ފާދިއްޕޮޅު ނައިފަރުން މިއަދު މެންދުރުން ފެށިގެން ކަރަންޓް ކެނޑިފައިވަނީ، އެރަށު މަގުމަތީ ބައްތި ޖެހުމުގެ މަސައްކަތް ކުރިއަށްގެންދަނިކޮށް ދިމާވި ހާދިސާއަކާ ގުޅިގެންކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ.ފެނަކަ ކޯޕަރޭޝަނުން މިރޭ ނެރުއްވި ބަޔާނުގައި ނައިފަރުން ކަރަންޓް ކެނޑުމަށް މެދުވެރިވި ސަބަބު ކަމުގައި ފާހަގަކުރެވިފައިވަނީ، ލޯކަލް ގަވަރމަންޓް އޮތޯރިޓީން އެރަށުގައި މަގުމަތީ ބައްތި ޖެހުމުގެ މަސައްކަތް ހަވާލުކޮށްފައިވާ ފަރާތުން " އާރތް ރޮޑް " ނައިފަރުގައި ކަރަންޓް ދިނުމަށް އަޅާފައިވާ " އެޗް.ވީ ކޭބަލް " މައްޗަށް ޖެހުމާއި ގުޅިގެންކަމަށެވެ. ފެނަކައިން ވިދާޅުވީ މި " އާރތް ރޮޑް " އެޗްވީ ކޭބަލް މައްޗަށް ޖެހުމުގެ ސަބަބުން ކޭބަލް ދެ ފަރާތަށް ބުރިވެފައިވާކަމަށެވެ.ފެނަކަ ކޯޕަރޭޝަނުން ވިދާޅުވީ މިމަސައްކަތް ކުރާ ފަރާތުން ނައިފަރު އިންޖީނުގެއާ މަޝްވަރާކުރަމުން ދިޔަނަމަވެސް، މިއަދު އާތް ރޮޑް ޖެހުމުގެ މަސައްކަތް ކުރިއަށް ގެންގޮސްފައިވަނީ އިންޖީނުގެއާ މަޝްވަރާނުކޮށްކަމަށެވެ.ފެނަކައިން ވިދާޅުވީ ބުރިވެފައިވާ ކޭބަލް ގުޅުވުމަށް ބޭނުންވާ ތަކެތި ލޯންޗެއްގައި މިހާރު ނައިފަރަށް ފުރުވާލާފައިވާކަމަށެވެ. އަދި އެތަކެތި ނައިފަރަށް ދިއުމާއެކު އެމައްސަލަ ހައްލުކުރުމުގެ މަސައްކަތް ވަގުތުން ފަށައި، ލަސްތަކެއް ނުވެ ނައިފަރަށް ކަރަންޓުގެ ޚިދުމަތް ފޯރުކޮށްދެވޭނެކަމަށެވެ.މީގެ އިތުރުން ގއ ވިލިގިނލީގައި ކަރަންޓް ފޯރުކޮށްދިނުމަށް ބޭނުންކުރާ 800 ކިލޯވޯޓްގެ ޖަނަރޭޓަރަށް ދިމާވި މައްސަލައަކާ ގުޅިގެން، ޕީކް ގަޑިތަކުގައި ވިލިގިނލިން ކަރަންޓް ކެނޑެމުންދާ މައްސަލައަށްވެސް ހައްލެއް ހޯދުމަށް މަސައްކަތް ކުރަމުންދާކަމަށް ފެނަކައިން ވިދާޅުވެއެވެ. މިގޮތުން އިންޖިނިއަރުންގެ ޓީމަކުން މިމައްސަލަ ހައްލުކުރުމުގެ މަސައްކަތް ކުރިއަށްދާއިރު، ކުރިއަށް އޮތް ދެތިން ދުވަސްތެރޭގައި މިމައްސަލައަށް ދާއިމީ ހައްލެއް ލިބިގެންދާނޭކަމަށް އިންޖިނޭރުންނާ ހަވާލާދެއްވާ ފެނަކައިން ވިދާޅުވެއެވެ.ފެނަކަ ކޯޕަރޭޝަނުން ވިދާޅުވީ، މިމައްސަލަތައް މިހެން ދިމާވުމުން، މިކަމުގެ މައުލޫމާތު ހޯއްދެވުމުގެ ގޮތުން ރައީސުލްޖުމްހޫރިއްޔާ ގުޅުއްވާ، ކަންބޮޑުވުން ފާޅުކޮށް، އެމަނިކުފާނު ދެއްވި އިރުޝާދާ ލަފާފުޅައް ޝުކުރު އަދާކުރައްވާކަމަށެވެ.