ފެނާއި ނަރުދަމާ ޤާއިމުކުރުމުގެ މަސައްކަތް 20 ރަށެއްގެ މިވަގުތު ކުރިއަށްދާކަމަށް އެމްޑަބްލިޔުއެސްސީން ބުނެފިއެވެ.
އެމްޑަބްލިޔުއެސްސީން ބުނީ 20 ރަށެއްގައި ފެނާއި ނަރުދަމާ ޤާއިމްކުރުމުގެ މަސައްކަތްކުރިއަށްދާއިރު، އެ ހުރިހާ ރަށެއްގައިވެސް ފެނާއި ނަރުދަމާ ޤާއިމުކުރުމުގެ އަމަލީ މަސައްކަތް ފެށިފައިވާކަމަށެވެ.
ސަރުކާރުން އެމްޑަބްލިއުއެސްސީއާއި ޙަވާލުކޮށްގެން ކުރިއަށްގެންދާ 20 ރަށުގެ ފެނާއި ނަރުދަމާ ނިޒާމު ޤާއިމުކުރުމެ މަޝްރޫޢޫގެ ދަށުން ހުރިހާ ރަށެއްގައިވެސް ޢަމަލީ މަސައްކަތް މިހާރު ފެށިފައިވާއިރު، ބައެއް ރަށްރަށުގައި ފެނުގެ ނެޓްވޯކް އެޅުމުގެ މަސައްކަތާއި އާރްއޯޕްލާންޓް ބެހެއްޓުމުގެ މަސައްކަތް ކުރިއަށްދާކަމަށް އެކުންފުނިން ބުނެއެވެ.
އެމްޑަބްލިޔުއެސްސީން ބުނީ ހދ.ކުމުންދޫ ފެނުގެ ނެޓްވޯކް އެޅުމުގެ މަސައްކަތް ފެށިފައިވާއިރު މިހާރު އެއް ކިލޯމީޓަރަށް ހޮޅިއަޅާފައިވާކަމަށެވެ. ދެން ހުރި ރަށްރަށުގައި ޕްރޮޖެކްޓް މެޓީރިއަލް ސައިޓުތައް ތައްޔާރުކުރުމުގެ ހުރިހާ މަސައްކަތެއް ނިމިފައިވާކަމަށާއި ފެނާއި ނަރުދަމާ ނިޒާމުގެ މައި ނެޓްވޯކް އެޅުމަށް ބޭނުންވާ ހޮޅި ހުރިހާ ރަށަކަށްވެސް ގެންގޮސްފައިވާކަމަށް އެމްޑަބްލިއުއެސްސީން ބުނެއެވެ. މީގެއިތުރުން ހުރިހާ ރަށެއްގައިވެސް ފެން ޕްލާންޓް ބެހެއްޓުމަށް ޤާއިމުކުރާ ޢިމާރާތުގެ މަސައްކަތް މިހާރު ކުރަމުން އަންނަކަމަށްވެސް އެކުންފުނިން ވިދާޅުވެއެވެ.
މިދިޔަ އަހަރުގެ ނޮވެމްބަރުމަހު މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން މި 20 ރަށުގެ މަސައްކަތް އެމްޑަބްލިއުއެސްއީއާއި ޙަވާލުކޮށްފައިވަނީ މީގެތެރެއިން 15 ރަށުގައި ފެނާއި ނަރުދަމާގެ މަސައްކަތް މޭއިމަހަށް އަދި 5 ރަށުގެ ފެނުގެ ނިޒާމުގެ މަސައްކަތް ނިންމާ މާޗްމަހަށް ނިންމާގޮތަށެވެ.
ނަމަވެސް ކޯވިޑްގެ ސަބަބުން ކުރިމަތިވި ގޮންޖެހުންތަކާއެކު މަސައްކަތްތަކަށް ލަސްތަކެއް ކުރިމަތިވީކަމަށް އެމްޑަބްލިއުއެސްސީން ވިދާޅުވެއެވެ. އެގޮތުން ޤައުމުތަކުގައި އަޅާފައިވާ ފުރަބަންދުގެ ފިޔަވަޅާއެކު ރާއްޖެއިން ބޭރުން ގެންނަންޖެހޭ ސާމާނު ލިބުމުގައި ދިމާވި ދަތިތަކާއި، ތަކެތި ގެނައުމަށް ބޭނުންވާ ޑޮލަރު ލިބުމުގައި ކުރިމަތިވި ދަތިތަކާއި، ރަށްރަށް މޮނީޓަރިންގ ޙާލަތުގައި އޮތުމުގެ ސަބަބުން ރަށަށް އަރާފޭބުމުގައި ހަމަކުރަންޖެހޭ މުއްދަތުގެ ސަބަބުންނާއި ތަކެތި ފޮނުވަން ކުރިމަތި ދަތިތައް އެކުންފުނިން ފާހަގަކުރެއެވެ. މީގެއިތުރުން މަސައްކަތަށް ބޭނުންވާ ފަންނީ މީހުން ހޯދުމަށްވެސް ދަތިތަކާއި ކުރިމަތިލާންޖެހުނުކަމަށް އެކުންފުނިން ފާހަގަކުރައްވައެވެ.
ފެނާއި ނަރުދަމާގެ ވިއުގަ ޤާއިމުކުރުމާއި، އާރްއޯ ޕްލާންޓާއި ސްޓޯރޭޖް ޓޭންކް ބެހެއްޓުމާއި، ނަރުދަމާ ޕަމްޕް ސްޓޭޝަން ބެހެއްޓުމާއި، ކަނެކްޝަން ގުޅައިދިނުމަށް އެމްޑަބްލިއުއެސްސީއާއި ޙަވާލުކޮށްފައިވަނީ 1.3 ބިލިއަން ރުފިޔާއަށެވެ.