ރައްޔިތުންނާއި ގުޅިގެން މުޖުތަމަޢުގައި ހުރި މައްސަލަތައް ޙައްލުކުރުމުގެ މަޤުސަދުގައި ކުރިއަށްގެންދާ "ހަފްތާރެސް" ޕްރޮގްރާމް ފުވައްމުލައް ސިޓީގައި ފަށައިފިއެވެ.
މިއަދު ރަސްމީކޮށް ޕްރޮގްރާމް ފަށާފައިވާއިރު ކުރިއަށް އޮތް 4 ދުވަހު މިޕްރޮގްރާމް ފުވައްމުލަކުގައި ކުރިއަށް ގެންދިޔުމަށް ވަނީ ހަމަޖެހިފައެވެ.
މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓްއާއި ނޭޝަނަލް ކައުންޓަރ ޓެރަރިޒަމް ސެންޓަރާއި ފުވައްމުލައް ސިޓީ ކައުންސިލް ގުޅިގެން ކުރިއަށްގެންދާ "ހަފްތާރެސް" ޕްރޮގްރާމަކީ މުޖުތަމަޢުގައި ހުންނަ މައްސަލަތައް ޙައްލުކުރުމަށް ކަމާ ގުޅޭ އިދާރާތައް ގުޅިގެން މަސައްކަތް ކުރެވޭނެ މާޙައުލެއް ޤާއިމުކުރުމަށް ކުރިއަށްގެންދާ ޕްރޮގްރާމެކެވެ.
މިޕްރޮގްރާމާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން ޔޫތް މިނިސްޓްރީގެ ސްޓޭޓް މިނިސްޓަރ ހުސެއިން އިސްމާޢިލް ވިދާޅުވީ ހަފްތާރެސް ޕްރޮގްރާމަކީ ޔޫތް މިނިސްޓްރީން ކުރިއަށްގެންދާ ކާމިޔާބު ޕްރޮގްރާމެއްކަމަށެވެ. އަދި ޕްރޮގްރާމް މިހާތަނަށް ބޭއްވި ރަށްރަށުން އަދިވެސް މިފަދަ ޕްރޮގްރާމްތައް ކުރިއަށްގެންގޮސް ދިނުމަށް އެދެމުންދާކަމަށެވެ.
"އަޅުގަނޑުމެން މިދިޔަ އަހަރުގެ ތެރޭގައި 4 އަތޮޅެއްގައި ކުރިއަށްގެންގޮސްފައިވާނެ. މިއަހަރު މި ޕްރޮގްރާމް މި ފެށީ ފުވައްމުލައް ސިޓީގައި. އަމާޒަކީ މިއަހަރުގެ ކުރިއަށް އޮތް ތަނުގައި ބާކީ ހުރި އަތޮޅުތަކުގައި ޕްރޮގްރާމް ކުރިއަށްގެންދިޔުން." ސްޓޭޓް މިނިސްޓަރ ވިދާޅުވިއެވެ.
މިޕްރޮގްރާމްގެ ތެރޭގައި އާމަން ވިލުންވެރި މުޖުތަމަޢެއް ބިނާކުރުމަށްޓަކާ ސިޓީގެ ކައުންސިލްގެ ވެރިންނާއި ފެމިލީ އެންޑް ސިލްޑްރެންސް ސަރވިސް ގެއިތުރުން ފުވައްމުލައް ސިޓީގެ އެކި އިދާރާތަކުގެ ވެރިންނާއި ސްކޫލްގެ ވެރިންނާއި މުދައްރިސުންނާއި ބެލެނިވެރިންނާއި ގުޅިގެން މަސައްކަތްކުރުމަށްވަނީ ހަމަޖެހިފައެވެ. އަދި ހަމައެއާއެކު ޒުވާނުންނަށް ކުރިމަތިވެފައިވާ އެކި މައްސަލަތަކާއި އެކަންކަން ޙައްލުކުރުމަށް ކުރެވިދާނެ ކަންކަމާއި ގުޅޭގޮތުން މަޝްވަރާކުރުމަށްވެސް ވަނީ ހަމަޖެހިފައެވެ. މީގެއިތުރުން ޒުވާނުންނަށް އަމާޒުކޮށްގެން ބާއްވާ ޔޫތް މާކެޓަކާއެކު ހަފްތާރެސްގެ ޢާއިލީ ހަވީރުވެސް އެކި ކުޅިވަރުތަކާއެކު ބޭއްވުމަށް ވަނީ ހަމަޖެހިފައެވެ.
ހަފްތާރެސް ޕްރޮގްރާމް އެންމެ ފުރަތަމަ ފަށާފައިވަނީ ޒުވާނުންނާ ގުޅޭ ވިޔަފާރިތަކަށް އަމާޒުކޮށް ނަމަވެސް މިހާރު ޕްރޮގްރާމަށް ބަދަލުތަކެއް ގެނެސްވަނީ މިއީ މުޅި މުޖުތަމަޢަށް ޚާއްސަ ޕްރޮގްރާމެއްގެ ގޮތުގައި ރާވާފައެވެ. އެންމެ ފުރަތަމަ މާލެއާއި ހުޅުމާލޭގެ އިތުރުން ވިލިމާލޭގައި ކުލަ ގަދަކޮށް ބޭއްވުމަށްފަހު އަތޮޅުތެރޭގައި ބާއްވަން ވަނީ ފަށާފައެވެ. އެގޮތުން މިހާތަނަށް ލ.އަތޮޅާއި ކުޑަހުވަދޫގައި ބާއްވާފައިވާއިރު ފުވައްމުލަކުގައި ކުރިއަށް މިގެންދަނީ ހަފްތާރެސްގެ 5 ވަނަ ޕްރޮގްރާމެވެ.