އައްޑު އަތޮޅު ހުޅުދޫގެ މަގު ހެދުމުގެ މަޝްރޫއުގެ ދެވަނަ ފިޔަވަހީގެ އަމަލީ މަސައްކަތް ރަސްމީކޮށް ފަށައިފިއެވެ.މި މަސައްކަތް ފައްޓަވައިދެއްވީ، އިކޮނޮމިކް މިނިސްޓަރ މުހައްމަދު ސައީދެވެ. އައްޑުއަތޮޅު ހުޅުދޫ މަގު ހެދުމުގެ މަޝްރޫއުގެ ދެވަނަ ފިޔަވަހީގެ މަސައްކަތް ސަރުކާރުން ހަވާލުކުރައްވާފައިވަނީ އެމްއާރުޑީސީއާއެވެ.ހުޅުދޫ މަގުހެދުމުގެ މަޝްރޫއު ދެވަނަ ފިޔަވަހި ފައްޓަވައިދެއްވަމަށް ބޭއްވި ހަފްލާގައި ވާހަކަފުޅު ދައްކަވަމުން އިކޮނޮމިކް މިނިސްޓަރ މުހައްމަދު ސައީދު ވިދާޅުވީ ސަރުކާރުން ދަނީ ރާއްޖޭގެ ހުރިހާ ރަށެއްގައިވެސް ތަރައްގީގެ އެކި މަޝްރޫއުތައް ކުރިއަށް ގެންދަމުންކަމުގައެވެ. އެގޮތުން އައްޑު އަތޮޅުގައިވެސް މިހާރު ގިނަ މަޝްރޫއުތަކެއް ކުރިއަށްދާކަން މިނިސްޓަރ ފާހަގަކުރެއްވިއެވެ.ހުޅުދޫ މަގު ހެދުމުގެ މަޝްރޫޢު އެއްކޮށް ނިންމާލާއިރު މުޅި ރަށުގެ ހުރިހާ މަގެއްވެސް ހުންނާނީ ޒަމާނީ ފެންވަރަށް ހެދިފައިކަމަށް ހުޅުމީދޫ ދާއިރާގެ ކައުންސިލްގެ ރައީސް ޢަލީ މުޙައްމަދު ވިދާޅުވިއެވެ. ހުޅުދޫގެ މަގުތަކަކީ ދުއްވާ އެއްޗެހި ދުއްވުމަށް އުނދަގޫ މަގުތަކެއްކަމަށާއި ވާރޭ ވެހިއްޖެނަމަ ފެންބޮޑުވުމުގެ އުދަގޫތަކާއި ކުރިމަތިވާކަމަށް އެރަށުގެ ބައެއް ރައްޔިތުން ވަނީ ފާހަގަކޮށްފައެވެ. ނަމަވެސް މަގު ހެދުމުގެ މަޝްރޫއާއި އެކު އުއްމީދުތައް އާވެފައިވާކަމަށް މިރަށުގެ ބައެއް ރައްޔިތުން ފާހަގަކުރެއެވެ.ހުޅުދޫ މަގު ހެދުމުގެ ދެވަނަ ފިޔަވަހީގެ މަސައްކަތް އެމްއާރުޑީސީއާއި ހަވާލުކޮށްފައިވަނީ އެގާރަ މިލިއަން ރުފިޔާއަށެވެ. މި ފިޔަވަހީގައި ހުޅުދޫގެ ބޮޑު ހަތަރު މަގެއްގައި ގާއެޅުމަށް ހަމަޖެހިފައިވާކަމަށް އެމްއާރުޑީސީން މައުލޫމަތުދެއެވެ. މި މަސައްކަތް އެއްކޮށް ނިންމަން ހަމަޖެހިފައިވަނީ 159 ދުވަސް ތެރޭގައެވެ.