އެމެރިކާއާއި ޔަހޫދީންގެ ޙަމަލާތަކާ ދެކޮޅަށް ޤައުމު ދިފާޢުކޮށް، ހަތިޔާރު އެޅުމަށް ތައްޔާރަށް ތިބިކަން ހާމަކުރުމުގެ ގޮތުން އީރާނުގެ ލައްކައަކަށްވުރެ ގިނަ ރައްޔިތުން ބައިވެރިވި ބޮޑު އެއްވުމެއް ބާއްވައިފިއެވެ.
ފާއިތުވި ފެބްރުއަރީ މަހު އެމެރިކާއާއި ޔަހޫދީ ދައުލަތުން އީރާނަށް ހަމަލާދޭން ފެށިފަހުން ބޭއްވި އެންމެ ބޮޑު އެއްވުމުގައި، ހުކުރު ދުވަހު ވެރިރަށް ތެޙްރާނުގެ މަގުތަކަށް އެއްވި 100،000 އަށްވުރެ ގިނަ ރައްޔިތުން ވަނީ ޤައުމުގެ ސިޔާދަތާއި ދިފާޢުގައި ހަނގުރާމަކުރުމަށް ތައްޔާރަށް ތިބިކަން އިޢުލާނުކޮށްފައެވެ. އެމެރިކާގެ ކަނޑުގެ އަސްކަރިއްޔާއިން އީރާނުގެ ބަނދަރުތައް ބަންދުކޮށް، އަޅަމުންދާ އިޤްތިޞާދީ ދަތިކުރުމުގެ ފިޔަވަޅުތަކުގެ ސަބަބުން ދަތިތަކާ ކުރިމަތިލާން ޖެހިފައިވީ ނަމަވެސް، އީރާނު ސަރުކާރުން ދަނީ ޤައުމީ ރޫޙު އާލާކޮށް އެއްބައިވަންތަކަން ވަރުގަދަކުރުމަށް ގިނަ މަސައްކަތްތަކެއް ކުރަމުންނެވެ.
"ޖާންފަދާއީ-އީ އީރާން" ގެ ނަމުގައި ކުރިއަށްގެންދާ ޙަރަކާތުގެ ދަށުން، ކުރު މުއްދަތުގެ އަސްކަރީ ތަމްރީނުތައް ފުރިހަމަކޮށް ޤައުމީ ދިފާޢުގައި ބައިވެރިވުމަށް އެތައް ހާސް ބަޔަކު ވަނީ ނަންނޯޓުކޮށްފައެވެ. ތެހެރާނުގެ މައި މަރުކަޒުގައި ކުރިއަށްދިޔަ މި ހިނގާލުމުގައި، އަސްކަރީ ޔުނިފޯމުގައި ތިބި ޢާންމުން ޤައުމީ ދިދަތަކާއެކު ސަފުހަދައިގެން ހިނގަމުންދިޔައިރު، މަގުމައްޗަށް އެއްވެ ތިބި ޢާންމު ރައްޔިތުން ދިޔައީ އެމީހުންނަށް ހިތްވަރުދީ ސާބަސް ރައްދުކުރަމުންނެވެ. މި ފަރާތްތަކަކީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އާއި ބަސީޖް ފައުޖުތަކުގެ އިތުރުން ސަލާމަތީ ކަންކަމުގައި ޙަރަކާތްތެރިވާނެ އިތުރު ބާރެކެވެ.
ތެހެރާނުގެ އައިއާރްޖީސީ ކޮމާންޑަރު ޖެނެރަލް ޙަސަން ޙަސަންޒާދާ ވިދާޅުވި ގޮތުގައި، މިހާތަނަށް 600,000 އަށްވުރެ ގިނަ މީހުން ތަމްރީނުތަކުގައި ބައިވެރިވާން ރަޖިސްޓްރީވެފައިވާއިރު، އެއް މިލިއަނަށްވުރެ ގިނަ މީހުން ތަމްރީނު ކުރެވޭނެ ކަމަށް ލަފާކުރެވެއެވެ. ބަސީޖް ފައުޖުގެ އައު ވެރިޔާ ޙުސައިން ޠާއިބު ވިދާޅުވީ، ރައީސް މަސްޢޫދު ޕެޒެޝްކިއާންއާއި އަސްކަރީ އިސް ވެރިންގެ ކުރިމަތީގައި ކުރިއަށްދިޔަ މި ތަމްރީނުތަކުގެ ސަބަބުން ޤައުމުގެ ދުޝްމަނުންގެ ހިތްތަކަށް ބިރުވެރިކަން ވަންނާނެ ކަމަށެވެ. މީގެ އިތުރުން، ހުރުމުޒް ކަނޑުއޮޅިން ދަތުރުކުރާ އުޅަނދުފަހަރަށް އަމާޒުކޮށް ޙަމަލާދިނުމުގެ ޤާބިލުކަން ލިބިފައިވާ ޑްރޯންތަކާއި، ވައިގެ ދިފާޢީ ޒަމާނީ ނިޒާމުތައްވެސް މި އެއްވުމުގައި އީރާނުން ވަނީ ދައްކާލާފައެވެ.
މި އެއްވުމަކީ، ހަނގުރާމައިގެ ޙާލަތުގެ ކުރިން، ޖަނަވަރީ މަހު އިޤްތިޞާދީ ދަތިތަކާ ގުޅިގެން ހިނގައިދިޔަ ވަރުގަދަ މުޒާހަރާތަކަށްފަހު، ސަރުކާރުގެ ބާރާއި ކޮންޓްރޯލް ވަރުގަދަކަން ސާބިތުކޮށްދިނުމަށް ބޭއްވުނު މުހިންމު ހަރަކާތެކެވެ. އެ މުޒާހަރާތައް ބެލެހެއްޓުމަށް ސަލާމަތީ ބާރުތަކުން ހިންގި އޮޕަރޭޝަންތަކުގައި 7,000 އަށްވުރެ ގިނަ މީހުން މަރުވެ، އެތައް ހާސް ބަޔަކު ހައްޔަރުކުރެވުނު ކަމަށް އެކްޓިވިސްޓުން ބުނެއެވެ.
އީރާނުގެ ސަރުކާރުގެ ރަސްމީ އިދާރާތަކުން މޭ މަހު ހާމަކޮށްފައިވާ ތަފާސްހިސާބުތަކަށް ބަލާއިރު، 90 މިލިއަން މީހުންގެ އާބާދީއެއް އޮންނަ އެ ޤައުމުން 30 މިލިއަނަށްވުރެ ގިނަ މީހުން ވަނީ ޤައުމީ ދިފާޢީ މަސައްކަތްތަކުގައި ބައިވެރިވުމަށް އޮންލައިންކޮށާއި އެއްވުންތަކުގެ ޒަރީޢާއިން ނަންނޯޓުކޮށްފައެވެ.