އެކުވެރި ޢަރަބި އިމާރާތް، ޔޫއޭއީއިން ފަލަސްޠީނުގެ ޣައްޒާއަށް އެހީގެ ސާމާނު ހިފައިގެން ދަތުރުކުރި ފަސް ގާފިލާ މި ހަފްތާގެ ތެރޭގައި ޣައްޒާއަށް އެތެރެވެއްޖެއެވެ.
ޔޫއޭއީއިން ކުރިއަށް ގެންދާ ‘އޮޕަރޭޝަން ޝިވަލްރަސް ނައިޓް 3’ ގެ ދަށުން ދަތުރުކުރި މި ގާފިލާތަކުގައި 533 ޓަނުގެ އެހީގެ ސާމާނު ބަރުކޮށްފައި ހުރި 66 ޓްރަކު ހިމެނެއެވެ. މި ގާފިލާތައް ފޮނުވުމުގެ މަޤްޞަދަކީ ޣައްޒާގެ ރައްޔިތުންނަށް އިންސާނީ އެހީ ފޯރުކޮށްދީ އެ މީހުންގެ ޒަރޫރީ ބޭނުންތައް ފުއްދުމަށް އެހީތެރިވުމެވެ. މި ގާފިލާތަކުގައި ހުރި އެހީގެ ސާމާނުގެ ތެރޭގައި ކާބޯތަކެއްޗާއި ހިޔާވަހިކަން ހޯދުމަށް މުހިންމު ސާމާނު ހިމެނެއެވެ.
ޔޫއޭއީގެ ހިޔުމެނިޓޭރިއަން އެއިޑް ލޮޖިސްޓިކްސް ސެންޓަރަކީ އެހީގެ ސާމާނު ބަލައިގަނެ، އެ ތަކެތި އެކި ބައިބަޔަށް ބަހައި ބަންދުކޮށް ޣައްޒާއަށް ގެންދިޔުމަށް ތައްޔާރުކުރާ މަރުކަޒެކެވެ. އަޮޕަރޭޝަން ޝިވަލްރަސް ނައިޓް 3ގެ ދަށުން ޣައްޒާއަށް އިތުރު ގާފިލާތައް ފޮނުވުމަށް އެ ސެންޓަރުން ދަނީ މަސައްކަތް ކުރަމުންނެވެ.
ޣައްޒާގެ ރައްޔިތުން ނަސްލުހޭދު ކުރުމަށް 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޔަހޫދީން ހަނގުރާމަ ފެށި ފަހުން، ހަމަލާ ބަދަލުކުރުން ހުއްޓައިލުމުގެ އެއްބަސްވުމެއްގައި ނަމެއްގައި ސޮއިކުރުމާ ހަމައަށް ޔަހޫދީން ވަނީ މައުސޫމް ކުޑަކުދިންނާއި ކުށެއް ނެތް އަންހެނުން ހިމެނޭ ގޮތަށް ޣައްޒާގެ 73،400 މީހުން ޝަހީދުކޮށްލައިފައެވެ. ޔަހޫދީންގެ ހަމަލާތަކުގައި 174،300 މީހުންނަށް ޒަޚަމްވެފައިވެއެވެ. އެއްބަސްވުމަށް ޢަމަލުކުރަން ފެށި ފަހުން ވެސް ޔަހޫދީން ވަނީ ޣައްޒާގެ 1,300އަށްވުރެ ގިނަ ރައްޔިތުން ޝަހީދުކޮށްލައި، 4،200އަށް ވުރެ ގިނަ މީހުންނަށް ޒަޚަމްކޮށްލައިފައެވެ.
ހަނގުރާމައިގެ ޣައްޒާގެ ބިނާރުތަކުގެ 90 އިންސައްތައަށް ވަނީ ބޮޑެތި ގެއްލުންތައް ލިބިފައެވެ. ނުވަތަ ސުންނާފަތިވެފައެވެ. ގިނަ ޢަދަދެއްގެ މީހުންގެ ގެދޮރު ގެއްލިފައިވާއިރު، ޣައްޒާގެ ރައްޔިތުން އަދި ވެސް ދިރިއުޅެމުން ދަނީ ވަރަށް ނިކަމެތި އަދި ދަތި ޙާލުގައެވެ. ޣައްޒާއަށް އެހީގެ ސާމާނު ވެއްދުމަށް ޔަހޫދީން އަދިވެސް ދަތިކުރަމުން ދާތީ ކާބޯތަކެއްޗާއި ބޭހާއި ޞިއްޙީ ސާމާނު ފަދަ ތަކެތި އެ ސަހަރުން ހޯދުމަށް ވަނީ ވަރަށް ބޮޑަށް ދަތިވެފައެވެ.