ޚިދުމަތްތެރިޔާ ސަޢީދު އަވަހާރަވުމާ ގުޅިގެން ރައީސްގެ ތަޢުޒިޔާ

ދަތުގެ ފަރުވާގެ ޚިދުމަތްތެރިޔާ ޢަބްދުﷲ ސަޢީދު އަވަހާރަވުމުން ރައީސް ތަޢުޒިޔާ ވިދާޅުވެއްޖެއެވެ.

މީސްމީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، ދަތުގެ ފަރުވާ ދެއްވުމުގައި މުޅި ރާއްޖެއަށް މަޤުބޫލުވި ޚިދުމަތްތެރިޔާ ޢަބްދުﷲ ސަޢީދު (ދަތްޖަހާ ސަޢީދު) އަވަހާރަވުމަކީ ޤައުމަށް ލިބުނު ވަރަށް ބޮޑު ހިތާމައެއްކަމަށެވެ. އަބްދުﷲ ސަޢީދުއަކީ ދިގު މުއްދަތެއްގައި ޞިއްޙީ ޚިދުމަތުގައި އުޅުއްވި ބޭފުޅެކެވެ. އޭނާއަކީ ދިވެހި މަސައްކަތްތެރިކަމުގެ އެކި ފަންނުތަކުގައިވެސް ބޮޑެތި ކާމިޔާބީތަކެއް ހާސިލު ކުރައްވައިފައިވާ ހުނަރުވެރިއެއްކަން ރައީސް ފާހަގަކުރެއްވިއެވެ. ދަތުގެ ފަރުވާގެ ދާއިރާއަށް ސަޢީދުކުރެއްވި ޚިދުމަތްތައް ފާހަގަކޮށް މިދިޔަ ޖުލައި މަހު ސަރުކާރުންވަނީ އޭނާއަށް ޚާއްސަ އެވޯޑެއްވެސް އަރުވާފައެވެ.

"މާތްﷲގެ ރަޙްމަތާއި އޯގާވަންތަކަމުގައި، އަދި ސުވަރުގޭގެ ދާއިމީ ނިޢުމަތުގައި މަރްޙޫމް ޢަބްދުﷲ ސަޢީދު ލަހައްޓަވާށި! އާމީން" ރައީސް ޑރ.މުޢިއްޒުގެ މެސެޖުގައި ލިޔުއްވާފައިވެއެވެ.

ސަޢީދު އަވަހާރަވިއިރު އުމުރުން 89 އަހަރެވެ. ސަޢީދު އަވަހާރަވީ ނޭވާލާން އުނދަގޫވެގެން އައިޖީއެމްއެޗަށް ގެންގޮސް އެ ހޮސްޕިޓަލުގައި ފަރުވާދެމުންދަނިކޮށް ހާޓްއެޓޭކެއް ޖެހިގެން ރޭ ދަންވަރުގެ ވަގުތެއްގައެވެ. އޭނާގެ ކަށުނަމާދު އޮތީ މިއަދުގެ މެންދުރު ނަމާދަށް ފަހު އާސަހަރާ މިސްކިތުގައެވެ.

ސައީދަކީ 1986 ވަނަ އަހަރުން ފެށިގެން ރާއްޖޭގައި ދަތުގެ ފަރުވާދިނުމުގައި ހަރަކާތްތެރިވެވަޑައިގެންނެވި ސަޢީދަކީ ދަތް އުފުރުމާއި ދަތްޖެހުމުގެ މަސައްކަތުގައި ބޮޑު މަޤްބޫލުތަކެއް ހޯއްދަވާފައިވާ ބޭފުޅެކެވެ. ޑެންޓިސްޓުންގެ ޚިދުމަތް ރާއްޖެއަށް ލިބުމުގެ ކުރިން، އާންމުންނަށް ދަތުގެ ފަރުވާ ހޯއްދަވާދެއްވުމުގައި އޭނާ ވަނީ ފާހަގަކޮށްލެވޭ ފަދަ މަސައްކަތްތަކެއް ކުރައްވާފައެވެ. އެގޮތުން އޭނާވަނީ ރަން ދަތް ޖަހާދެއްވުން ފަދަ ތަފާތު މަސައްކަތްތަކެއް ކުރައްވާފައެވެ.

މީގެއިތުރުން އެ ދާއިރާއިން ތަޢުލީމު ޙާސިލްކުރެއްވުމަށްފަހު، ސަރުކާރުގެ ހޮސްޕިޓަލުތަކުގައި ދަތުގެ ފަރުވާދެއްވުމުގައި ގާތްގަނޑަކަށް 50 ވަރަކަށް އަހަރުދުވަހު ސަޢީދު ޚިދުމަތްކުރެއްވިއެވެ. އޭނާ ރިޓަޔަރކުރެއްވީ 2009ވަނަ އަހަރެވެ.

ދަތުގެ ފަރުވާގެ އިތުރުން އަތްތެރިަކަމާއި، ކަނބުރުވެރިކަމާއި. ލިޔެލާޖެހުމުގެ މަސައްކަތްކުރުމުގައިވެސް އޭނާ އަކީ އާދަޔާއި ޚިލާފު ހުނަރުވެރި ބޭފުޅެކެވެ. އެގޮތުން، 1972 ވަނަ އަހަރު ކުއީން އެލިޒަބަތު ދެވަނަ ރާއްޖެއަށް ކުރެއްވި ޒިޔާރަތުގައި ސަޢީދު ތައްޔާރުކުރައްވާފައިވާ ޚާއްސަ ގަހަނާ ސެޓެއް އެކަމަނާއަށް ވަނީ އަރުވާފައެވެ. އަދި ޤައުމީ އުފެއްދުންތެރިކަމުގެ މަޢުރަޒުން ތަކުރާރުކޮށް 1ވަނަ ޚާސިލްކުރައްވާފައިވެއެވެ.