ކުޅުދުއްފުށީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ރައީސްގެ އަނބިކަނބަލުން ބައްދަލުކުރައްވައިފި
ރައީސުލްޖުމްހޫރިއްޔާގެ އަނބިކަނބަލުން ފަޒުނާ އަޙްމަދު، ކުޅުދުއްފުށި ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއި ބައްދަލުކުރައްވައިފިއެވެ.
މިއަދު ހެނދުނު އޮތް މި ބައްދަލުކުރެއްވުން ކުރިއަށްގެންގޮސްފައި ވަނީ ކުޅުދުއްފުށީ ސިޓީ ކައުންސިލް އޮފީހުގައެވެ.
މި ބައްދަލުކުރެއްވުމުގައި ކުޅުދުއްފުށި ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ އެބޭކަނބަލުންގެ ކަންބޮޑުވުންތަކާއި، ބޭނުންވާ ކަންތައްތައް ރައީސުލްޖުމްހޫރިއްޔާގެ އަނބިކަނބަލުންނާއި ޙިއްޞާކުރައްވާފައެވެ. އެގޮތުން ކުޅުދުއްފުށީގެ ކަނބަލުން ތައްޔާރުކުރާ ތަފާތު ބާވަތްތަކުގެ ކާބޯތަކެތި ފަސޭހަކަމާއެކު ވިއްކޭނެ މަގެއް ފަހިކޮށްދިނުމަށާއި، ކުޅިވަރުގެ ދާއިރާގައި އަންހެނުންނަށް ކުރިއަށް ދެވެން އޮތް ހަނި ދާއިރާ އިތުރަށް ފުޅާކޮށްދިނުމަށާއި، މަތީ ތަޢުލީމު ހާޞިލުކުރުމުގައި ކުރިމަތިވާ ގޮންޖެހުންތައް އެކަނބަލުން ވަނީ ފާހަގަކުރައްވާފައެވެ.
މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާގެ އަނބިކަނބަލުން ވަނީ ކުޅުދުއްފުށި ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ފާހަގަކޮށްފައިވާ ކަންތައްތަކަށް އަލިމަގެއް ހޯދޭނެ މަގުތައް ވިދާޅުވެދެއްވާފައެވެ. އެގޮތުން ލާމަރުކަޒީ ޤާނޫނުގެ ދަށުން ލިބިފައިވާ ބާރުގެ ބޭނުން ހެޔޮގޮތުގައި ހިފައި، ވަކި ސިޔާސީ ކުލައަކަށް ބެލުމެއް ނެތި ރަށުގެ ހުރިހާ އަންހެނުންގެ ޚިޔާލުތައް އެއްކޮށް އެޔާއެއްގޮތް ވާގޮތުގެ މަތީން ޕްލޭންއެއް އެކުލަވާލައި އެ ޕްލޭންގައި ހުރިކަންކަން ހަޤީޤަތަކަށް ހެދުމަށް ވަކި ވަކި މުވައްސަސާތަކާއި ގުޅިގެން ކުރިއަށް ދިއުމަށް ބާރުއެޅުއްވެވިއެވެ.
މީގެ އިތުރުންވެސް އަންހެނުން ބާރުވެރިކުރުވުމަށާއި އަންހެނުންގެ ޙިއްޞާ ރަށުގެ ކަންކަމުގައި ފުޅާކުރުމަށް ކުރެވެންހުރި މުހިންމު ކަންކަން އެކަމަނާ ވަނީ ކުޅުދުއްފުށި ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއި ޙިއްޞާކުރައްވާފައެވެ.