ޖެންޑަރ މިނިސްޓްރީން ބަލަހައްޓަމުންދާ 15 ކުއްޖަކު ހއ.ދިއްދޫގައި ހުޅުވި އަމާން ވެއްޓަށް ބަދަލު ކޮށްފިއެވެ.
މި ކުދިން ގޮވައިގެން އެ ރަށަށް ވަޑައިގެންނެވީ ޖެންޑަރ މިނިސްޓަރު އައިޝަތު މުހައްމަދު ދީދީއާއި ސްޓޭޓް މިނިސްޓަރ ޢާއިޝަތު ރަޝީދާއާއި ޑެޕިޔުޓީ މިނިސްޓަރ ފާޠިމަތު ޔުމްނާ އެވެ. ދިއްދޫއިން މިކުދންނަށްވަނީ ހޫނު މަރުހަބާއެއް ކިޔާފައެވެ.
ޖެންޑަރ މިނިސްޓްރީން މަޢުލޫމާތު ދެއްވި ގޮތުގައި އަތޮޅުތަކުގައި ޤާއިމްކުރާ އަމާންވެށި ތަކަށް ކުދިން ބަދަލުކުރާއިރު، އެކުދިން ދިރިއުޅެމުންދާނީ ދަޢުލަތުގެ ބެލުމުގެދަށުގައި ތިބި، އެ ޢާއިލާއެއްގެ އެހެން ކުދިންނާވެސް އެކުގައި ކަމަށެވެ. އަދި މިކުދިން ރަށުގެ އެހެން އާއިލާތަކާވެސް ގުޅުވައިދޭނެ ކަމަށް އެމިނިސްޓްރީން ވިދާޅުވިއެވެ.
ޖެންޑަރ މިނިސްޓްރީން ވިދާޅުވީ ދަޢުލަތުގެ ބެލުމުގެދަށަށް ނަގާ ކުދިން އަތޮޅުތަކުގައި ހަދާފައިވާ މަރުކަޒުތަކަށް ބަދަލުކުރަން ފަށާފައިވަނީ އިޖުތިމާޢީ އަދި އާއިލީ ގުޅުމުގެ ތެރެއިން ބޮޑުވުމުގެ ފުރުޞަތު އެކުދިންނަށް ފަހިކޮށްދިނުމަށެވެ. އަދި ސަރުކާރުގެ ސިޔާސަތަކީ މާލޭ ސަރަޙައްދުގައި ތޮއްޖެހިފައިވާ މަރުކަޒުތަކުގައި އެ ކުދިން ގެންގުޅުމުގެ ބަދަލުގައި، އެހެން ކުދިންނެކޭ ވެސް އެއްގޮތަށް މުޖުތަމަޢުގެ ތެރޭގައި ބޮޑުވުމުގެ ފުރުޞަތު ހޯދައިދީ، އެ ފަދަ މާޙައުލެއް ތަނަވަސްކޮށްދިނުން ކަމަށެވެ.
ރަށްރަށުގައި ޤާއިމްކުރާ އަމާންވެށިތަކުގައި ކުދިން ބައިތިއްބާނީ ވަކި ޢަދަދަކަށެވެ. އަދި މި ތަންތަނުން އެކުދިންނަށް ބޭނުންވާ ފުރިހަމަ އަޅާލުމާއި ތަރުބިއްޔަތާއި ދިރިއުޅުމުގެ ހުނަރުތައް ދަސްކޮށްދިނުމުގެ ޕްރޮގްރާމްތައްވެސް ހިންގާނެކަމަށް އެ ޖެންޑަރ މިނިސްޓްރީން ވަވިދާޅުވެއެވެ.
މީގެ ކުރިން ކުޑަކުދިންގެ ހިޔާ އާއި ފިޔަވަތީގައި ބަލަހައްޓަމުން ދިޔަ ކުދިންގެ ތެރެއިން ބައެއް ކުދިން ފުވައްމުލަކާއި، ށ. ފުނަދޫ އާއި ބ. އޭދަފުށީގައި ޤާއިމްކުރި އަމާން ވެށިތަކަށްވެސްވަނީ ބަދަލުކޮށްފައެވެ. އެގޮތުން ފުވައްމުލަކަށް 16 ކުދިން، ފުނަދޫއަށް 16 ކުދިން އަދި އޭދަފުއްޓަށް 17 ކުއްޖަކު ވަނީ ބަދަލު ކޮށްފައެވެ.
ރާއްޖޭގެ އެކި ސަރަހައްދުގައި ޤާއިމްކުރާ އަމާން ވެށިތަކަކީ ދައުލަތުގެ ބެލުމުގެ ދަށަށް ގެންނަ ކުދިންނަކީވެސް މުޖުތަމަޢުގެ އަޅާލުމާއި މުޖުތަމަޢުގެ ބައިވެރިވުން ލިބިގެން ފުރިހަމަ ތަރުބިއްޔަތެއްދީ ބޮޑުވާ ކުދިންނަށް ހެދުމުގެ މަޤްސަދުގައި ޤާއިމްކުރާ ތަންތަނެވެ. އެގޮތުން ރާއްޖޭގެ 5 ސަރަޙައްދުގައި ޖެންޑަރ މިނިސްޓްރީން އަމާން ހިޔާ ޤާއިމްކުރުމަށް ކުރާ މިމަސައްކަތުގެ ތެރެއިން ދިއްދޫ އަމާންވެއްޓާއެކު މިހާތަނަށް 4 ތަނެއްވަނީ ހުޅުވާފައެވެ. އަމާން ހިޔާ ޤާއިމްކުރުމަށް ކުރާ މިމަސައްކަތް މިއަހަރުގެ ކުރީކޮޅު ނިންމާލުމަށް އެމިނިސްޓްރީން އަންނަނީ މަސައްކަތްކުރައްވަމުންނެވެ.