލްއަޤްވާމީ މިންގަނޑުތަކަށް ފެތޭނެހެން ތަރައްޤީކޮށްފައިވާ ރަންވޭއެއްކަން ފާހަގަކުރައްވާ، ކޯޑް-އެފް ރަންވޭ ބޭނުންކުރަން ފެށުމުން އެއަރބަސް A380 މަރުކާގެ މަތިންތާބޯޓުތަކަށްވެސް ރާއްޖެއަށް ދަތުރުކުރެވޭނެކަމަށް މަޙުޖޫބު ވިދާޅުވިއެވެ.
މަޙުޖޫބު ވިދާޅުވީ، އައު ރަންވޭއާއެކު، އެއަރޕޯޓުގެ ތާރީޚުގައި ފުރަތަމަ ފަހަރަށް ރަންވޭއަކާއެކު ޓެކްސީވޭއެއް އެކުގައި އޮޕަރޭޓްކުރުމުގެ ފުރުޞަތު މިހާރު ލިބިފައިވާކަމަށެވެ. އަދި މިއީ މުޅި އެއަރޕޯޓުގެ އޮޕަރޭޝަންތަކަށް ލިބުނު ބޮޑު ކުރިއެރުމެއްކަމަށާއި، ޚިދުމަތް ދިނުމުގައި ހޭދަވާ ވަގުތު އެތައް ގުނައެއް އަވަސްކުރެވޭނެކަމަށް އޭނާ ވިދާޅުވިއެވެ.
"މީގެ ސަބަބުން އެއަރޕޯޓުގެ ތްރޫޕުޓް 8 އިން 21 އަށް ދާނެ. ކުރިން 2 ބޯޓުގެ ދުރުމިނުގައި 10 މިނެޓުގެ ދުރުމިނެއް ބަހައްޓައިގެން ގެންނައިރު މިހާރު ދެ ބޯޓު ޖައްސާ ދުރުމިން 3 މިނެޓަށް ކުރުވެގެންދާނެ. އަދި މިހާރު އެންމެ ގިނަވެގެން މިނެޓެއްގެ ތެރޭގައި ރަންވޭ ކްލިއަރ ކުރެވިގެންދާނެ. މީގެ ސަބަބުން ބޯޓު ފުރުމާއި ޖެއްސުމުގައި ކުރިން ދިމާވި ޑިލޭތައް މުޅިންހެން ހައްލުވެހެންދާނެ" މަޙުޖޫބު ވިދާޅުވިއެވެ.
އެމް.އޭ.ސީ.އެލްގެ މެނޭޖިންގ ޑިރެކްޓަރ މަޙުޖޫބު ޝުޖާޢު ވިދާޅުވީ، އަލަށް ހުޅުވުނު ނޫވިލު ސީޕްލޭން ޓަރމިނަލާއެކު، ކުރިން ވަކިވަކި ތަންތަނުގައި ފޯރުކޮށްދެމުންދިޔަ ސީޕްލޭންގެ ޚިދުމަތް އެއް ފުރާޅެއްގެ ދަށަށް ގެނެވިގެންދާނެކަމަށެވެ. އަދި މިއީ އެއަރޕޯޓުގައި އެމް.އޭ.ސީ.އެލްގެ އޮޕަރޭޝަންތައް ހިންގުމަށްވެސް އިތުރު ޖާގަ ލިބިގެންދާނެކަމެއްކަމަށް މަޙުޖޫބު ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން އެމް.އޭ.ސީ.އެލްގެ ޗެއަރމަން މުޙައްމަދު އުމަރު މަނިކު ވިދާޅުވީ، އެއަރޕޯޓަކީ ދިވެހިންގެ މިނިވަންކަމާއި، މަސައްކަތްތެރިކަމުގެ ފަޚުރުވެރި ތާރީޚެއް އޮތް މުހިއްމު ތަނެއްކަމަށެވެ. އަދި މިއަދު އެއަރޕޯޓުވެފައި ވަނީ ރާއްޖޭގެ އިޤްތިޞާދުގެވެސް އެންމެ މުހިއްމު ދައުރެއް އަދާކުރާ އެއް ވަޞީލަތައްކަމަށާއި، މިއީ ރާއްޖޭގައި ފަތުރުވެރިކަން ފުޅާކުރުމުގައިވެސް މުހިއްމު ދައުރެއް އަދާކުރާތަނެއްކަމަށް ޗެއަރމަން ވިދާޅުވިއެވެ. ވީ.އައި.އޭ އެއްކޮށް ތަރައްޤީކޮށް ނިމޭއިރު މިތަންވެގެންދާނީ މުޅި މި ސަރަޙައްދުގައިވެސް ފާހަގަކޮށްލެވޭ ފަދަ އެއަރޕޯޓަކަށްކަމަށްވެސް މުޙައްމަދު އުމަރު މަނިކު ވިދާޅުވިއެވެ.
"މޮޑާން އެއަރޕޯޓެއްގައި ހުންނާނެ ހުރިހާ ވަޞީލަތްތަކެއް މިތަނުގައި ހުންނާނެ. މި އައެއަރޕޯޓުވާނެ މި ހިސާބުގަނޑުގައި ހުންނާނެ އެންމެ ރަނގަޅު އެއަރޕޯޓަށް" މުޙައްމަދު އުމަރު މަނިކު ވިދާޅުވިއެވެ.
ވެލާނާ އިންޓަރނޭޝަނަލް އެއަރޕޯޓު ތަރައްޤީކުރުމަށް ހިންގާ ބިޔަ މަޝްރޫޢުގެ ދަށުން އައު ރަންވޭއާއި، އައު ސީޕްލޭން ޓަރމިނަލްގެ މަސައްކަތް ކޮށްފައިވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީޖީއާ ޙަވާލުކޮށްގެންނެވެ. އައު ރަންވޭއާއި އައު ސީޕްލޭންޓް ޓަރމިނަލްވެސް ތަރައްޤީކޮށްފައިވަނީ ހުޅުލޭ ފަޅުން ބިން ހިއްކައިގެންނެވެ.