ވ.ރަކީދޫ ބަނދަރު ތަރައްޤީކުރުމުގެ މަޝްރޫގެ އެއްކޮށް ނިންމާލައިފިއެވެ.
ރަކީދޫ ބަނދަރު ތަރައްޤީކުރުމުގެ ޢަމަލީ މަސައްކަތް ކުރިއަށްގެންގޮސްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާއި ހަވާލުކޮށްގެންނެވެ.
މިބަނދަރުގެ މަސައްކަތަކީ ވ.ރަކީދޫގައި މުޅިން އަލަށް ކުރިއަށްގެންދިޔަ ޕްރޮޖެކްޓެކެވެ. މި މަޝްރޫޢުގެ ދަށުން، 5،654 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 11306 ކިއުބިކް މީޓަރުގެ ދޯނި އެހެލާ ސަރަޙައްދު ފުންކުރުމާއި، 198 މީޓަރުގެ ސަރަޙައްދެއްގައި އެއްގަމުތޮށި ލުމުގެ މަސައްކަތް އެމް.ޓީ.ސީ.ސީން ވަނީ ކޮށްފައެވެ. އަދި 156 މީޓަރުގެ ސަރަޙައްދެއްގައި ބޭރުތޮށި ލުމާއި، 44 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 594 އަކަ މީޓަރު ސަރަޙައްދެއްގައި ޕޭވްމަންޓް ހެދުމުގެ މަސައްކަތްވެސް އެކުންފުނިން ކޮށްފައިވެއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމް.ޓީ.ސީ.ސީއާއި ހަވާލުކޮށްގެން ކުރިއަށްގެންދިޔަ މި މަޝްރޫޢުއަކީ 18.5 މިލިއަން ރުފިޔާގެ މަޝްރޫޢެކެވެ. ރަކީދޫގައި ބަނދަރު ހެދުމުގެ މަސައްކަތް އެމްޓީސީސީ އާއި ހަވާލުކޮށްފައި ވަނީ 2019ވަނަ އަހަރުގައެވެ. ބަނދަރުގެ ޢަމަލީ މަސައްކަތް ސައިޓްގައި ފަށާފައި ވަނީ މިދިޔަ އަހަރުގެ ޖޫންމަހުއެވެ.
ވ.ރަކީދޫއަކީ ރާއްޖޭގެ ނިސްބަތުން އެންމެ ކުޑަ އާބާދީއެއް އޮންނަ އެއް ރަށެވެ. 6.3 ހެކްޓަރުގެ ރަކީދޫގެ އާބާދީއަކީ 374 މީހުންނެވެ. ނަމަވެސް ރަށުގައި ދިރިއުޅޭ އާބާދީ އުޅެނީ 200އިން ދަށުގައެވެ. ރަކީދޫގައި ޢާމްދަނީ ހޯދުމަށް މައިގަނޑު ގޮތެއްގައި ކުރާ މަސައްކަތަކީ މަސްވެރިކަމެވެ.
އެރަށުގައި މީގެކުރިން އަރައިފޭބުމަށް ބޭނުންކުރަމުން އައިސްފައިވަނީ ކުޑަ ފާލަމެކެވެ. މިކަމުގެ ދަތިކަން އޮޑިވެރިންނާއި ރަށުގެ ރައްޔިތުންނަށް އައީ ކުރިމަތިވަމުންނެވެ.