"ރާއްޖެ ޓްރާންސްޕޯޓް ލިންކް" - ފެރީގެ ޓެސްޓު ދަތުރުތައް ފަށައިފި

ހައި ސްޕީޑް ފެރީ ނިޒާމުން ރާއްޖޭގެ ރަށްތައް ގުޅާލުމަށް ބަނދެފައިވާ ފުރަތަމަ ފެރީގެ ޓެސްޓު ދަތުރުތައް ފަށައިފިއެވެ. ފެރީތަކަށް ނަން ދީފައިވަނީ ރާއްޖެ ޓްރާންސްޕޯޓް ލިންކް (އާރްޓީއެލް)ގެ ނަމުންނެވެ.

"އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް"ގައި ބޭނުންކުރާ ފެރީތައް ބަނުމުގެ މަސައްކަތް ކުރިއަށްގެންދަނީ ގަލްފް ކްރާފްޓް މޯލްޑިވްސްއިންނެވެ.

އެގޮތުން ބަނދެފައިވާ ފުރަތަމަ ފެރީ ލޯންޗު މޫދަށް ބާލާފައިވަނީ މިދިޔަ މަހުގެ 25ވަނަ ދުވަހުއެވެ. އަދި އިންޖީނު ބަހައްޓާ ފެރީގެ ޓެސްޓު ދަތުރުތައް ފެށުމަށްފަހު ފެރީގެ ފުރަތަމަ ދަތުރު ކާމިޔާބުކަމާއެކުވަނީ ކޮށްފައެވެ. ޓެސްޓު ދަތުރުތައް ހަފްތާއަކަށް ކުރިއަށްދާނެ ކަމަށް ފެރީ ނެޓްވަރކް ހިންގަން ހަވާލުކޮށްފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީން ވިދާޅުވެއެވެ.

Test trials of the first vessel of Integrated National Public Ferry Network is ongoing. Thanks to @MoNPHImv for your guidance during this process & Thanks to @gulfcraft Maldives for the dedicated commitment & assistance for MTCC to make this project a success. #MTCCSpeedFerry pic.twitter.com/HsPQ3IrgyB

— MTCC Plc (@MTCCPlc) October 3, 2021

ފެރީތައް ބަނުމުގެ މާސް ޕްރޮޑަކްޝަން އިތުރަށް ކުރިއަށް ގެންދާނީ ފުރަތަމަ ފެރީގެ ޓެސްޓުތަކަށްފަހުއެވެ.

މި ޚިދުމަތުގައި ބޭނުންކުރާ ފެރީތަކަކީ 30 ނޯޓިކަލް މޭލުގެ ބާރުމިނުގެ ފެރީތަކެކެވެ. މިއީ މިހާރު ބޭނުންކުރާ ފެރީތަކަށްވުރެ ހަލުވި ފެރީތަކެކެވެ. ފެރީއެއްގައި އެއްފަހަރާ 50މީހުން އުފުލޭނެއެވެ. ފެރީ ފަރުމާކޮށްފައިވަނީ ފުރޮޅުލީ ގޮނޑީގައި އުޅޭ މީހުންނާއި، ބަލިމީހުންވެސް ފަސޭހައިން އުފުލޭ ގޮތަށެވެ.

ފެރީ ނިޒާމުގެ ޚިދުމަތް ފުރަތަމަ ފެށުމަށް ހަމަޖެހިފައިވަނީ ޒޯން 1އަށެވެ. އެއީ ރާއްޖޭގެ އެންމެ އުތުރުން ހއ.، ހދ. އަދި ށ. އަތޮޅަށެވެ. ޒޯން 1ގެ ޓެސްޓު ދަތުރުތައް އަންނަ މަހު ފެށުމަށް އެމްޓީސީސީންދަނީ ތައްޔާރުވަމުންނެވެ. އެމްޓީސީސީގެ ސީއީއޯ ޢާދަމް އާޒިމް ވިދާޅުވީ، ދަތުރުތައް ފަށާނީ ފުރަތަމަ ޒޯންގެ ބައެއް ރަށްތަކަށްކަމަށެވެ. އަދި ރަށްތައް އިތުރުކުރަމުންގޮސް، އަންނަ އަހަރުގެ ފެބްރުއަރީމަސް ފެށެންވާއިރަށް މުޅި ޒޯނަށް ޚިދުމަތް ފަށާނެކަމަށެވެ.

ޒޯން 1ގައި ޚިދުމަތް ދިނުމަށް ޖުމްލަ 17ފެރީ ބަނުމަށް، ގަލްފް ކްރާފްޓާ ހަވާލުކޮށްފައިވެއެވެ.

މި މަޝްރޫޢުގައި ރާއްޖޭގެ ސަރަޙައްދުތައް ޖުމްލަ 6 ޒޯނަށްވަނީ ބަހާލާފައެވެ. ޒޯން 1ގައި ހއ، ހދ އަދި ށ. އަތޮޅުގައި މީހުން ދިރިއުޅޭ 40 ރަށް ހިމެނެއެވެ.

އެމްޓީސީސީން މިވަގުތު އަންނަނީ ފެރީ ދަތުރުތައް ފެށުމުގެ ކުރިން އެ ރަށްތަކުގައި ހަދަންޖެހޭ ފެރީ ޓަރމިނަލްތަކާއި، ފެރީ ސްޓޮޕްތައް ހެދުމުގެ މަސައްކަތްތައްވެސް ކުރަމުންނެވެ.