ކުޅުދުއްފުށީގައި ހަދަން ފަށާފައިވާ 105 ހައުސިންގ ޔުނިޓްގެ މަސައްކަތް ނިންމުމަށް ބަޔަކާ ޙަވާލުކޮށްފި

ކުޅުދުއްފުށީގައި ހަދަން ފަށާފައިވާ 105 ހައުސިންގ ޔުނިޓްގެ މަސައްކަތް ނިންމުމަށް ބަޔަކާ ޙަވާލުކޮށްފިއެވެ.

މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި ބޭއްވި ޚާއްސަ ރަސްމިއްޔާތެއްގައި، ކުޅުދުއްފުށީގައި ޢިމާރަތްކުރަން ފަށާފައިވާ 105 ހައުސިންގ ޔުނިޓްގެ މަސައްކަތް ނިންމުމަށް ޙަވާލުކޮށްފައިވަނީ ދޮންބެޒް ޕްރައިވެޓް ލިމިޓެޑާއެވެ. އެކަމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ހައުސިންގ ޑިޕާރޓްމަންޓްގެ ޑިރެކްޓަރ ޖެނެރަލް އަޙްމަދު ވިޝާން ނަސީމެވެ. އަދި ދޮންބެޒް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެކުންފުނީގެ ހެޑް އޮފް އޮޕަރޭޝަން ޢަލީ ހަމްދޫނެވެ.

ކުޅުދުއްފުށީގައި 105 ހައުސިން ޔުނިޓް ޢިމާރަތްކުރަން ފަށާފައިވަނީ 2011 ވަނަ އަހަރުގެ ތެރޭގައެވެ. ނަމަވެސް 2014 ގައި ވަނީ އެ މަސައްކަތް ހުއްޓިފައެވެ.

މި 105 ހައުސިންގ ޔުނިޓްގެ މަސައްކަތް ނިންމުމަށް ޕްލޭނިންގ މިނިސްޓްރީން ދޮންބެޒް ޕްރައިވެޓް ލިމިޓެޑާއި ޙަވާލުކޮށްފައިވަނީ 240 ދުވަހުގެ ތެރޭގައި މަސައްކަތް އެއްކޮށް ނިންމާގޮތަށެވެ. އަދި އެކުންފުންޏާއެކު ވެފައިވާ އެއްބަސްވުމުގެ ދަށުން މި 105 ހައުސިންގ ޔުނިޓްތަކުގައި ނިންމުމަށް ކުރަން ހުރި އެންމެހާ މަސައްކަތްތައް ކުރުމަށް ވަނީ ޙަވާލުކޮށްފައެވެ.

ޕްލޭނިންގ މިނިސްޓްރީން ވިދާޅުވީ، މި މަޝްރޫޢަށް ޚަރަދުކުރުމަށް ހަމަޖެހިފައިވަނީ މިއަހަރުގެ ޕީ.އެސް.އައި.ޕީ ބަޖެޓުންކަމަށެވެ. އެގޮތުން މި 105 ފްލެޓްގެ ނުނިމިހުރި މަސައްކަތްތައް ނިންމުމަށް 47 މިލިއަނަށްވުރެ ގިނަ ރުފިޔާ ހޭދަވާނެކަމަށް އެ މިނިސްޓްރީން ވިދާޅުވެފައިވެއެވެ.