ސަރުކާރުގެ މިދައުރު ނިމޭއިރު ރާއްޖޭގައި މުޅި ޖުމްލަ 51 މެގަވޮޓްގެ ސޯލާ ކެޕޭސިޓީ ހަރުކޮށް ނިމޭނެކަމަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާ ވިދާޅުވެއްޖެއެވެ.
"ނެޓް ޒީރޯ"އަކީ ތިމާވެށީގެ ދާއިރާގައި ސަރުކާރުން ގެންގުޅުއްވާ މުހިއްމު ސިޔާސަތެކެވެ.
ސަރުކާރު ހިންގާ މައި ޕާޓީ އެމްޑީޕީގެ ކޮންގްރެސްގައި ސަރުކާރުން ކުރަމުންދާ މަސައްކަތްތަކާއި ގުޅޭގޮތުން މުއައްސަސާތަކުން ކުރަމުންދާ މަސައްކަތްތަކާއި ޙާސިލުކުރެވިފައިވާ މިންވަރަށް ބަލާ އަންނަނީ ޕޭޕަރުތައް ހުށައަޅަމުންނެވެ. އެގޮތުން މިނިސްޓްރީ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީގެ ފަރާތުން ކަރުދާސް ހުށައަޅުއްވަމުން މިނިސްޓަރ އާމިނަތު ޝައުނާ ވިދާޅުވީ ސަރުކާރުން މިހާތަނަށް ސޯލާ ހަކަތައިގެ ދާއިރާއިން 40 ރަށެއްގައި ކުރިއަށްގެންގޮސްފައިވާ މަސައްކަތް އެއްކޮށް ނިމިފައިވާކަމަށެވެ. އަދި ސަރުކާރުގެ މިދައުރު ނިމޭއިރު މުޅި ރާއްޖޭގައި ޖުމްލަ 51 މެގަވޮޓްގެ ސޯލާ ކެޕޭސިޓީ ހަރުކޮށް ނިމޭނެކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިއީ މިދިޔަ ދައުރުގައި ރާއްޖޭގައި ސޯލާ ހަރުކުރެވުނު ނިސްބަތުން ބަލާއިރު ދެގުނަ އިތުރު ޢަދަދެއްކަމަށެވެ. އެގޮތުން 2018 ވަނަ އަހަރު ރާއްޖޭގައި ހަރުކޮށްފައިވަނީ 16.5 މެގަވޮޓްގެ ސޯލާ ކެޕޭސިޓީކަމަށާއި މިއަހަރުގެ މިހާތަނަށް އައިއިރު މިވީ 4 އަހަރުގެ ތެރޭގައި މިޢަދަދު 36.5 އިންސައްތައަށް އިތުރުކުރެވިފައިވާ ކަމަށް ޝައުނާ ވިދާޅުވިއެވެ. މީގެ ސަބަބުން ދައުލަތުގެ ބަޖެޓުން ހަކަތަ އުފެއްދުމަށް ތެލަށް ކުރާ ހޭދައިން އަހަރަކު 151 މިލިއަން ރުފިޔާ ސަލާމަތްކުރެވޭނެ ކަމަށް މިނިސްޓަރ ޝައުނާ ވިދާޅުވިއެވެ.
މިނިސްޓަރ ޝައުނާ ވިދާޅުވީ 41.8 މެގަވޮޓްގެ ސޯލާ މަޝްރޫޢު މިހާރުވެސް ޓެންޑަރިން މަރުޙަލާގައި ކުރިއަށްދާކަމަށެވެ. އަދި މިއީ ބެޓަރިއާއި ކަރަންޓު ވިއުގަ އަޕްގްރޭޑް ކުރުމުގެ މަސައްކަތާއެކު ކުރަމުންދާ މަސައްކަތެއްކަން މިނިސްޓަރ ފާހަގަކުރެއްވިއެވެ. 3 ބިލިއަން ރުފިޔާގެ މިމަޝްރޫޢު ނިމިގެންދާއިރު ދައުލަތުން ތެލަށް ކުރާ ހޭދަ އަހަރަކު 320 މިލިއަނުން މަދުކުރެވޭނެއެވެ. ކޮންގްރެސްގައި ވާހަކަދައްކަވަމުން މިނިސްޓަރ ޝައުނާ ވިދާޅުވީ މިހުރިހާ މަޝްރޫޢެއްގެ މަސައްކަތް ނިމިގެންދާއިރު ރާއްޖޭގެ އިޔާދަކުރަނިވި ހަކަތައިގެ ކެޕޭސިޓީ 120 މެގަވޮޓަށް އިތުރުކުރެވިގެންދާނެކަމަށެވެ. އެއީ އަހަރަކު ތެލަށް ކުރާހޭދަ 900 މިލިއަނުން ސަލާމަތްކުރެވޭނެ ޢަދަދެކެވެ.
ހަކަތައިގެ އިތުރުން ރާއްޖޭގެ އެކި ސަރަޙައްދުތައް ޙިމާޔަތްކުރުމާއި ކުނި މެނޭޖްކުރުމުގެ ދާއިރާއާއި ޓެކްނޮލޮޖީގެ ދާއިރާއިން ރާއްޖެއިން މިވޭތުވެދިޔަ 4 އަހަރު ކޮށްފައިވާ މުހިއްމު މަސައްކަތްތަކުގެ މަޢުލޫމާތު މިނިސްޓަރ ޝައުނާވަނީ ހިއްސާކުރައްވާފައެވެ.