އުފެއްދުންތެރިކަމުގެ މައުރަޒުގައި ތަކެތި ބަލައިގަންނަ ތާރީޚްތައް އާއްމުކޮށްފި

ދިވެހިންގެ އުފެއްދުންތެރިކަމުގެ މައުރަޒުގައި ބައިވެރިކޮށްފައިވާ ތަކެތި ބަލައިގަންނަ ތާރީޚްތައް އާއްމުކޮށްފިއެވެ.

ދިވެހިންގެ އުފެއްދުންތެރިކަމުގެ މައުރަޒުގައި ވާދަކުރުމުގެ ބައިގައި ބައިވެރިވުމުގެ ފުރުޞަތު މިހާރު ވަނީ ބަންދުވެފައެވެ. އަދި ފޯމު ހުށައެޅި ފަރާތްތަކުން ހުށައަޅާ ހުށައެޅުންތައް ރަޖިސްޓްރީކުރުމުގެ ފުރުޞަތު މިހާރު އޮތީ ހުޅުވާލާފައެވެ. 700އަށްވުރެ ގިނަ މީހުން ވަނީ، ވާދަކުރުމުގެ ބައިގައި ބައިވެރިވާން ހުށައަޅާފައެވެ.

ބިޒްނަސް ސެންޓަރ ކޯޕަރޭޝަން، ބީސީސީން މަޢުލޫމާތުދޭގޮތުގައި މިހާތަނަށް 6000އަށްވުރެ ގިނަ ތަކެތި މައުރަޒުގައި ބެހެއްޓުމަށް ވަނީ ރަޖިސްޓްރީކޮށްފައެވެ.

މައުރަޒުގައި ބައިވެރިކުރާ ކާބޯތަކެތީގެ ގިންތިތަކާއި ބަލައިގަންނަ ތާރީޚް:

* ކާބޯތަކެތީގެ ގިންތި
* ދަނޑުވެރިކަމުގެ އުފެއްދުންތައް އަދި ވެލިއު އެޑިޝަން
* މަސްވެރިކަމުގެ އުފެއްދުންތައް އަދި ވެލިއު އެޑިޝަން

މިތަކެތި ބަލައިގަންނަ ތާރީޚް: 15 އޮކްޓޯބަރު

ކޭކް ޑެކަރޭޝަން:

ތަކެތި ބަލައިގަންނަ ތާރީޚް - 17 އޮކްޓޯބަރު

އެހެނިހެން ހުރިހާ އުފެއްދުންތައް:

ބަލައިގަން ތާރީޚް: 07 އޮކްޓޫބަރު އިން 13 އޮކްޓޯބަރަށް

އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ގިންތީގެ އުފެއްދުންތައް ބަލައިގަންނާނީ އޮންލައިން ލިންކެއް މެދުވެރިކޮށެވެ. އަދި އެ ލިންކް ފަހުން ހިއްސާކުރައްވާނެކަމަށް ބީސީސީން ވިދާޅުވެއެވެ.

ތަކެތި ބަލައިގަތުމަށް ހަމަޖެހިފައިވަނީ މި މުއްދަތުގެ ތެރޭގައި ކޮންމެ ދުވަހަކު ހެނދުނު 10:00 އިން ރޭގަނޑު 20:00 އަށް ހުޅުމާލެ ސެންޓްރަލް ޕާކްގައި މައުރަޒު ބޭއްވުމަށް ހަމަޖެހިފައިވާ ސަރަހައްދުގައެވެ. ތަކެތި ހަވާލުކުރާއިރު ޕޯޓަލް މެދުވެރިކޮށް ހުށަހަޅަންޖެހޭ ހުރިހާ މައުލޫމާތު ފުރިހަމަ ކުރަންވާނެއެވެ. އަދި ބަންދުކުރަންޖެހޭ ތަކެތި ހުންނަންވާނީ ރައްކާތެރިކަމާއެކު ބަންދުކޮށްފައިކަމަށް ބީސީސީން ވިދާޅުވެއެވެ.

މިއަހަރުގެ ދިވެހިންގެ އުފެއްދުންތެރިކަމުގެ މައުރަޒު އޮންނާނީ އޮކްޓޯބަރު 25އިން 2 ނޮވެންބަރަށެވެ.

މައުރަޒުގެ ޑިސްޓްރިކްޓްތަކުގައި ބައިވެރިވުމުގެ ފުރުޞަތު ވަނީ ހުޅުވާލާފައެވެ. އޭގެތެރެއިން ތަކެތި ވިއްކުމަށް ޚާއްސަ، މާކެޓް ޕްލޭސްގެ ހުރިހާ ޖާގަތަކަށް ހުޅުވާލި ދުވަހު ވަނީ އެޕްލިކޭޝަން ހުސްވެފައެވެ.

މިދިޔަ އަހަރު 5 ޑިސްޓްރިކް ހުރިނަމަވެސް، ތަފާތު އެކި ބާވަތުގެ އުފެއްދުންތެރިކަން ދައްކުވައިދޭ 7 ޑިސްޓްރިކްޓެއް ހުންނާނެއެވެ. އޭގެތެރޭގައި ދީނީ ދާއިރާ، ޓެކްނޮލޮޖީ ދާއިރާ، އަދި އިންޓަރނޭޝަނަލް ޑިސްޓްރިކްޓެއްވެސް މިއަހަރުގެ މައުރަޒުގައި ހިމެނެއެވެ.

މިމައުރަޒުގެ ބޭނުމަކީ ދިވެހިންގެ އުފެއްދުންތެރިކަން ކުރިއަރުވައި، ވިޔަފާރިތަކަށް މާކެޓް ހޯދައިދީ އީޖާދީ ޚިޔާލުތައް ބަދަލުކުރުމުގެ މަގު ފަހިކޮށްދިނުމެވެ.