އާރްޓީއެލް ބަސްތަކުގައި ދަރިވަރުންނާއި، ޚާއްސަ އެހީއަށް ބޭނުންވާ މީހުން އަދި އުމުރުން ދުވަސްވީ މީހުންނަށް ހިލޭ

ރާއްޖެ ޓްރާންސްޕޯޓް ލިންކުގެ ދަށުން މާލެއާއި އަތޮޅުތަކުގައި މިނީ ބަހުގެ ޚިދުމަތް ފެށުމަށް އެމް.ޓީ.ސީ.ސީން ތައްޔާރުވަމުންދާއިރު، މި ބަސްތަކުން ސްކޫލްކުދިންނާއި، ޚާއްސަ އެހީއަށް ބޭނުންވާ މީހުން އަދި އުމުރުން ދުވަސްވީ މީހުންނަށް ހިލޭ ދަތުރުކުރޭވެނެކަމަށް އެމް.ޓީ.ސީ.ސީން ވިދާޅުވެއްޖެއެވެ.

އެމް.ޓީ.ސީ.ސީން ދަނީ މާލޭގެ އިތުރުން ލ. އަތޮޅާއި، ފުވައްމުލައް ސިޓީ އަދި އައްޑޫ ސިޓީގައި މިނީ ބަހުގެ ޚިދުމަތް މިމަހު ފެށުމަށް މަސައްކަތް ކުރަމުންނެވެ.

މާލޭގައި މިނީ ބަހުގެ ޚިދުމަތް ދިނުމަށް ސަރުކާރުން އެމް.ޓީ.ސީ.ސީއާއި ޙަވާލުކޮށްފައިވަނީ 2019 ވަނަ އަހަރުގެ ތެރޭގައެވެ. މާލޭ ސަރަހައްދުގެ އިތުރުން ރާއްޖޭގެ ދެކުނުން ލ. އަތޮޅު ގަމާއި ފޮނަދޫއާއި، އިސްދޫ ކަލައިދޫ، ފުވައްމުލައް ސިޓީ އަދި އައްޑޫ ސިޓީގައިވެސް މިނީ ބަހުގެ ޚިދުމަތް ތަޢާރަފުކުރުމަށް އެކުންފުނިން ދަނީ މަސައްކަތްކުރަމުންނެވެ. މާލޭ ސަރަޙައްދުގައި ދަތުރުފަތުރުގެ ކަންކަން ހަރުދަނާކުރުމަށް ކުރަމުންދާ މަސައްކަތުގެ ތެރެއިން، މާލެއަށް މިނީ ބަހުގެ ޚިދުމަތް ތަޢާރަފުކުރުމަކީ މި ސަރުކާރުގެ މުހިއްމު ސިޔާސަތެކެވެ.

މާލެއާއި އަތޮޅުތަކުގައި މިނީ ބަހުގެ ޚިދުމަތް ދިނުމަށް ބޭނުންވާ 41 ބަހުގެ ތެރެއިން 36 ބަސް މިމަހުގެ 16 ވަނަ ދުވަހު އެމް.ޓީ.ސީ.ސީން ރާއްޖެއަށް ވަނީ ގެނެސްފައެވެ. މީގެ ތެރެއިން މާލޭގައި މި ޚިދުމަތް ދިނުމަށް 12 ބަހެއް ބޭނުންކުރާނެއެވެ. އަދި ބާކީ 24 ބަސް، އަތޮޅުތަކުގައި މި ޙިދުމަތް ފުރަތަމަ ފެށުމަށް ހަމަޖެހިފައިވާ 3 ސަރަޙައްދަށް ފޮނުވުމުގެ މަސައްކަތް އެމް.ޓީ.ސީ.ސީން ދަނީ ކުރަމުންނެވެ.

އާރްޓީއެލް މިނީ ބަހުގެ ޚިދުމަތް ފަށާ ރަށްތައް:

އައްޑޫ ސިޓީ ފޭދޫ-ހިތަދޫ - 8 މިނީ ބަސް / 4 ރޫޓް
އައްޑޫ ސިޓީ ހުޅުމީދޫ - 4 މިނީ ބަސް / 4 ރޫޓް
ފުވައްމުލައް ސިޓީ - 5 މިނީ ބަސް / 3 ރޫޓް
ލ. ގަން-ފޮނަދޫ - 5 މިނީ ބަސް / 4 ރޫޓް
ލ. އިސްދޫ-ކަލައިދޫ - 2 މިނީ ބަސް / 1 ރޫޓް

އެމް.ޓީ.ސީ.ސީގެ ސީއީއޯ އާދަމް އާޒިމް ވިދާޅުވީ، ޚިދުމަތް ފެށުމަށް ރަށްރަށުން ހަމަޖައްސަންޖެހޭ ކަންކަން މިހާރު ހަމަޖައްސާފައިވާކަމަށެވެ. އެގޮތުން ބަސް ދަތުރުކުރާނެ ރޫޓްތައް ކަނޑައެޅުމާއި، ބަސް ހުއްޓާނެ ތަންތަން ކަނޑައެޅުމާއި އަދި ޚިދުމަތް ދިނުމަށް ބޭނުންވާ މުވައްޒަފުން ހޯދުމާއި ތަމްރީން ދިނުމުގެ މަސައްކަތްވެސް މިހާރު ނިމިފައިވާކަމަށެވެ. އާރްޓީއެލް ފެރީގެ ޚިދުމަތެކޭ އެއްގޮތަށް، މާލެއާއި އަތޮޅުތަކުގައި ސްކޫލްކުދިންނާއި، ޚާއްސަ އެހީއަށް ބޭނުންވާ މީހުން އަދި އުމުރުން ދުވަސްވީ މީހުންނަށް މިނީ ބަހުގައި ހިލޭ ދަތުރުކުރޭވެނެކަމަށް އެކުންފުނިން ވިދާޅުވެއެވެ.

އަލަށް ގެނައި މިނީ ބަސްތަކަކީ 20 މީހުންގެ ޖާގައިގެ ބަސްތަކެކެވެ. އަދި މިއީ ޑީސެލް ބަސްތަކެކެވެ. މި ބަސްތައް ފަރުމާކޮށްފައިވަނީ ޚާއްސަ އެހީއަށް ބޭނުންވާ މީހުންނަށްވެސް ފަސޭހައިން ބޭނުންކުރެވޭ ގޮތަށެވެ. އެގޮތުން ފުރޮޅުލީ ގޮނޑީގައި ފަސޭހައިން ބަހަށް އަރައި ފޭބޭނެއެވެ.

މި ޚިދުމަތަކީ މުޅި ރާއްޖޭގެ ދަތުރުފަތުރު ގުޅާލުމަށް ސަރުކާރުން ފަށާފައިވާ "ރާއްޖެ ޓްރާންސްޕޯޓް ލިންކް"ގައި ހިމަނައިގެން އަތޮޅުތަކުގައި މުޅިން އަލަށް ފަށާ ޚިދުމަތެކެވެ. މިނީ ބަހުގެ ޚިދުމަތާއެކު އަގު ހެޔޮކޮށް، ހިތްފަސޭހަ އަވަސް ދަތުރުތަކެއް ކުރުމުގެ ފުރުޞަތު ރައްޔިތުންނަށް ލިބިގެންދާނެކަމަށް އެމް.ޓީ.ސީ.ސީން ވިދާޅުވެއެވެ.