މިމަހުގެ 10ވަނަ ދުވަހު ލ.ގަމު ރީޖަނަލް ހޮސްޕިޓަލްގައި ސީޓީ ސްކޭންގެ ޚިދުމަތް ފެށުމަށް ތައްޔާރުވެއްޖެއެވެ.
ލ.މަގު ރީޖަނަލް ހޮސްޕިޓަލުގެ މެނޭޖަރ ހެލްތް ސަރވިސް ޢަލީ ނަޝީދު ވިދާޅުވީ މިހާރު ކުރިއަށްދަނީ ސީޓީ ސްކޭގެ ޚިދުމަތް ފެށުމަށް ބޭނުންވާ ފަހުގެ ތައްޔާރީތަކުގެ މަސައްކަތްތައްކަމަށެވެ. އެގޮތުން މެޝިން އިންސްޓޯލްކޮށް މިހާރު ކުރިއަށްދަނީ މެޝިން ޓެސްޓުކުރުމުގެ މަސައްކަތް ކަމަށްވެސް އޭނާ ވިދާޅުވިއެވެ.
ލ.ގަމު ރީޖަނަލް ހޮސްޕިޓަލުގައި އަލަށް ފަށާ މި ޚިދުމަތަކީ އެ ސަރަޙައްދުގައިވެސް އަލަށް ފަށާ ޚިދުމަތެކެވެ. ސީޓީ ސްކޭންއަކީ އާއްމުކޮށް ކުރާ ކުދި ޓެސްޓްތަކާއި ޚިލާފަށް، ހަށިގަނޑުގެ ބޮޑެތި ޓެސްޓުތައް ހެދޭ ޚިދުމަތެކެވެ. އެގޮތުން ލޭނާރުތަކާއި ކައްޓާއި އަދި އެހެނިގެން ގުނަވަންތަކުގެ ޒަމާނީ ތަޙުލީލުތައް ކުރެވޭ ޚިދުމަތެކެވެ.
"މިހާރު މިދަނީ މެޝިން ޓެސްޓުކުރަމުން. އަދި ރޫމްގައި ރޭޑިއޭޝަން ލީކް އުޅޭތޯވެސް ބެލުންފަދަ ކަންކަން މިކުރަނީ. މިމަހުގެ 10ވަނަ ދުވަހު ޚިދުމަތް ފެށުމަށްދަނީ ތައްޔާރުވަމުން." އަލީ ނަޝީދު ވިދާޅުވިއެވެ.
ގަމު ރީޖަނަލް ހޮސްޕިޓަލުގެ މެނޭޖަރ ޢަލީ ނަޝީދު ވިދާޅުވީ ސީޓީ ސްކޭންގެ ޚިދުމަތް ދިނުމުގެ މަސައްކަތުގައި ހަރަކާތްތެރިވާނީ ހޮސްޕިޓަލުގައި މިހާރުވެސް މަސައްކަތްކުރާ މުޢައްޒަފުންކަމަށެވެ.
އަލީ ނަޝީދު ވިދާޅުވީ ކޯވިޑް-19ގެ ޙާލަތާއި ގުޅިގެން އެ ހޮސްޕިޓަލުން ޚިދުމަތް ހޯދާ މީހުންގެ އަދަދުވެސް ވަރަށް ބޮޑަށް އިތުރުވެފައިވާކަމަށެވެ. އެގޮތުން މާލެ އަތޮޅުން ފެށިގެން ލ.އަތޮޅާއި ދެމެދުގެ ރަށްތަކުން މިހާރު ޑޮކްޓަރަށް ދެއްކުމަށާއި ޓެސްޓްތައް ހެދުމަށް އެ ހޮސްޕިޓަލަށް އަންނަ ކަމަށްވެސް އޭނާ ވިދާޅުވިއެވެ.
"ކުރިން 100ވަރަކަށް މީހުން އެވަރެޖްކޮށް ޑޮކްޓަރަށް ދައްކާނީ. މިހާރު 300އަށްވުރެ ގިނަ މީހުން ދުވާލަކު އެބަ ޑޮކްޓަރަށް ދައްކާ" ޢަލީ ނަޝީދު ވިދާޅުވިއެވެ.
އަލީ ނަޝީދު ވިދާޅުވީ އިތުރު ޓެސްޓުތަކެއް ހެދޭ ލެބް މެޝިނެއްވެސް އެ ހޮސްޕިޓަލުގައި އިންސްޓޯލްކުރަމުންދާކަމަށެވެ. އަދި ބަލިމީހުން ބެލުމަށް އިތުރު 6 ކޮޓަރިއާއި، ވެއިޓިންގ އޭރިއާއެއްގެ މަސައްކަތްވެސް ކުރިއަށްދާކަމަށެވެ. މި މަސައްކަތްތައްވެސް ނިންމައި މިމަހުގެ 10ވަނަ ދުވަހު އެ މެޝިން ބޭނުންކުރަން ފެށުމަށް ތައްޔާރުވަމުންދާކަމަށްވެސް އޭނާ ވިދާޅުވިއެވެ. އަދި އެ ހޮސްޕިޓަލުގެ ހުރިހާ ވޯޑުތަކާއި، ވެއިޓިންގ އޭރިއާތައްވެސްވަނީ އޭސީކޮށްފައެވެ.
ނަޝީދު ވިދާޅުވީ އެ ހޮސްޕިޓަލުގެ ބައެއް ޑޮކްޓަރުން މިވަގުތު ރަށުގައި ކަރަންޓީނުގައި ތިބުމާއެކު ބައެއް ޚިދުމަތްތައް މެދުކެނޑިފައިވާ ކަމަށެވެ. ނަމަވެސް އެ ޑޮކްޓަރުންވެސް މިމަހުގެ 15ގައި މަސައްކަތާއި ގުޅޭނެކަމަށް އޭނާ ވިދާޅުވިއެވެ. ލ.ގަމު ރީޖަނަލް ހޮސްޕިޓަލުގައި ކޯވިޑް ފެސިލިޓީއެއްވެސް އަންނަނީ ހިންގަމުންނެވެ. މިހާތަނަށް އެ ފެސިލިޓީގައި ދެ މީހަކަށް ފަރުވާދީފައިވެއެވެ.