ތ.ތިމަރަފުށީގައި ސަރުކާރުން ތަރައްޤީކުރަން ފަށާފައިވާ ރޯހައުސްތަކުގެ މަސައްކަތް މޭ މަހުގެ ނިޔަލަށް ނިންމާލެވޭނެ ކަމަށް ހައުސިން މިނިސްޓްރީން ވިދާޅުވެއްޖެއެވެ. ހައުސިން ޔުނިޓްތަކަށް އެދުމުގެ ފުރުޞަތު އަންނަ މަހު ހުޅުވާލުމަށް ތިމަރަފުށިން، ހައުސިން މަސައްކަތްތަކަށް އެކުލަވާލާފައިވާ ކޮމިޓީންދަނީ މަސައްކަތް ކުރަމުންނެވެ.
ތ.ތިމަރަފުއްޓަކީ ރާއްޖޭގައި އާބާދީ އިތުރު ރަށްތަކުގެ ތެރެއިން އެއް ރަށެވެ. 20 ހެކްޓަރުގެ ތިމަރަފުށީގެ އާބާދީ 2500އިން މައްޗަށް އަރައެވެ. އާބާދީ އިތުރުވުން އަންނަ އެހެން ރަށްތައް ފަދައިން ބޯހިޔާވަހިކަމުގެ މައްސަލަ ތިމަރަފުއްޓަށްވެސް ބޮޑެވެ. ތިމަރަފުށީ ކައުންސިލުން ފާހަގަކުރާގޮތުގައި އެރަށުގައި އަމިއްލަ ބޯހިޔާވަހިކަމެއް ބޭނުންވާ 300އަށްވުރެ ގިނަ އާއިލާ މިވަގުތުވެސް އެބަތިއްބެވެ.
މިސަރުކާރު އައިސް އަތޮޅުތަކުގައި އެންމެ ފުރަތަމަ ފެށި ބޯހިޔާވަހިކަމުގެ 4 މަޝްރޫޢުގެ ތެރޭގައި ތިމަރަފުށީގައި ރޯހައުސް ތަރައްޤީކުރުމުގެ މަސައްކަތް ހިމެނެއެވެ. އެސް.ޖޭ ކޮންސްޓަރކްޝަންއާއި މަސައްކަތް ހަވާލުކޮށްފައިވަނީ ތިމަރަފުށީގައި 100 ރޯހައުސް ތަރައްޤީކުރުމަށެވެ.
މިކަމުގެ މަސައްކަތްތައް ފެށީ 2020ވަނަ އަހަރުގެ ކުރިކޮޅެވެ. ނަމަވެސް ކޯވިޑްގެ ޙާލަތާ ގުޅިގެން މަސައްކަތްތަކަށް ލަސްވުމެއް އައުމަށްފަހު، މިހާރުދަނީ މަސައްކަތް ބާރު ސްޕީޑްގައި ކުރިއަށްގެންދަމުންނެވެ.
މި މަޝްރޫޢުގެ ދަށުން ތިމަރަފުށީގައި ތަރައްޤީކުރާ ރޯހައުސްތަކަކީ، 3 ކޮޓަރީގެ ގެތަކެވެ. އެގޮތުން މިގެތަކުގައި ތިން ކޮޓަރީގެ އިތުރުން ތިން ފާޚާނާ އާއި ސިިޓިންގްރޫމަކާއި ލޯންޑްރީ އޭރިއާއެއް ހިމެނެއެވެ. މިއިން ކޮންމެ ރޯ ހައުސްއެއް ހަދަނީ 1400 އަކަފޫޓުގެ ބިމެއްގައެވެ.
ހައުސިން މިނިސްޓްރީން މަޢުލޫމާތުދޭގޮތުގައި 100 ގޭގެ ފައުންޑޭޝަން މަސައްކަތާއި 95 ގެ ރޭނުމުގެ ހުރިހާ މަސައްކަތެއްވަނީ ނިމިފައެވެ. އަދި 80 ރޯހައުސް ހިޔާކުރުމުގެ މަސައްކަތްވެސްވަނީ މުޅިން ނިންމާފައެވެ.
ފެނާއި ނަރުދަމާ ނިޒާމަށް ބޭނުންވާ މަސައްކަތްތަކާއި ކަރަންޓު ވަޔަރިންގެ މަސައްކަތްތައްވެސް ގިނަ ގެތަކުގައި ވަނީ ފަށާފައެވެ. އަދި އެތެރެގޭ ފިނިޝިންގ މަސައްކަތްތައްވެސް މިހާރުވަނީ ފަށާފައެވެ. އެގޮތުން މުށިޖެހުމާއި ދޮރުހަރުކުރުމާއި ސީލިންގްގެ މަސައްކަތްތައްވެސް މިހާރުވަނީ ފަށާފައެވެ.
ހައުސިން މިނިސްޓްރީން ވިދާޅުވީ، ޖުމްލަކޮށް މަޝްރޫޢުގެ %60އަށްވުރެ ގިނަ މަސައްކަތް މިހާރު ނިމިފައިވާކަމަށެވެ. ހައުސިން ޔުނިޓްތަކުގެ ހުރިހާ މަސައްކަތެއް ކުރިއަށް އޮތް 3މަސް ދުވަހުގެ ތެރޭގައި ނިންމާނެ ކަމަށް ހައުސިންގ މިނިސްޓްރީން ވަނީ ވިދާޅުވެފައެވެ.
ތިމަރަފުށީގައި 100 ހައުސިން ޔުނިޓް އިމާރާތްކުރުމުގެ މަޝްރޫޢަކީ ސަރުކާރުން 79 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަސައްކަތެކެވެ.
އަތޮޅުތަކުގައި ބޯހިޔާވަހިކަން ފޯރުކޮށްދިނުމަށް ސަރުކާރުން ފުރަތަމަ ފެށި 6 ރަށުގެ މަޝްރޫޢުގެ ތެރެއިން ޅ.ނައިފަރުގައި ތަރައްޤީކުރި 100 ހައުސިން ޔުނިޓްގެ މަސައްކަތް މިހާރުވަނީ ޙައްގުވެރިންނާ ހަވާލުކޮށްފައެވެ. ތިމަރަފުށި ހިމެނޭހެން ބާކީ 5 ރަށުގެ ޢަމަލީ މަސައްކަތް ބާރު ސްޕީޑްގައި ދަނީ ކުރިއަށްގެންދަމުންނެވެ.
މީގެެއިތުރުން އިތުރު 8 ރަށުގެ ގެދޮރުވެރިކުރުވުމުގެ މަޝްރޫޢު ހިންގުމަށް އިޢުލާންކޮށް، އެކަމުގެ ޢަމަލީ މަސައްކަތް ކޮށްދޭނެ ބަޔަކު ހޯދުމަށް ފިނޭންސް މިނިސްޓްރީންވަނީ އިޢުލާންކޮށްފައެވެ. މީގެތެރޭގައި ފްލެޓް އިމާރާތްތަކާއި އަދި ރޯހައުސް ތަރައްޤީކުރުމުގެ މަޝްރޫޢު ހިމެނެއެވެ.