5 މިލިޔަން ގަސް މަޝްރޫއުން ސްކައުޓުންނަށް "ޓްރީ ގާޑިއަން" ބެޖު

ސަރުކާރުން ކުރިއަށްގެންދާ 5 މިލިޔަން ގަސް އިންދުމުގެ ގައުމީ މަޝްރޫއުގައި ދިވެހި ސުކައުޓުންގެ ބައިވެރިވުން އިތުރުކުރުމުގެ ގޮތުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއާއި ސުކައުޓް އެސޯސިއޭޝަން އޮފް މޯލްޑިވްސްއާ ދެމެދު މިއަދު ފަހުމުނާމާއެއްގައި ސޮއިކޮށްފިއެވެ.

މި އެއްބަސްވުމުގެ ދަށުން ސްކައުޓުންނަށް "ޓްރީ ގާޑިއަން ބެޖު" ހޯދުމުގެ ފުރުސަތު ފަހިވެގެން ދާނެއެވެ. ބެޖު އެކުލެވިގެންވަނީ މައިގަނޑު 5 ފިޔަވަޅެއްގެ މައްޗަށްކަމަށެވެ. ބެޖް ލިބޭނީ ގަސް އިންދުމަށްފަހު އެ ގަސް ދަސްކޮށް، ގަހުގެ ވަށައިގެންވާ މާހައުލު ދަސްކޮށް، ގަސް ބަލާ ބޮޑުކޮށް އަދި ވަޢުދު ފުރިހަމައަށް އަދާކުރުމުންނެވެ.

މި ހަފްލާގައި ވާހަކަފުޅު ދައްކަވަމުން މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު އަލީ ޝަރީފް ވިދާޅުވީ، ރައީސުލްޖުމްހޫރިއްޔާގެ 5 މިލިއަން ގަސް އިންދުމުގެ ވަޢުދަކީ މުޅި ރާއްޖެ ފެހިކުރުމުގެ މަތިވެރި ނިޔަތުގައި ކުރިއަށްގެންދެވޭ މަޝްރޫޢެއް ކަމަށެވެ. އަދި ސުކައުޓުން މިކަމަށް ދިން އިޖާބައަށް ވަޒީރު ވަނީ އިންތިހާއަށް ޝުކުރު އަދާކުރައްވާފައެވެ.

"މިކަމުގައި މިނިސްޓްރީއާއެކު ކިހިނެއްތޯ ތިބޭފުޅުންނަށް ކުރިއަށް ދެވޭނީ އަދި ސުކައުޓްގެ ފަރާތުން މިކަމަށް ކޮން ކަންތައްތަކެއްތޯ ކޮށްދެވޭނީ. ދެން ވަރަށް ރަނގަޅު އެއް ޕްރޮގްރާމް މިއީ އަޅުގަނޑުމެންނާ ވާހަކަ ދައްކައިގެން ބެޖެއްގެ ސިފައެއްގައި މިކަން ކުރެވޭނެ ގޮތަށް މިކަން ހަމަޖެހިސެވީމަ."
މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު އަލީ ޝަރީފް ވިދާޅުވިއެވެ.

މި ހަފްލާގައި ސުކައުޓް އެސޯސިއޭޝަންގެ ޗީފް ކޮމިޝަނަރ އިސްމާއިލް ރިފާޢު ވިދާޅުވީ މިއަދަކީ ދިވެހި ސުކައުޓުންގެ ތާރީޚުގައި ތިމާވެއްޓާ ގުޅޭ ވަރަށް މުހިންމު ފިޔަވަޅެއް އެޅިގެންދިޔަ ދުވަހެއް ކަމަށެވެ. އަދި މި މަޝްރޫޢުގެ ދަށުން ތަޢާރަފްކުރެވޭ "ޓްރީ ގާޑިއަން ބެޖު" އަކީ ހަމައެކަނި ގަހެއް އިންދާލުމުން ދެވޭ ބެޖެއް ނޫންކަމަށާއި، އެއީ ގަސް ބަލަހައްޓައި ދިގުމުއްދަތަކަށް އޭގެ ޒިންމާ ނެގުމުން ލިބޭ ބެޖެއްކަން ފާހަގަކުރެއްވިއެވެ.

"ގަސް އިންދުމަކީ އެންމެ ދުވަހަކުން ކޮށް ނިންމާލެވިދާނެ ކަމެއް. އެހެންނަމަވެސް، ގަސް ދިރުވާ ބޮޑުކޮށް، އެ ގަހުގެ ޒިންމާ އުފުލުމަކީ ދިގުމުއްދަތަކަށް ދެމިގެންދާ ވަރަށް ބޮޑު އަމާނާތެއް. މިއީ ސުކައުޓިންގެ އަސާސީ އުސޫލުތައް ކަމުގައިވާ ހިދުމަތްކުރުމާއި، ޒިންމާދާރުވުމާއި، އަމާނާތްތެރިކަމާއެކު އަމަލުން ތަފާތެއް ދެއްކުމާ ސީދާ ގުޅިފައިވާ ކަމެއް."

ރިފާޢު ވިދާޅުވީ މި ބެޖު އެކުލެވިގެންވަނީ މައިގަނޑު 5 ފިޔަވަޅެއްގެ މައްޗަށްކަމަށެވެ. އެގޮތުން ހަމައެކަނި ގަސް އިންދފާ؛ލުމުން ނިމުނީ ނޫންކަމަށާއި، ގަސް އިންދުމަށްފަހު އެ ގަސް ދަސްކޮށް، ގަހުގެ ވަށައިގެންވާ މާހައުލު ދަސްކޮށް، ގަސް ބަލާ ބޮޑުކޮށް އަދި ވަޢުދު ފުރިހަމައަށް އަދާކުރުން ހިމެނޭނެކަމަށެވެ.

ޓްރީ ގާޑިއަން ބެޖު އެކުލެވިގެންވާ އުމުރުފުރާތައް:

* 5 އަހަރާއި 11 އަހަރާ ދެމެދު: ގަހެއް އިންދައި، އެ ގަސް ހެދިބޮޑުވަމުންދާގޮތް ބަލައި ތިމާވެއްޓަށް ލޯބި އުފެއްދުން.
* 11 އަހަރާއި 12 އަހަރާ ދެމެދު: ގަހާ ބެހޭ މައުލޫމާތު ހޯދައި ދަސްކޮށް، 1 މަސްދުވަހު ގަސް ބެލެހެއްޓުން.
* 12 އަހަރާއި 18 އަހަރާ ދެމެދު: ގުރޫޕް ހަދައިގެން ރާއްޖެއަށް ޚާއްސަ ގަސްތައް އިންދައި، 2 މަހާއި 3 މަސްދުވަހުގެ މުއްދަތަކަށް ބެލެހެއްޓުން.
* 18 އަހަރާއި 26 އަހަރާ ދެމެދު: މަޝްރޫއުތައް ރާވައި، ލީޑުކޮށް، ހަނގު އުމުރުފުރާގެ މެންބަރުންނަށް އިރުޝާދުދީ، 3 މަހާއި 6 މަސްދުވަހާ ހަމައަށް ނަތީޖާ މޮނިޓަރ ކުރުން.

މި ޕްރޮގްރާމްގެ ދަށުން ގަސް އިންދާނެ ތަނާއި ގަސްތައް ފޯރުކޮށްދޭނީ މިނިސްޓްރީގެ ފަރާތުންނެވެ. މިއީ ކުދިންގެ ތެރޭގައި އަމިއްލަ ޒިންމާދާރުކަމާއި ލީޑަރޝިޕް އަދި ތިމާވެށީގެ ހޭލުންތެރިކަން އިތުރުކުރުމަށް އެޅުނު ވަރަށް މުހިންމު ބިންގަލެކެވެ. އަދި ރައީސުލްޖުމްހޫރިއަތާގެ 5 މިލިއަން ގަސް އިންދުމުގެ މަޝްރޫޢު ކުރިއަށް ގެންދިޔުމަށް ނެގުނު މުހިންމު ނިންމުމެކެވެ.