އިންޑިއާގެ މަޝްހޫރު ލަވަކިޔުންތެރިޔާ ޝާންއާއި ރާއްޖޭގެ މަޝްހޫރު ލަވަކިޔުންތެރިޔާ އުނޫޝާގެ އައު ލަވަ "ދިލް އުޅެޔާ" މިއަދު ރިލީޒްކޮށްފިއެވެ.
ބީޗް ވައިބެއް ގެނެސްދޭ "ދިލް އުޅެޔާ" މި ލަވައަކީ ރެގޭ ޕޮޕް މިއުޒިކަށް ތައްޔާރުކޮށްފައިވާ ލަވައެކެވެ. ލަވައިގެ މެލޮޑީގައި ދިވެހި ބޮޑުބެރުގެ ބައެއް އަޑުތައްވެސް ހިމަނާފައިވެއެވެ. ލަވައިގެ މިއުޒިކް ހަދާފައިވަނީ ގަނޭޝް ސުރްވޭ އަދި ރާއްޖޭގެ މަޝްޙޫރު މިއުޒިކް ޕްރޮޑިއުސަރ ބާރޗީއެވެ. ހިންދީ، ޕަންޖާބު އަދި ދިވެހި ބަސް ހިމަނައިގެން ތައްޔާރުކޮށްފައިވާ މި ލަވަ ކޮމްޕޯސްކޮށްފައިވަނީވެސް ޝާން އަމިއްލައަށެވެ.
މިއީ އެއްގޮތަށްވުރެ ގިނަގޮތްގޮތުން ދިވެހިންގެ ހިތްތަކާވެސް ވަރަށް ބޮޑަށް ގުޅިފައިވާ ލަވައެކެވެ. އެގޮތުން މި ލަވައިގައި ދިވެހި ބަހުން ޝާންއާއި އުނޫޝާގެ ރެޕް ބައެއް ހިމަނާފައިވެއެވެ. މި ރެޕް ބައި ލިޔެފައިވަނީ މަޝްޙޫރު ލަވަކިޔުންތެރިޔާ މުޙައްމަދު ޢަބްދުލް ޣަނީ (ތޭރަވާ)އެވެ. މި ލަވައިގެ ރިކޯޑިންގ ޝާން ސްޓޫޑިއޯގައި ހެދިނަމަވެސް އުނޫޝާގެ ވޯކަލްސް ރިކޯޑްކޮށްފައިވަނީ ވަކިން މާލޭގައެވެ.
މުޅި ލަވަ އެއްކޮށް ޝޫޓްކޮށްފައިވަނީވެސް ރާއްޖޭގައެވެ. ލަވައިގެ ވީޑިއޯއިން ރާއްޖޭގެ ހިތްގައިމުކަމާއި، ގުދުރަތީ މުއްސަނދިކަން ކިތަންމެ ފުރިހަމައެއްކޮށްވެސް ފެނިގެންދެއެވެ. މިލަވައިގެ މަންޒަރުތައް ނަގާފައިވަނީ ކްރޮސް ރޯޑްގެ ހާޑް ރޮކް ހޮޓަލްގައެވެ. ލަވައިގެ ވީޑިއޯއިން ޝާން ފިޔަވާ ދެން މުޅިންހެން ފެނިގެންދަނީ ދިވެހިންނެވެ. އެގޮތުން ލަވައިގައި ހަރަކާތްތެރިވާ ބެކްގްރައުންޑް ޑާންސަރުންނާއި ބޭންޑް މެންބަރުންގެ ގޮތުގައި ފެނިގެންދަނީ ހުސް ދިވެހި ފަންނާނުންނެވެ.
#DilIUdeyaa a Dance Song about Living the Moment and Spreading Happiness !! From #Maldives with ❤️ !! Featuring the very talented @unoosha :)) https://t.co/6qbUi73AW4
— Shaan (@singer_shaan) June 10, 2022
މި ލަވައިގެ ވާހަކަތައް ކިޔާދީ އިންޑިއާގެ ނޫހަކަށް ދިން އިންޓަރވިއުގައި ޝާން ވަނީ އުނޫޝާގެ ހުނަރަށް ވަރަށް ބޮޑަށް ތަޢުރީފުކޮށްފައެވެ. އެގޮތުން މި ލަވައިގައި ހިމެނޭ ހިންދީ ބައި އުނޫޝާ ގެނެސްދީފައިވަނީ ވަރަށް މޮޅަށްކަން އޭނާ ފާހަގަކުރިއެވެ. އަދި އުނޫޝާއާއެކު މަސައްކަތްކުރުމަށް ލިބުނު މި ފުރުޞަތުގައި އޭނާގެ މޮޅުކަން ތަޖުރިބާކުރެވި، ހައިރާންކޮށްލިކަމަށް ޝާން ބުނެފައިވެއެވެ.
މި ލަވަ ޝާންގެ ރަސްމީ ޔޫޓިއުބް ޗެނަލްގައި ރިލީޒްކުރުމާއެކު ގިނަ ބަޔަކު އަންނަނީ މި ލަވަ ސޯޝަލް މީޑިއާގައި ޝެއަރކުރަމުންނެވެ. އަދި މިއީ އަޑުއަހާލަން ހިިތްގައިމު އުފާވެރި އިޙްސާސްތަކެއް ގެނުވާ ލަވައެއްގެގޮތުގައި ގިނަ ބަޔަކު އަންނަނީ ސިފަކުރަމުންނެވެ.
ސޯޝަލް މީޑިއާގައި މި ލަވައާގުޅޭގޮތުން ޔޫތު މިނިސްޓަރ އަޙްމަދު މަޚްލޫފް ކުރެއްވި ޕޯސްޓެއްގައި ވިދާޅުވީ، ދިވެހި ލަވަކިޔުންތެރިއަކާއި އިންޑިއާގެ ލަވަކިޔުންތެރިއެއް އެކުގައި މަސައްކަތްކޮށްލުމަކީ މޯލްޑިވްސް ސްޕޯޓްސް އެވޯޑްގެ ތެރެއިންވެސް އުފެދުނު ޚިޔާލެއްކަމަށެވެ. އަދި ކާމިޔާބު ލަވަކިޔުންތެރިޔާ އުނޫޝާއަށް އެފުރުޞަތު ލިބުނީތީ އުފާކުރައްވާކަމަށް މިނިސްޓަރ މަޚްލޫފް ވިދާޅުވިއެވެ. ޔޫތު މިނިސްޓަރ ވަނީ ރާއްޖެ އިޝްތިޙާރުކޮށް، ދިވެހި އާޓިސްޓަކަށް މިފަދަ ފުރުޞަތެއް ދިންކަމަށްޓަކާ ޝާންގެ ޓީމަށް ޝުކުރު އަދާކޮށްފައެވެ.
One of the best thing that came up during #MaldivesSportsAward was the idea of producing a song with a Maldivian,happy to get this opportunity to our talented singer @unoosha.
— Ahmed Mahloof (@AhmedMahloof) June 10, 2022
Thank you @singer_shaan bhai for this great opportunity to a Maldivian artist & for promoting Maldives. https://t.co/raDGBAKFYz
ޝާންއާއެކު މަސައްކަތްކޮށްލުމުގެ ފުރުޞަތު ލިބުމުން އުނޫޝާވެސް ހުރީ ވަރަށް އުފަލުންނެވެ. އަދި މި ފުރުޞަތު އޭނާއަށް ދިންކަމަށްޓަކާ ޝާންއާއި ޝާންގެ ޓީމަށް އުނޫޝާ ވަނީ ޝުކުރު އަދާކޮށްފައެވެ.
ބޮލީވުޑްގެ ފިލްމަކަށް ލަވަކިޔުމުގެ ޝަރަފު މީގެކުރިންވެސް އުނޫޝާއަށް ވަނީ ލިބިފައެވެ. އެގޮތުން ޕޫޖާ ބަޓް ޑައިރެކްޓްކުރި ޖިސްމް 2 އަށް އުނޫޝާ ވަނީ "ހޭވައްލާ"ގެ ނަމުގައި ލަވައެއް ކިޔައިދީފައެވެ. 2012 ވަނަ އަހަރު ރިލީޒްކުރި މި ލަވައަކީ މިފަހަރުގެ ލަވައާއި ޚިލާފަށް އިނގިރޭސި ބަހުން ކިޔާފައިވާ ލަވައެކެވެ.
ޝާންއާއި އުނޫޝާގެ މި ލަވަ މިހާރު ރިލީޒްކޮށްފައިވާއިރު، ގިނަ ބަޔަކު އަންނަނީ މި މަސައްކަތަށް ތަޢުރީފުކުރަމުންނެވެ.