ޅ.ނައިފަރުގައި ތަރައްޤީކުރި 100ހައުސިންގ ޔުނިޓްގެ ޢަމަލީ މަސައްކަތް ނިމިފައިވާ ކަމަށް އެ މަސައްކަތުގެ ކޮންޓްރެކްޓަރ ރަޝީދު ކާޕެންޓްރީ އެންޑް ކޮންސްޓްރަކްޝަންއިން ބުނެފިއެވެ. މި ޔުނިޓްތައް ސަރުކާރާ ހަވާލުކުރާނީ މިިނިސްޓްރީ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރގެ އިންސްޕެކްޝަނަށް ފަހުއެވެ.
ޅ.ނައިފަރުގެ އާބާދީ މިހާރު އުޅެނީ 5400އިން މަތީގައެވެ. އާބާދީ އިތުރުވެ ރަށުގެ ރައްޔިތުންނަށް މިވަގުތު ކުރިމަތިވެފައިވާ އެންމެ ބޮޑު އިޖުތިމާޢީ މައްސަލައަކީ ގެދޮރުގެ ދަތިކަމުގެ މައްސަލައެވެ. އެއް ގެއެއްގައި އެތައް އާއިލާއެއް ދިރިއުޅެމުން އާދެއެވެ.
ބޯހިޔާވަހިކަމުގެ މައްސަލައަށް ލުޔެއް ހޯދައިދިނުމަށް އެރަށުގައި ސަރުކާރުން 100ހައުސިންގ ޔުނިޓް އެޅުމުގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަންއާ ހަވާލުކޮށްގެން ފެށީ 2020ވަނަ އަހަރުގެ ކުރީކޮޅެއެވެ.
100ހައުސިންގ ޔުނިޓް އަޅާފައިވަނީ ނައިފަރުގެ ހިއްކިބިން ސަރަޙައްދުގައެވެ. ޑިޒައިން އެންޑް ބިލްޑް އުސޫލުން އާރް.ސީ.ސީން ކުރިއަށްގެންދިޔަ ޕްރޮޖެކްޓްގެ ހުރިހާ މަސައްކަތްތައް މިހާރު ނިމިފައިވާކަމަށް އެ ކުންފުނިންވަނީ ބުނެފައެވެ.
މި މަސައްކަތާ ގުޅޭގޮތުން މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ވިދާޅުވީ ފްލެޓްތަކުގެ ހުރިހާ މަސައްކަތްތައް ނިމިފައިވާކަން ކޮންޓްރެކްޓަރު އަންގާފައިވާކަމަށެވެ. މިނިސްޓްރީއާ ފްލެޓްތައް ހަވާލުކުރުމުގެ ކުރިން ހަދަންޖެހޭ އިންސްޕެކްޝަންތަކުގެ މަސައްކަތް ވަރަށް އަވަހަށް ކުރިއަށްގެންދާނެ ކަމަށް މިނިސްޓްރީން ވިދާޅުވެއެވެ. ހައުސިންގ ޔުނިޓްތައް ސަރުކާރާ ހަވާލުކުރާނީ މި އިންސްޕެކްޝަންތަކަށް ފަހުއެވެ.
މިމަޝްރޫޢުގެ ދަށުން ނައިފަރުގައި ތިން ފަންގިފިލާގެ 3 އިމާރާތާއި، ހަތަރު ފަންގިފިލާގެ 1 އިމާރާތްވަނީ ތަރައްޤީކޮށްފައެވެ. މީގެތެރޭގައި ހިމެނެނީ 3 ފަންގިފިލާގެ ކޮންމެ އިމާރާތެއްގައި 24 އެޕާޓްމަންޓާއި، 4 ފަންގިފިލާގެ އިމާރާތުގައި ހަދާ 28 އެޕާޓްމަންޓެވެ. މިއީ 100 ހައުސިންގ ޔުނިޓެވެ.
މިމަޝްރޫޢުގެ މަސައްކަތްތަކުގެ ތެރޭގައި ހިމަނައިގެން، ޅ.އަތޮޅު މާފިލާފުށިން ނައިފަރަށް ބަދަލުކުރި އާއިލާއަކަށް ގެއެއް އިމާރާތްކޮށްދިނުމުގެ މަސައްކަތްވެސްދަނީ ކުރަމުންނެވެ.
ނައިފަރުގައި 100ހައުސިންގ ޔުނިޓް އިމާރާތްކުރުމުގެ މަޝްރޫޢަކީ ސަރުކާރުން 72.2މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.
ނައިފަރުން ބޯހިޔާވަހިކަމަށް އެންމެ ފަހުން ބިން ދޫކޮށްފަވަނީ 2012ވަނަ އަހަރުއެވެ. އެއީ 2004ވަނަ އަހަރު އެރަށުން ހިއްކާފައިވާ 16ހެކްޓަރުގެ ބިމުގެ ސަރަޙައްދުންނެވެ. އޭގެފަހުން މިހާތަނަށް އެރަށުގައި ބޯހިޔާވަހިކަމަށް ބިން ދޫކޮށްފައެއް ނުވެއެވެ.
އިޖްތިމާޢީ ބޯހިޔާވަހިކަން ފޯރުކޮށްދިނުމުގެ މަސައްކަތުގެ ދަށުން، ހައުސިންގ ޔުނިޓް އިމާރާތްކުރުމުގެ 6 މަޝްރޫޢެއް އަތޮޅުތަކުގައި ފަށައިގެންދަނީ ކުރިއަށްގެންދަމުންނެވެ. މި 6 މަޝްރޫޢުގެ ތެރެއިން އެންމެ ފުރަތަމަ މަސައްކަތް ފެށި އެއް ރަށަކީ ޅ.ނައިފަރެވެ.