15 ރަށެއްގައި ކުނި މެނޭޖްކުރާ މަރުކަޒު އެޅުމުގެ މަސައްކަތް ކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީން އިޢުލާންކޮށްފިއެވެ.
މި މަސައްކަތަކީ ދިވެހި ސަރުކާރުން އޭޝިއަން ޑިވެލޮޕްމަންޓް ބޭންކް (އޭ.ޑީ.ބީ) ގެ އެހީގައި ހިންގަމުންދާ ގްރޭޓަރ މާލެ އެންވަޔަރަންމަންޓަލް އިމްޕްރޫވްމަންޓް އެންޑް ވޭސްޓް މެނޭޖްމަންޓް ޕްރޮޖެކްޓުގެ ދަށުން ކުރުމަށް ނިންމާފައިވާ މަސައްކަތެކެވެ.
މި 15 ރަށުގައި ކުނި މެނޭޖްކުރާ މަރުކަޒު އެޅުމުގެ މަސައްކަތް ކުރުމަށް ނިންމާފައިވަނީ 8 ލޮޓަކަށް ބަހާލައިގެންނެވެ. ފިނޭންސް މިނިސްޓްރީން ވަނީ މި 15 ރަށް 8 ލޮޓަށް ބެހިފައިވާގޮތާއި، މިއިން ކޮންމެ ލޮޓަކަށް ބިޑް ސެކިއުރިޓީގެގޮތުގައި ހުށަހަޅަން ޖެހޭ މިންވަރު އާއްމުކޮށްފައެވެ. އަދި މި މަސައްކަތަށް ބީލަން ހުށަހެޅުމުގެ ދަޢުވަތު މިކަމަށް ޝަރުޠު ހަމަވާ ހުރިހާ ފަރާތްތަކަށް ހުޅުވާލާފައެވެ.
15 ރަށް ބައިތަކަށް ބެހިފައިވާގޮތާއި ބިޑް ސެކިއުރިޓީގެގޮތުގައި ދައްކަންޖެހޭވަރު:
- ލޮޓް 1: ކ. ތުލުސްދޫ، ކ. ހުރާ، ކ. ހިންމަފުށި / 100000 ރުފިޔާ
- ލޮޓް 2: ކ. މާފުށި، ކ. ގުރައިދޫ / 50000 ރުފިޔާ
- ލޮޓް 3: ވ. ތިނަދޫ، ވ. ފެލިދޫ / 40000 ރުފިޔާ
- ލޮޓް 4: ވ. ކެޔޮދޫ، ވ. ރަކީދޫ / 40000 ރުފިޔާ
- ލޮޓް 5: އދ. މަހިބަދޫ، އދ. ހަންޔާމީދޫ / 60000 ރުފިޔާ
- ލޮޓް 6: އއ. ހިމަންދޫ، އއ. ފެރިދޫ / 55000 ރުފިޔާ
- ލޮޓް 7: އއ. ތޮއްޑު / 30000 ރުފިޔާ
- ލޮޓް 8: ކ. ކާށިދޫ / 30000 ރުފިޔާ
ފިނޭންސް މިނިސްޓްރީން ވިދާޅުވީ، މި ބީލަންތަކުގައި ބައިވެރިވެވޭނީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ގަވާއިދު" ގައިވާ ގޮތުގެމަތީން ރަޖިސްޓަރީވެފައިވާ ފަރާތްތަކަށްކަމަށެވެ. އަދި އިންޓަރނޭޝަނަލް ކުންފުނިތަކުން "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ގަވާއިދު"ގައި މި މަރުހަލާގައި ރަޖިސްޓްރީވާން ނުޖެހޭނެކަމަށެވެ. ނަމަވެސް "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ގަވާއިދު" ގެ 13 ވަނަ މާއްދާގައި ބަޔާންކުރާ ލިޔެކިއުންތައް ބީލަމާއެކު ހުށަހަޅަންވާނެކަމަށް އެ މިނިސްޓްރީން ވިދާޅުވެއެވެ.
މި މަސައްކަތަށް ޝަރުތުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ ނެޝަނަލް ކޮމްޕެޓިޓިވް ބިޑިންގ (އެން.ސީ.ބީ) އުސޫލުގެ މަތިންނެވެ. އަދި ބީލަމުގައި ރަޖިސްޓްރީކުރުމަށްޓަކާ 500 ރުފިޔާގެ ނަން-ރިފަންޑަބަލް ރަޖިސްޓްރޭޝަން ފީއެއް ދައްކަވަންޖެހޭނެއެވެ.
ރައްކާތެރިގޮތުގައި ކުނި ނައްތާލެވޭނެ ނިޒާމުތައް ޤާއިމުކުރުމަށްޓަކާ، ރަށްރަށް ބޭނުންވާ ކުނި މެނޭޖްކުރާ މަރުކަޒުތައް ޤާއިމުކޮށްދިނުމަކީ ސަރުކާރުގެ މުހިއްމު އަމާޒެކެވެ. އެގޮތުން މިއަހަރުގެ ބަޖެޓުގައި ކުނި ނައްތާލުމުގެ އެކި މަޝްރޫޢުތަކަށް 358.9 މިލިއަން ރުފިޔާ ކަނޑައަޅާފައިވެއެވެ. މީގެ ތެރެއިން ބައެއް މަޝްރޫޢުތަކުގެ މަސައްކަތް މިވަގުތުވެސް ރާއްޖޭގެ އެކި ސަރަޙައްދުތަކުގައި އަންނަނީ ކުރަމުންނެވެ.