ރައްޔިތުންގެ މަޖިލީހުން ވަޒީރުންނަށް ބިރުދައްކާ ކަމަށް ވިދާޅުވެ، ކުރީގެ ކޮމިއުނިކޭޝަން އެންޑް ސައިންސް މިނިސްޓަރ މުޙައްމަދު މަލީހު ޖަމާލް ދެއްކެވީ އެއްވެސް އަސާސެއް ނެތް ވާހަކަތަކެއްކަމަށް ރައްޔިތުންގެ މަޖިލީހުން ކަނޑައަޅާއިފިއެވެ.
މަޖިލީހުން އެގޮތަށް ކަނޑައަޅާ ފާސްކުރެއްވީ 48 މެންބަރުންގެ ވޯޓުންނެވެ.
މަލީހުގެ އިތުބާރުނެތްކަމުގެ މައްސަލަގާއި ވޯޓު ނެގި ދުވަހު، 1 މާރިޗްގައި ބެއްވި ޖަލްސާގައި މަލީހު ވަނީ ރައްޔިތުންގެ މަޖިލީހުން ސަރުކާރުގެ ބައެއް ވަޒީރުންނަށް ބިރު ދައްކަމުންދާކަމަށް ވިދާޅުވެފައެވެ. އެގޮތުން ކުރީގެ ޖެންޑަރ މިނިސްޓަރު ޝިދާތާ ޝަރީފް އިސްތިއުފާ ދެއްވީވެސް މަޖިލީހުން ބިރު ދެއްކުމުން ކަމަށް މަލީހު ތުހުމަތުކުރެއްވިއެވެ. އަދި ފުރުޞަތު ދެއްވައިފިނަމަ އެކަމުގެ ތަފްސީލް ހާމަކޮށްދެއްވާނެކަމަށްވެސް މަލީހު ވަނީ ވިދާޅުވެފައެވެ. މަލީހުގެ އެ ތުހުމަތަކީ މަޖިލީހުގެ ކަރާމާތާއިި ގަދަރަށް އުނިކަން ލިބޭ ކަމެއްކަމަށް ވިދާޅުވެ، މަޖިލީހުގެ ރައީސް މުހައްމަދު ނަޝީދު ވަނީ އިމްތިޔާޒް ކޮމެޓީއަށް އެ މައްސަލަ ފޮނުއްވާފައެވެ. އެ މައްސަޅާގައި ކޮމިޓީއަށް މަލީހު ޙާޒިރުކޮށް ސުވާލުކޮށްފައިވެއެވެ.
މަޖިލީހުގެ އިމްތިޔާޒް ކޮމިޓީން ދިރާސާކޮށް، މަޖިލީހުން ފާސްކުރެއްވި ރިޕޯޓްގައި ވަނީ، ރައްޔިތުންގެ މަޖިލީހުގެ އިމްތިޔާޒްތަކާއި ބާރުތަކުގެ ޤާނޫނުގައި، މަޖިލީހަށް ނުވަތަ ކޮމިޓީއަކަށް ގަސްތުގައި ކަމެއް އޮޅުވާލައިފިނަމަ އެފަރާތެއްގެ އަދަބަކީ -/3,000 ރުފިޔާއާއި -/10,000 ރުފިޔާއާ ދެމެދު ޢަދަދުން ނުވަތަ 3 މަސް ދުވަހާއި 6 މަސްދުވަހުގެ މުއްދަތަށް ޖަލަށްލުންކަން ބަޔާންކުރާކަން ފާހަގަކޮށްފައިވެއެވެ. އަދި އެ ޤާނޫނުގައި ކުށެއްކަމަށް ބަޔާންކޮށްފައިވާ ކަންކަމާއި މަޖިލީހުގެ ބާރުތަކާއި އިމްތިޔާޒުތަކަށް އުނިކަން އަންނަ ކަންކަމާމެދު ފިޔަވަޅު އަޅާނީ އެ މައްސަލައެއް ޕްރޮސިކިއުޓަރ ޖެނެރަލްގެ އޮފީހަށް ހުށަހަޅައިގެން ޝަރީޢަތް މެދުވެރިކޮށް ކަމަށް ބަޔާންކޮށްފައިވާކަންވެސް ކޮމިޓީގެ ރިޕޯޓްގައިވެއެވެ. އަދި އެ ޤާނޫނުގައި މަޖިލީހަށް ނުވަތަ ކޮމިޓީއަކަށް ހާޒިރުކުރެވޭ މީހާއާއި ކުރެވޭ ސުވާލުތަކަށް އެމީހަކަށް އެނގިހުރި އެންމެ ރަނގަޅަށްކަން ތެދުބަހުން ޖަވާބު ދޭންވާނެކަމަށް ބަޔާންކޮށްފައިވާއިރު، ކޮމިޓީން ކުރި ސުވާލުތަކަށް ސީދާ ޖަވާބުދާރީވުމަށް މުޙައްމަދު މަލީޙް ޖަމާލު އުޒުރުވެރިވެފައިވާކަމަށާއި، މަލީހު ޖަމާލް ދެއްކެވީ އެއްވެސް އަސާސެއް ނެތް ވާހަކަތަކެއްކަމަށްވެސް މަޖިިލީހުން ފާސްކުރި ރިޕޯޓްގައިވެއެވެ.
އެހެންކަމުން މަލީހު މަޖިލީހުގެ ތަޅުމުގައި ދައްކާފައިވާ ވަހަކަތަކަކީ އެއްވެސް އަސާސެއް ނެތް ވާހަކަތަކެއްކަމަށް މަޖިލީހުން މިއަދު ވަނީ ފާސްކޮށްފައެވެ.