ޅ.ހިންނަވަރުގައި ޤާއިމްކުރައްވާ ފެނުގެ ނިޒާމްގެ ޢަމަލީ މަސައްކަތް ފަށްޓަވައިފިއެވެ.މިކަމަށްޓަކައި މިއަދު ހިންނަވަރުގައި ވަނީ ޚާއްޞަ ރަސްމިއްޔާތެއް ބާއްވަވާފައެވެ. މި މަޝްރޫއުގެ ޢަމަލީ މަސައްކަތް ފަށްޓަވައިދެއްވީ، އެންވަޔަރަމަންޓް މިނިސްޓަރ ޠާރިޤް އިބްރާހީމްއެވެ. ހިންނަވަރު ފެނުގެ ނިޒާމްގެ ޢަމަލީ މަސައްކަތް ފަށްޓަވައިދެއްވުމަށްފަހު ވާހަކަފުޅު ދައްކަވަމުން އެންވަޔަރމަންޓް މިނިސްޓަރ ތާރިޤް އިބްރާހީމް ވިދާޅުވީ، 58 މިލިއަން ރުފިޔާގެ މި މަޝްރޫޢަކީ ވަރަށް ފުޅާކޮށް ކުރިއަށް ގެންދަވާ މަޝްރޫއެއް ކަމަށެވެ. އަދި މި މަޝްރޫއު ކާމިޔާބުކަމާއެކު ކުރިއަށް ގެންދިއުމަށް ރައްޔިތުންގެ އެއްބާރުލުން ވަރަށް ބޮޑަށް ބޭނުންވާކަމަށް މިނިސްޓަރ ވިދާޅުވިއެވެ.މި ރަސްމިއްޔާތުގައި ޔޫ.އެސް.އެއިޑްގެ ފަރާތުން ވާހަކަފުޅު ދައްކަވަމުން މިސްޓަރ ރީޑް އޭޝް ލިމަން ވިދާޅުވީ، ތިމާވެއްޓާމެދު އެމެރިކާ ސަރުކާރުން ވަރަށް ބޮޑަށް އަހަންމިއްޔަތުކަން ދޭ ކަމަށާއި، ހިންނަވަރުގައި ޤާއިމްކުރާ ފެނުގެ ނިޒާމަކީވެސް މިކަމުގެ ހެއްކެތް ކަމަށެވެ. ހިންނަވަރު ކައުންސިލުގެ ރައީސް ވިދާޅުވީ، މިއީ ރަށުގެ ރައްޔިތުންގެ ޞިއްޙީ ދުޅަހެޔޮކަމާއި، ވަރަށް ބޮޑަށް ގުޅިފައިވާ މަޝްރޫއެއް ކަމަށެވެ.ޔޫ.އެސް އެއިޑްގެ ހިލޭ އެހީގައި ޔުނޮޕްސްއިން ޅ.ހިންނަވަރުގައި ޤާއިމްކުރައްވާ ފެނުގެ ނިޒާމަކީ، 3.76 މިލިއަން ޑޮލަރުގެ މަޝްރޫޢެކެވެ. މި މަޝްރޫއު ޙަވާލުކުރައްވާފައިވަނީ، ހިޓާޗީ އެކުއަރ ކޮމްޕެނީ ޕްރައިވެޓް ލިމިޓެޑާއެވެ.