މިހާރު ސިޓީއެއްގެ ދަރަޖަ ދީފައިވާ ފުވައްމުލައް ސިޓީއަކީ ޢުމްރާނީގޮތުން ފުރިހަމަ ސިޓީއެއްގެ ސިފަ ލިބިފައިވާ ތަނަކަށް ހެދުމަށް މިހާރުގެ ސަރުކާރުން އަންނަނީ މަސައްކަތްކުރަމުންނެވެ.
މިއަހަރުގެ ދައުލަތުގެ ބަޖެޓުގައިވެސް 24މަޝްރޫޢުއެއް ފުވައްމުލައް ސިޓީގައި ހިންގުމަށް ވަނީ ނިންމަވާފައެވެ. އެއީ އަގުގެގޮތުން ބަލާނަމަ 200މިލިއަން ރުފިޔާގެ މަޝްރޫޢެވެ. ނަމަވެސް ކޯވިޑް-19ގެ ސަބަބުން ބައެއް މަސައްކަތްތައް މަޑުޖައްސާލާފައިވީ ނަމަވެސް، ފުވައްމުލަކުގައި މިވަގުތު ކުރިއަށްދާ އެންމެ ބިޔަ މަޝްރޫޢުކަމަށްވާ ރަށުގެ މަގުތައް ޒަމާނީ މަގުތަކަކަށް ހެދުމުގެ މަސައްކަތް ހުއްޓާނުލައި އަންނަނީ ކުރަމުންނެވެ.
މިސިޓީގެ މަގުތަކަށް ދިމާވެފައިވާ މައްސަލަތައް ޙައްލުކުރުމަށް ކުރީގެ ސަރުކާރުތަކުންވެސް މަސައްކަތް ކުރައްވާފައިވެއެވެ. އެހެންނަމަވެސް މަސައްކަތް ފުރިހަމަނުކުރެވި ހުއްޓިފައި އޮންނަތާ އެތައް ދުވަހެއްފަހުން މިހާރުގެ ސަރުކާރުން ގެންދަވަނީ މިމަސައްކަތް އަލުން ފަށްޓަވައި ހަލުވި ދުވެލީގައި ހިންގަވަމުންނެވެ.
މިމަޝްރޫޢުގައި މިހާރު ކުރިއަށްދާ މަސައްކަތްތަކުގެތެރެއިން ފުވައްމުލައް ރިންގްރޯޑްގެ މަސައްކަތް ފާހަގަކޮށްލެވެއެވެ. ރައްޔިތުން ބޭނުންވި ބަދަލުތަކާއިއެކު މިމަސައްކަތް އެމްޓީސީއާ ޙަވާލުކޮށްގެން އަލުންފެށީ މިދިޔައަހަރުގެ ޖޫން މަހުއެވެ. ތާރުއަޅައިގެން ވިހި ހާސް ހަ ސަތޭކަ ފަންސާސް އަކަމީޓަރުގެ ސަރަޙައްދެއް ތަރައްޤީކުރާ މިމަސައްކަތް ވަނީ ނިމުމަކާ ގާތްވެފައެވެ.
މިވަގުތު ނުނިމިހުރި މަސައްކަތްކަކީ، ސްޕީޑް ބްރޭކަރުތައް ހަރުކުރުމާއި މަގުގައި ޓްރެފިކް ނިޝާންތައް ޖެހުމުގެ މަސައްކަތެވެ. އެމްޓީސީސީން ވިދާޅުވީ މުޅި މަޝްރޫޢުގެ މަސައްކަތް މިމަހުގެ 31ވަނަ ދުވަހަށް މުޅިން ނިންމާނެކަމަށެވެ. ފުވައްމުލަކު ރައްޔިތުންގެ މިހާރުގެ ކަންބޮޑުވުމަކީ ރަށުގެ އެތެރޭގެ މަގުތަކުގެ މައްސަލައެވެ.
ޖުމުލަ 31 މަގު ހިމެނޭހެން ފުވައްމުލަކުގެ އެތެރޭގެ މަގުތަކުގައި ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތް މިއަހަރުވަނީ އެމްޓީސީއާ ޙަވާލުކޮށް ފަށާފައެވެ.
"މިސާލެއް ދައްކަންޏާ ރަށުގެ މަގުތައް މިއޮންނަނީ އޮއްވަޅު ގޮނޑިއެއްހެން. މަގުތައް އަބަދު ލެވެލްކުރިއަސް ވާރޭ ވެހިލާއިރަށް ހަމަ އެގޮތަށް ބަދަލުވޭ. އެހާމެ މަގުތައް ޗަކަ. މިހާރު ވާރޭވެހުމުން 2 ދުވަސްތެރޭ މަގުތައްކުން ފެންގަނޑު ހިއްކައި ހެދޭ. ކުރިން މަހެއް ވަންދެންވެސް ފެންގަނޑު އޮވެދާނެ. ތާރުއެޅުމުން ބޮޑު ލުޔެއް ލިބޭނެ." ފުވައްމުލަކުގެ ޑެޕިއުޓީ މޭޔަރ މުޙައްމަދު ޟިރާރު ވިދާޅުވިއެވެ.
މަގުތައް ތަރައްޤީކުރަނީ ރައްޔިތުންގެ ޚިޔާލާއިއެކު، އެންމެ ލުއިފަސޭހަވާނެ ގޮތްތަކަށް ބަލައިގެންނެވެ.
"ރައްޔިތުން އެންމެ ގިނައިން ބޭނުންކުރާ މުހިންމު މަގުތައް މިހަދަންފެށީ. އެއީ ސްކޫލްތަކާއި، އޮފީތަކާއި ހޮސްޕިޓަލް އަދި އާއްމު އެހެނިހެން ޚިދުމަތްތަކަށް ބަލައިގެން މި މަގުތައް ކަނޑައެޅީ. މިމަގުތަކާއެކު ރައްޔިތުންނަށް ބޮޑެތި ލުއިފަސޭހަތައް ލިބެނޭ." ޟިރާރު ވިދާޅުވިއެވެ.
ފުވައްމުލަކުގެ މަގުތަކުގެ ޒަމާންވީ ދަތިކަމުގެ މައްސަލައަށް ޙައްލެއްލިބި، އަންނަ އަހަރުގެ ތެރޭގައި މަގުތައް ބޭނުންކުރަން ފެށޭނެކަމަށް އެމްޓީސީސީން ވިދާޅުވެއެވެ. މި މަސައްކަތް ހަލުވި ދުވެލީގައި ކުރިއަށްގެންދިއުމަށް އެ ކުންފުނިން އަންނަނީ މަސައްކަތް ކުރައްވަމުންނެވެ.