އެންމެ ރަނގަޅު މަސައްކަތެއްކޮށް، ލޯކަލް ކައުންސިލް ޕަރފޯމަންސް އިންޑެކްސްގެ އެންމެ މަތިން މާކްސް ހޯދައިގެން 2019ވަނަ އަހަރުގެ ކައުންސިލް އެވޯޑް "ރަނަހަމާންތި" ނިލަންދިއަތޮޅު އުތުރުބުރީ ނިލަންދޫ ކައުންސިލް، އަދި 2020ވަނަ އަހަރުގެ "ރަނަހަމާންތި" އެވޯޑް އަރިއަތޮޅު އުތުރުބުރީ ބޮޑު ފޮޅަދޫ ކައުންސިލުން ޙާސިލްކޮށްފިއެވެ. މި އެވޯޑް ރަށު ކައުންސިލްތަކާއި ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.
ލޯކަލް ގަވަމަންޓް އޮތޯރިޓީން ކައުންސިލްތަކަށް ދެމުންއަންނަ "ކަންގަތި އެވޯޑް"އަކީ ލޯކަލް ކައުންސިލް ޕަރފޯމަންސް އިންޑެކްސްގައި، އެންމެ މަތިން މާކްސް ހޯދަމުން އަންނަ ކައުންސިލްތަކަށް ދެމުންދާ އެވޯޑެކެވެ. މި އިންޑެކްސްގައި ބަލާ ކަންކަމުގެ ތެރޭގައި ލާމަރުކަޒީ ޤާނޫނަށް ޢަމަލުކުރުމާއި، ކައުންސިލްތަކުގެ ބައިވެރިވުމާއި ޒިމާތައް އަދާކުރުމުގެ މިންގަޑުތަކަށް ބަލައެވެ.
ކަންގަތި އެވޯޑްގައި ހިމެނެނީ އެންމަ ރަނގަޅު 3 އަތޮޅު ކައުންސިލަށްދޭ "ގަދަހަމާންތި ދަރަޖަ"، އެންމެ ރަނގަޅު 3 ރަށު ކައުންސިލަށް ދޭ "ރަނަހަމާންތި ދަރަޖަ"، އަދި މި އިންޑެކްސްގެ އެކި ބައިތަކުން އެންމެ މަތިން މަރކްސް ހޯދާ އަތޮޅު ކައުންސިލަށްދޭ "މާރަދަ"އެވޯޑް އަދި އަހަރުން އަހަރަށް ފަރަގު ބޮޑު ކުރިއެރުމެއް ހޯދާފައިވާ ކައުންސިލަށްދޭ "ކާންނާ" އެވޯޑެވެ.
2020ވަނަ އަހަރުގެ އެންމެ ރަނގަޅު ކައުންސިލް އެވޯޑް "ރަނަހަމާންތި" ހާސިލްކޮށްފައިވަނީ ނިލަންދިއަތޮޅު އުތުރުބުރީ ނިލަންދޫ ކައުންސިލްއިންނެވެ. އަދި 2020ވަނަ އަހަރުގެ "ރަނަހަމާންތި" އެވޯޑް ހާސިލްކުރީ އަރިއަތޮޅު އުތުރުބުރީ ބޮޑު ފޮޅަދޫ ކައުންސިލުންނެވެ.
މި ރަސްމިއްޔާތުގައި ވާހަކަދައްވަމަން ހޯމް މިނިސްޓަރ އަދި ލޯކަލް ގަވަމަންޓް އޮތޯރިޓީގެ ބޯޑުގެ ރައީސް ޢިމްރާން އަބްދުﷲ ވިދާޅުވީ، މި ސަރުކާރު އައިއިރު ކައުންސިލްތައް ތިބީ މަސައްކަތް ކުރެވޭނެގޮތެއް ނެތިފައިކަމަށެވެ. ކައުސިލްރުން ސަސްޕެންޑްކުރުމާއި، އަދި އެމީހުންގެ މުސާރަ ކުޑަކުރުންފަދަ އެތަށް ކަމެއް ހިމެނޭކަމަށެވެ.
"ނިޒާމު އަލުން އަނބުރާ ހަމަޔަކަށް އެޅިއްޖެ. ކައުންސިލްތަކަށް ކަންކަން މަގުފަހިކޮށްދެވިއްޖެ. ހިންގުމުގެ ބާރު އަނބުރާ ފޯރުކޮށްދެވިއްޖެ. މާލީ ތަނަަސްކަން ފޮރުކޮށްދެވިއްޖެ." އިމްރާން އަބްދުﷲ ވިދާޅުވިއެވެ.
މި ރަސްމިއްޔާތުގައި ލޯކަލް ގަވަމަންޓް އޮތޯރިޓީގެ ސީއީއޯ އަފްޝަން ލަތީފް ވިދާޅުވީ ކައުންސިލްތަކަކީ ރައްޔިތުންނާއި އެންމެ ގާތުން ބިނާކުރެވޭ ފަށަލަކަމަށެވެ. ކައުންސިލްތަކުގެ ކަންކަން ރަނގަޅުކުރުމަށް އެލްޖީއޭއާއި އަދި ކަމާގުޅުންހުރި އިދާރާތަކުން ގިނަ މަސައްކަތްކެއް ކުރަމުންދާކަމަށް އަފްޝަން ވިދާޅުވިއެވެ.
"އަދިވެސް ދަތިތަކާ ހުރަސްތައް އެބަހުރި. ލޭންޑް ޔޫސް ޕްލޭންގެ މަސައްކަތްކާއި، އާމްދަނީ ހޯދުމާއި އަދި ކުންފުނިތައް އުފެއްދުމުގެ ކަންކަމުގައި. ނަމަވެސް އެލްޖީއޭއާއި މިނިސްޓްރީތައް އަދި ރައްޔިތުންގެ މަޖިލީހުގެ ތެރެއިންވެސް މިދަނި މި ކަންކަމަށް ޙައްލު ހޯދައިދިނުމަށް މަސައްކަތް ކުރަމުން." އަފްޝަން ވިދާޅުވިއެވެ.
ރާއްޖޭގައި ލާމަރުކަޒީ ޤާނޫނު ތަސްދީޤުކޮށްފައިވަނީ 2010ވަަމަ އަހަރުއެވެ. އަދި ފުރަތަމަ ފަހަރަށް ކައުންސިލްތައް ހޮވާ ހުވާކޮށްފައިވަނީ 2011ވަނަ އަހަރުގެ ފެބްރުއަރީ 26ގައެވެ. ރާއްޖޭގެ ލާމަރުކަޒީ ދުވަސް ފާހަގަކުރަނީ މި ދުވަހަށް ނިސްބަތްކޮށެވެ.