ހއ، ހދ، ށ މި 3 އަތޮޅުގެ ޖަމްޢިއްޔާތަކަށް އަމާޒްކޮށްގެން ހއ.އިހަވަންދޫގައި ބޭއްވި މަހާސިންތާ ނިއްމާލައިފިއެވެ.
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން އިންތިޒާމުކޮށްގެން ބޭއްވި މި މަހާސިންތާގައި ތިން އަތޮޅުގެ 30 ޖަމިއްޔާއަކުން ޖުމްލަ 35 ފަރާތެއް ބައިވެރިވެފައިވާ، މި މަހާ ސިންތާގެ ބައިވެރިން ފާހަގަކުރި ގޮތުގައި މި މަހާސިންތައިން ވަރަށް އަގުހުރި މަޢުލޫމަތުތަކެއް ލިބުނެވެ. ބައިވެރިން އެދެނީ ޖަމްޢިއްޔާތަކަށް އަމާޒުކޮށްގެން މިފަދަ މަހާސިންތާތައް ކައިރިކައިރީގައި ކުރިއަށް ގެންދެވުންކަންވެސް ބައިވެރިން ފާހަގަކުރެއްވިއެވެ. މިމަހާސިންތާ ޚާއްސަކުރި 3 އަތޮޅުގެ އިތުރުން ވާރޗުއަލްކޮށް މި މަހާސިންތާގައި ބައިވެރިވުމުގެ ފުރުޞަތު ޢާއްމުކޮށް މުޅިރާއްޖެއަށް އޮތީ ހުޅުވާލާފައެވެ.
މި މަހާސިންތާގެ ތެރޭގައި ބައިވެރިންނަށް، "ހަށިހެޔޮ ދުޅަހެޔޮ" މިނަމުގައި ކަސްރަތު ޕްރޮގްރާމެއްވެސް ވަނީ ކުރިއަށް ގެންގޮސްފައވެ. ހއ.އިހަވަންދޫ ސްކޫލްގެ ސީނިޔަރ މެނޭޖްމެންޓާއި ޓީޗަރުންނާއި އަދި ޕީ.ޓީ.އޭއަށް އަމަޒުކޮށްގެން ކަސްރަތާއި ދުޅަހެޔޮކަމާ ގުޅޭގޮތުން މަޢުލޫމާތު ދިނުމުގެ ސެޝަންތަކެއްވެސް ކުރިއަށް ގެންގޮސްފައިވެއެވެ. އަދި މުޖުތަމުއުގެ ފަރުދުންގެ މެދުގައި ގުޅުން ބަދެހިކުރުމުގެ މަގުޞަދުގައި ގިނަބަޔަކަށް ބައިވެރި ވެވޭނެހެން ކުޑަކުދިންގެ ހަވީރެއްވެސްވަނީ ބާއްވާފައެވެ.
މި މަހާސިންތާއަކީ ސިލްސިލާކޮށް މުޅި ރާއްޖޭގެ އެކިހިސާބުތަކުގައި ބޭއްވުމަށް ނިންމަވައިގެން ކުރިއަށް ގެންދިޔަ ފުރަތަމަ ބުރުކަމަށް ޔޫތު މިނިސްޓްރީން ވިދާޅުވިއެވެ. މި މަހާސިންތާގެ ދެވަނަ ބުރު ބޭއްވުމަށް ހަމަޖެހިފައިވަނީ ޅ.އަތޮޅުގައި ކަމަށްވެސް ޔޫތު މިނިސްޓްރީން ވަނީ ހާމަކުރައްވާފައެވެ.
މި މަހާސިންތާގެ މަޤުޞަދަކީ ހަރުދަނާ މުޖުތަމަޢެއް ބިނާކުރުމަށް ބޭނުންވާ ކަންކަން ދެނެގަތުމާއި ،ޤައުމީ ތަރައްޤީއާއި ހެޔޮވެރިކަމާއި އިޖުތިމާޢީ ތަފާތު މައްސަލަތަކުން އަރައިގަތުމުގައި ޖަމްޢިއްޔާތަކުގެ ދައުރާއި ގުޅޭގޮތުން ހޭލުންތެރިކުރުވުމެވެ. އިތުރުކޮށް، މަދަނީ ޖަމްޢިއްޔާތައް ހިންގުމުގައި ހުރި ދަތިތަކާއި ގޮންޖެހުންތައް ދެނެގަނެ، ޖަމްޢިއްޔާތަކާ ގުޅިގެން މަސައްކަތްކުރުމަށް ބާރުއެޅުމެވެ،
ޔޫތު މިނިސްޓްރީގެ ފަރާތުން މި މަހާސިންތާ ކުރިއަށްގެންދިޔައީ ހއ، ހދ، އަދި ށ، މިއަތޮޅުގެ އަތޮޅު ކައުންސިލްތަކާއި، އިހަވަންދޫ ކައުންސިލާއި، އިހަވަންދޫ މަސްވެރިންގެ ގުޅުން (އިމަގު)އާއި ޔޫ.އެން.ޑީ.ޕީއާއި ނޭޝަނަލް ކައުންޓަރ ޓެރަރިޒަމް ސެންޓަރާއި އޫރިދޫ، ބިއުރޯ އޮފް ސްޓެޓިސްޓިކްސް އަދި މޯލްޑިވްސް ޕޮލިސް ސަރވިސް އާއި ގުޅިގެންނެވެ.
މި މަހާސިންތާ ކުރިޔަށް ގެންގޮސްފައިވަނީ މިމަހުގެ 24އިން 27ގެ ނިޔަލަށެވެ.