އަމާޒަކީ 2023 ނިޔަލަށް ހުރިހާ ރަށެއްގައި ރައްކާތެރި ބޯފެނާއި ނަރުދަމާގެ ނިޒާމް ޤާއިމުކުރުން: އެންވަޔަރަންމަންޓް މިނިސްޓަރ
މި ސަރުކާރުގެ އަމާޒަކީ 2023 ވަނަ އަހަރު ނިމޭއިރު ރާއްޖޭގެ ހުރިހާ ރަށެއްގައި ރައްކާތެރި ފެނުގެ ނިޒާމަކާއި ނަރުދަމާގެ ނިޒާމެއް ޤާއިމުކޮށް ނިންމުންކަމަށް މިނިސްޓަރ އޮފް އެންވަޔަރަމަންޓް ޑރ.ހުސެއިން ރަޝީދު ޙަސަން ވިދާޅުވެއްޖެއެވެ.
ފެނާއި ނަރުދަމާގެ ޤައުމީ އެކްޝަން ޕްލޭން އިފްތިތާޙްކޮށްދެއްވައި ވާހަކަފުޅު ދައްކަވަމުން މިނިސްޓަރ ވިދާޅުވީ މިމަސައްކަތް ކުރަން ނިންމާފައި ވަނީ ރައްޔިތުންގެ އަތްފޯރާފަދަ އަގެއްގައި ތިމާވެއްޓާއި ރައްޓެހި ގޮތެއްގެ މަތިންކަމަށެވެ.
ފެނާއި ނަރުދަމާގެ ޤައުމީ އެކްޝަން ޕްލޭން އިފްތިތާޙްކުރުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް އެންވަޔަރަމަންޓް ޑރ.ހުސެއިން ރަޝީދު ޙަސަން ވިދާޅުވީ ސުނާމީއަށް ފަހު ރާއްޖޭގެ ގުދުރަތީ ފެނުގެ ނިޒާމަށް ބޮޑު ބަދަލުތަކެއް އައިސްފައިވާކަމަށެވެ. އެހެންކަމުން ދެމެހެއްޓެނިވި ގޮތުގައި ގުދުރަތީ ވަޞީލަތް ބޭނުންކުރުމަށް ރައްކާތެރި ގޮތެއްގެ މަތިން ފެން ބޭނުންކުރަންޖެހޭކަމަށެވެ. ސަރުކާރުގެ އަމާޒަކީ ރާއްޖޭގެ ހުރިހާ ރަށެއްގައި ކުރިއަށް އޮތް 3 އަހަރުގެތެރޭގައި ރައްކާތެރި ބޯފެނާއި ނަރުދަމާގެ ނިޒާމެއް ޤާއިމުކުރުމަށްކަމަށް މިނިސްޓަރ ވިދާޅުވިއެވެ. އެގޮތުން 44 ރަށެއްގައި ފެނުގެ ރައްކާތެރި ނިޒާމެއް ޤާއިމުކުރުމުގެ މަސައްކަތްކުރިއަށްދާކަމަށާއި ނަރުދަމާ ޤާއިމުކުރުމުގެ މަސައްކަތް 53 ރަށުގައި ކުރިއަށްދާކަމަށް އެންވަޔަރަމަންޓް މިނިސްޓަރ ވިދާޅުވިއެވެ. ރާއްޖޭގެ 180 އަށްވުރެ ގިނަ ރަށްރަށުގެ ތެރެއިން މިހާތަނަށް 69 ރަށުގައި ނަރުދަމާގެ ޚިދުމަތްވަނީ ޤާއިމުކޮށްފައެވެ. އަދި 42 ރަށުގައި ފެނުގެ ނިޒާމުވަނީ ޤާއިމުކޮށްފައެވެ.
" އަޅުގަނޑުމެން ބެލިއިރު ބައެއް ރަށްރަށުގައި އެބަހުރި ނަޖިސް ނައްތާލާ ޕްލާންޓްތައް ބަހައްޓާފައި އެކަމަކު އޭގެ ބޭނުންމެއް ނުކުރެވޭ. ގާތްގަނޑަކަށް ލައްކައެއްހާ ރުފިޔާ އެބަ އަރާ މަހެއްގެ މައްޗަށް ކައުންސިލްތަކުން މިޕްލާންޓުތައް ހިންގުމަށް. އަޅުގަނޑުމެން މަސައްކަތް މިކުރަނީ އަގުހެޔޮކޮށް ތިމާވެއްޓާ ރައްޓެހި ގޮތަކަށް ޕްލާންޓްތައް ބަހައްޓައިގެން ފެނާ ނަރުދަމާ ޤާއިމުކުރުމަށް." މިނިސްޓަރ ޑރ ހުސައިން ރަޝީދު ހަސަން ވިދާޅުވިއެވެ.
ފެނާއި ނަރުދަމާގެ ޤައުމީ އެކްޝަން ޕްލޭނަކީ އޯގަސްޓްމަހު ޢަމަލުކުރަން ފަށާފައިވާ ފެނާއި ނަރުދަމާގެ ޤާނޫނުގެ ދަށުން އެކުލަވާލަންޖެހޭ ޕްލޭނެކެވެ. މިޕްލޭންގެ ދަށުން ފެނާއި ނަރުދަމާގެ ޚިދުމަތް ދިނުމުގައި ދާއިރާގައި ޙަރަކާތްތެރިވާ ފަރާތްތަކަކީ، މިދާއިރާއިން ތަމްރީނުކޮށްފައިވާ އަދި ޚާއްސަ ލައިސަންސެއް އޮވެގެން މަސައްކަތްކުރާ ފަރާތްތަކަކަށް ހަދަންޖެހެއެވެ. މިހާރު ކުރިމަތިވެފައިވާ ކޯވިޑް-19ގެ ޚާއްސަ ޙާލަތާއިއެކުވެސް މިމަސައްކަތް ހުއްޓާނުލައި ކުރިއަށްގެންދާނެކަމަށް އެންވަޔަރަންމަންޓް މިނިސްޓްރީން ވިދާޅުވެއެވެ.
18 ލަނޑުދަނޑިއެއްގެ މައްޗަށް އެކުލެވޭ މި ޕްލޭންގެ ދަށުން ގުދުރަތީ ފެންފަށަލަ ރައްކާތެރިކުރުމަށް މަސައްކަތްކުރުމަށް އިތުރަށް މަސައްކަތްކުރަންޖެހޭއިރު ފެން ބޮޑުވެ ހިނގާ ކާރިސާތަކުން އަރައިގަތުމަށް ބާރުއެޅުމަށްވެސް ޚާއްސަ މަސައްކަތްތަކެއް ކުރަންޖެހެއެވެ.
މީގެ އިތުރުން ފެންނާއި ނަރުދަމާގެ ރައްކާތެރިކަން ކަށަވަރުކުރުމާ ގުޅޭގޮތުން ޢާއްމުން ހޭލުންތެރިކުރުމަށްވެސް މި އެކްޝަން ޕްލޭން ބާރުއަޅައެވެ. މީގެ ކުރިންވެސް ތަފާތު އެތައް ޕްލޭންތައް ހެދިފައި ވީނަމަވެސް މިފަހަރުގެ ފެނާ ނަރުދަމާގެ ޤައުމީ އެކްޝަން ޕްލޭނަކީ ޤާނޫނީ ބާރުލިބިގެން ވުޖޫދުވެފައިވާ ޕްލޭނަކަށްވުމުން ތަންފީޒުކުރުމުގައި ފަސޭހަތަކެއް ވާނެކަމަށް މިނިސްޓްރީން އޮފް އެންވަޔަރަމަންޓުން ދެކެއެވެ.