ރާއްޖޭގެ ރަށްރަށުގެ އާބާދީ އިތުރުވެ ގިނަ ރަށްތަކަށް މިހާރު ކުރިމަތިވެފަވާ އެންމެ ބޮޑު ދައްޗަކީ ބިމުގެ ޖާގައިގެ ދަތިކަމެވެ. 61ހެކްޓަރުގެ އިހަވަންދުއަކީ ބިން ބޮޑުނަމަވެސް، އާބާދީ އިތުރުވުމުގެ ސަބަބުން ބިމުގެ ޖާގަ ދަތި ރަށެކެވެ. އެރަށުގައި ބިން ހިއްކުމުގެ މަޝްރޫޢު ކުރިއަށްގެންދިއުމަށް ސަރުކާރުން ނިންމާ، މަސައްކަތް ފެށުމަށް މިހާރު އެމްޓީސީސީގެ ޓީމްވަނީ ރަށަށް ގޮސްފައެވެ. އުއްމީދު ބޮޑު މި މަޝްރޫޢާއެކު ރައްޔިތުންތިބީ އުފަލުން ފޮޅިފައެވެ.
ވެރިކަންކުރާ ދިއްދޫ ނެގުމަށްފަހު ތިލަދުންމަތީ އުތުރުބުރީގެ އެންމެ އާބާދީ ބޮޑު ރަށަކީ އިހަވަންދުއެވެ. އިހަވަންދުއަކީ 61.9ހެކްޓަރުގެ ރަށެކެވެ. ރަށުގެ އާބާދީ 3500ގަ އުޅޭއިރު، 450އެއްހާ ގޭބިސީގަ މީހުން އަންނަނީ ދިރިއުޅެމުންނެވެ. މީގެތެރޭގަ އެރަށަށް ހިޖުރަކޮށް ދިރިއުޅެމުންދާ އާއިލާތައްވެސް ހިމެނެއެވެ. ރާއްޖޭގެ އެހެން ގިނަ ރަށްތަކެކޭ އެއްގޮތަށް އިހަވަންދޫގެ ތަރައްޤީއަށްވެސް މިހާރު އޮތް އެންމެ ބޮޑު ހުރަހަކީ ރަށުގެ ބިމުގެ ޖާގައެވެ.
ބިމުގެ ޖާގައިގެ މައްސަލަ ޙައްލުކުރުމަށް އިހަވަންދޫގެ ފަޅުން 28ހެކްޓަރުގެ ސަރަޙައްދެއް ހިއްކަން ސަރުކާރުން ނިންމާ އެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ހަވާލުކޮށްފައިވަނީ މިދިޔަ އަހަރުގެ ފަހުކޮޅުއެވެ. އަދި މިހާރު މިވަނީ އަމަލީ މަސައްކަތް ފެށުމާ ދާދި ގާތްވެފައެވެ.
ބިންހިއްކުމަށް ބޭނުންވާ ސާމާނާއެކު "މަހާ ޖައްރާފް" އާއި އެމްޓީސީސީގެ ޓީމް އިހަވަންދުއަށް ދިޔައީ މިދިޔަ އަންގާރަދުވަހުއެވެ. އެޓީމަށް ރަށުގެ ރައްޔިތުން މަރުހަބާކީ އުފަލާއެކުއެވެ. އެގޮތުން ރަށުގެ ރައްޔިތުން ބަނދަރު މައްޗަށް ނިކުމުގެ އެމީހުންގެ އުފާވެރި ޝުޢޫރުތަށްވަނީ ފާޅުކޮށްފައެވެ. އަދި މަރުޚަބާކިޔުމުގެ ގޮތުން ސަޤާފީ ހަރަކާތްތަކާއި، ކޭމެއްވެސް އެމްޓީސީސީގެ ޓީމަށް އަރުވާފައިވެއެވެ.
ޕީއެސްއެމް ނިއުސްއާ ވާހަކަދައްކަވަމުން ހއ.އިހަވަންދޫ ކައުންސިލްގެ ރައީސް އަޙުމަދު ޞަބާހު ވިދާޅުވީ މި މަޝްރޫޢާއެކު ރަށުގެ ރައްޔިތުން ބޯހިޔާވަހިކަމާ، އިޤްތިޞާދީ ކުރިއެރުމަށް ކުރަމުން އައި އުއްމީދު ހަގީގަތަކަށްވުމުގެ މަންޒަރު ފެންނަން ފަށާފައިވާކަމަށެވެ. އެއް ގެއެއްގަ އެތައް އާއިލާތަކެއް ދިރިއުޅޭ އިހަވަންދޫން ހިއްކާ ބިން ބޭނުންކުރުމުގައި އެންމެ އިސްކަމެއް ދޭނީ ބޯހިޔާވަހިކަމުގެ ދަތިކަމުގެ މައްސަލަ ޙައްލުކުރުމަށް ކަމަށް ޞަބާހު ވިދާޅުވިއެވެ. އަދި ސިނާޢީ މަސައްކަތްތަކުގެ އިތުރުން އާ ވިޔަފާރިތަކަށްވެސް ބިން ދޫކުރާނެ ކަމަށް އޭނާ ވިދާޅުވިއެވެ.
"ސިނާއީ މަސައްކަތްތައް ރަށުތެރެއިން ނަގާ އެ ބިމުގެ ވަކި ސަރަޙައްދަކަށް ބަދަލުކުރާނީ، ވިޔަފާރިކުރުމަށްވެސް ބިން ދޭނަން. އަދި ކުނިގޮނޑުގެ މައްސަލަ ރަށަށް ވަރަށް ބޮޑު، އެންމެ އުނދަގޫ ކުޑަވާނެގޮތަށް ކުނިގޮނޑުވެސް އެ ސަރަޙައްދަށް ބަދަލުކުރާނީ." ޞަބާހު ވިދާޅުވިއެވެ.
ދިގު މުއްދަތަކަށްފަހު އިހަވަންދޫން އެންމެ ފަހުން ގޯތި ދޫކުރީ 2019ވަނަ އަހަރުއެވެ. އެ އަހަރު 200 ގެވަޅު ދޫކުރިއިރު، އަދިވެސް ރަށުގައި އަމިއްލަ ބޯހިޔާވަހިކަން ބޭނުންވާ 200އެއްހާ އާއިލާ ތިބިކަމަށް ކައުންސިލުން ވިދާޅުވިއެވެ.
އިހަވަންދޫއަކީ އުތުރުގަ މަސްވެރިކަމުގެ ސިނާޢަތް އެންމެ ފުޅާ ރަށެވެ. ރަށުގެ ޒުވާނުންގެ އާބާދީގެ %70މީހުން މަސައްކަތްކުރަނީ މި ސިނާޢަތުގައެވެ. އެގޮތުން އެރަށުގައި މިހާރުވެސް މަހަށް ނިކުންނަ 28 ދޯނި އޮންނައިރު، 12ދޯނި އަންނަ އަހަރު ސިނާޢަތަށް ނިކުންނާނެއެވެ. އިހަވަންދުއަކީ ދޯނި ބަނުމުގެ މަސައްކަތްވެސް ފުޅާ ދާއިރާއެއްގަ ކުރާ ރަށެކެވެ. ކައުންސިލްގެ ރައީސް ވިދާޅުވީ ބިމަށް ޖާގަ އިތުރުވުން މަސްވެރިކަމުގެ ދާއިރާ ފުޅާކުރުމަށްވެސް ބޮޑު ފުރުޞަތެއް ލިބޭނެކަމަށެވެ.