ނައިފަރުގައި ސަރުކާރުން ތަރައްޤީކޮށްފައިވާ 100 ހައުސިން ޔުނިޓަށް އެދި މިހާތަނަށް 500 އަށްވުރެ ގިނަ މީހުން ކުރިމަތިލައިފިއެވެ.
ނައިފަރުގައި 100 ހައުސިން ޔުނިޓް ތަރައްޤީކުރުމުގެ މަސައްކަތަކީ އަތޮޅުތަކުގައި ހައުސިން ޔުނިޓްތައް ތަރައްޤީކުރުމަށް ފަށާފައިވާ 6 މަޝްރޫޢުގެ ތެރެއިން އެންމެ ފުރަތަމަ ޢަމަލީ މަސައްކަތް ފެށި އެއް މަޝްރޫޢުއެވެ. މި މަސައްކަތް ފެށީ 2020ވަނަ އަހަރުގެ ކުރީކޮޅުއެވެ. ހައުސިން ޔުނިޓްތައް ތަރައްޤީކުރުމުގެ ޢަމަލީ މަސައްކަތް ނިންމާ، މިހާރު ކުރިއަށްދަނީ ޔުނިޓްތަކުގެ ހައްގުވެރިން ހޮވުމަށް ކުރަންޖެހޭ މަސައްކަތެވެ.
ފޯމްތައް އިވަލުއޭޓް ކުރުމުގެ މަސައްކަތް ކުރިއަށްގެންދަނީ ނައިފަރުން ހޮވާލާފައިވާ 11 މެންބަރުންގެ ކޮމިޓީއަކުންނެވެ. މީގެތެރޭގައި ކައުންސިލްގެ 4 މެންބަރުންނާއި ރައްޔިތުންގެ ތެރެއިން ހޮވާލާފައިވާ 4 މެންބަރުންނާއި، މުއައްސަސާތައް ތަމްސީލްކުރާ މެންބަރަކާއި އިދާރީ ދެ މެންބަރުން ހިމެނެއެވެ.
ޕީއެސް ނިއުސްއަށް މަޢުލޫމާތުދެއްވަމުން ނައިފަރު ކައުންސިލްގެ ރައީސް މުޙައްމަދު ރަޝީދު ވިދާޅުވީ، މިހާތަނަށް ގިނަ އަދަދެއްގެ މީހުން ފްލެޓަކަށް އެދި ފޯމް ހުށައަޅާފައިވާކަމަށެވެ. އަދި ފޯމްތަކުގެ މަޢުލޫމާތުގެ ސައްޙަކަން ދެނެގަތުމާއި އިވަލުއޭޓްކުރުމުގެ މަސައްކަތްތައް ފްލެޓް ކޮމިޓީން ފަށާފައިވާކަމަށެވެ.
"މިމަހުގެ 15 ވަނަ ދުވަހު ފޯމް ހުށައެޅުމުގެ މުއްދަތު ހަމަވަނީ. މިހާތަނަށް 500އަށްވުރެ ގިނަ މީހުން ފޯމް ހުށައަޅައިފި. ކައުންސިލްތަކަށް ގުޅާ، ފޯމްތައް އިވަލުއޭޓްކުރުން މިހާރުއެބަ ކުރިއަށްދޭ." ރަޝީދު ވިދާޅުވިއެވެ.
ކައުންސިލްގެ ރައީސް ވިދާޅުވީ މި ފަށާ ޖެނުއަރީމަހުގެ ފުރަތަމަ ހަފްތާގައި، ފްލެޓް ލިބޭ މީހުންގެ ދާއިމީ ލިސްޓް އިޢުލާންކުރާނެކަމަށެވެ.
ހައުސިންގ މިނިސްޓްރީން ވިދާޅުވީ، ޔުނިޓްތަކުގެ ކޮންސްޓްރަކްޝަން ހުރިހާ މަސައްކަތްތައް މިހާރު ނިމިފައިވާކަމަށެވެ. އަދި ސަރުކާރުން ފްލެޓްތަކާ ހަވާލުވުމުގެ ކުރިން ކުރިއަށްގެންދާ އިންސްޕެކްޝަން، ފްލެޓްތަކަށް ޒިޔާރަތްކޮށް ކުރިއަށް ގެންގޮސްފައިވާކަމަށެވެ. މިނިސްޓްރީން މަސައްކަތްކުރަމުން ދަނީ ޔުނިޓްތައް އަންނަ މަހުގެ ތެރޭގައި އާއްމުންނަށް ދިރިއުޅުމަށް ދޫކުރުމަށެވެ.
ނައިފަރުގެ ރެޖިސްޓަރޑް އާބާދީ 5000އިން މައްޗަށް އަރައެވެ. އަދި އެ ރަށުގައި ދިރިއުޅޭ އާބާދީ 6000އިން މައްޗަށް އަރައެވެ.
"ރަށުގައި ބޯހިޔާވަހިކަމުގެ މައްސަލަ ބޮޑު. 15-16މީހުން ގެއެއްގަ އެބައުޅޭ. އެބަހުރި 30އަށްވުރެ ގިނަ މީހުން އެއް ގެއެއްގައި ދިރިއުޅޭ އާއިލާތައްވެސް." ރަޝީދު ވިދާޅުވިއެވެ.
ނައިފަރުގައި ތަރައްޤީކޮށްފައިވަނީ ތިން ފަންގިފިލާގެ 3 އިމާރާތާއި، ހަތަރު ފަންގިފިލާގެ 1 އިމާރާތެވެ. މީގެތެރޭގައި 3 ފަންގިފިލާގެ ކޮންމެ އިމާރާތެއްގައި 24 އެޕާޓްމަންޓާއި، 4 ފަންގިފިލާގެ އިމާރާތުގައި ހަދާ 28 އެޕާޓް ހިމެނެއެވެ.
މިއީ 100 ހައުސިންގ ޔުނިޓެވެ. ނައިފަރުގައި 100ހައުސިންގ ޔުނިޓް އިމާރާތްކުރުމުގެ މަޝްރޫޢަކީ ސަރުކާރުން 72.2 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.
ނައިފަރުން ބޯހިޔާވަހިކަމަށް އެންމެ ފަހުން ބިން ދޫކޮށްފައިވަނީ 2012ވަނަ އަހަރުއެވެ. އެއީ 2004ވަނަ އަހަރު އެރަށުން ހިއްކާފައިވާ 16ހެކްޓަރުގެ ބިމުގެ ސަރަޙައްދުންނެވެ. އޭގެފަހުން މިހާތަނަށް އެރަށުގައި ބޯހިޔާވަހިކަމަށް ބިން ދޫކޮށްފައެއް ނުވެއެވެ.