ޢާންމުން އެއްވެ އުޅޭ ތަންތަނުގައި ކޯވިޑް-19ގެ ޙާލަތުގައި އަޅަންޖެހޭ ފިޔަވަޅުތައް އަޅާފައިވާ މިންވަރު ބެލުމަށް ކުރިއަށްގެންދިޔަ ބޮޑު އިންސްޕެކްޝަންގައި އެޗްޕީއޭގެ މިންގަނޑުތަކަށް ފުރިހަމައަށް އަމަލުކުރާ އެއްހާހެއްހާ ތަން ފާހަގަކުރެވިފައިވާކަމަށް މާލެ ސިޓީ ކައުންސިލުން ހާމަކޮށްފިއެވެ.
މި އިންސްޕެކްޝަނަކީ އެޗްޕީއޭއާއި އެމްއެފްޑީއޭއާއި އިކޮނޮމިކް މިނިސްޓްރީއާއި މާލެ ސިޓީ ކައުންސިލާއި ވެމްކޯއާއި މޯލްޑިވްސް ޕޮލިސް ސަރވިސްއާއި އެމްއާރްސީ އަދި އެޗްޑީސީ ގުޅިގެން ކުރިއަށްގެންދާ އިންސްޕެކްޝަނެކެވެ.
މިމަހުގެ 12ވަނަ ދުވަހު ކުރިއަށް ގެންދިޔަ މި އިންސްޕެކްޝަންގެ މަޢުލޫމާތު ޙިއްސާކުރަވަމުން މާލެ ސިޓީގެ ޑެޕިއުޓީ މޭޔަރ ޝަމާޢު ޝަރީފް ވިދާޅުވީ، މި އިންސްޕެކްޝަންގައި ބަލާފައިވަނީ، މާލެ ސަރަހައްދުގައި ހިންގާ ކާބޯތަކެތި ވިއްކާ ތަންތަނާއި، ފިހާރަތަކާއި، ކެފޭ ރެސްޓޯރެންޓްތަކާއި ޖިމްތަކާއި، ސެލޫންތަކާއި މާރުކޭޓްތައްކަމަށެވެ.
މި އިންސްޕެކްޝަންގައި ތަންތަން ހިންގުމަށް ނަގަންޖެހޭ ހުއްދަ ނަގާފައި އޮތްތޯ ބެލުމާއި، އެޗްޕީއޭގެ ޤަވާޢިދުތަކަށް ޚިދުމަތުގެ ފެންވަރު ދެވޭތޯ ވަނީ ބަލާފައެވެ. އެގޮތުން މި އިންސްޕެކްޝަންގައި މިހާތަނަށް މާލެ ހުޅުމާލެ ވިލިމާލެ އަދި ތިލަފުށީގެ 1475 ތަނެއް ބަލާފައިވާއިރު މިތަންތަނުގެ ހާލަތު މިންކުރެވިފައިވާކަމަށެވެ. 44 އިންސްޕެކްޓަރުން ހަރަކާތްތެރިވި މި އިންސްޕެކްޝަންގައި އެޗްޕީއޭގެ ގަވައިދުތަކަށް ފުރިހަމައަށް ތަބާވެފައިވާ އެއްހާހެއްހަތަން ފާހަގަކުރެވުފައިވާކަމަށް ޝަމާއު ވިދާޅުވިއެވެ. މި އިންސްޕެކްޝަނުން މާލޭގެ މައި މާރުކޭޓުތައް ފިޔަވާ ދެން ހުރި ބައެއް ކުދި މާރުކޭޓްތަކުގެ ހާލަތު އެންމެ އެކަށޭނަ ގޮތުގައި ނެތްކަން ފާހަގަކުރެއްވިއެވެ. އަދި ބިދޭސީން އެކަނި މަސައްކަތް ކުރާ ތަންތަނުގެ ހާލަތު ދަށްކަން މާލެ ސިޓީގެ ޑެޕިއުޓީ މޭޔަރ ފާހަގަކުރެއްވިއެވެ.
"އަޅުގަނޑުމެންނަށް ފާހަގަވި ބައެއް ކަންކަމަށް ބަލާއިރު އެންމެ ރަނގަޅު އަދި މީޑިއަމް ލެވެލްއަށް ސްޓިކަރ ދިނީ. ދެން މިދިނީ ފުރުސަތެއް. އަޅުގަނޑުމެންނަށް މި އިންސްޕެކްޝަނުން އިނގުނު ފިހާރަތަކުގައި ތިބޭ މީހުންނަށް ކޯވިޑާއި ގުޅޭ މަޢުލޫމާތު އެންމެ ރަނގަޅަށް ނޭނގޭކަންވެސް" މާލެ ސިޓީގެ ޑެޕިއުޓީ މޭޔަރ ޝަމާޢު ޝަރީފު ވިދާޅުވިއެވެ.
އެޗްއީއޯސީގެ ނޫސްވެރިންގެ ބައްދަލުވުމުގައި ވާހަކަދައްކަވަމުން މާލެ ސިޓީގެ ޑެޕިއުޓީ މޭޔަރވަނީ ތަންތަން މިންކޮށް ސްޓިކަރ ދިންކަމުގައި ވީނަމަވެސް، އާންމުން މިފަދަ ތަންތަނަށްގޮސް ހަރަކާތްތެރިވުމުގައި ސަމާލުވާންޖެހޭކަމަށެވެ. އެގޮތުން ފަރުދީ ޒިންމާ އިސްކުރަންޖެހޭކަން ޝަމާއު ފާހަގަކުރެއްވިއެވެ.
"އަޅުގނޑު ދޫކޮއްލާނީ މިކަން ފަރުދީ ޒިންމާއަށް. އާންމުނަށްވެސް ތަންތަން ބަލާލީމަ އިނގޭނެ ހާލަތު. ސްޓިކަރ އެބަދެން. އެކަމަކު ސްޓިކަރއަށްވުރެ އާންމުން ވަޒަންކޮސް ފަރުދީ ޒިންމާ ނަގަންޖެހޭނީ. ފިހާރައަކަށް ވަނަސް ނުވަތަ އެހެންތަނަކަށް ދިޔަނަމަވެސް" މާލެ ސިޓީގެ ޑެޕިއުޓީ މޭޔަރ ޝަމާޢު ޝަރީފު ވިދާޅުވިއެވެ.
މި ބޮޑު އިންސްޕެކްޝަނަށް ފަހުވެސް އިތުރު އިންސްޕެކްޝަންތައް ކުރިއަށްދާނެކަން ޝަމާއު ފާހަގަކުރެއްވިއެވެ. މިއިންސްޕެކްޝަންގައި ކޮންސްޓްރަކްޝަން ސައިޓްތައް ނުހިމެނޭކަން ފާހަގަކުރައްވާ ޝަމާއު ވަނީ މިތަންތަނުގެ ޙާލަތުވެސް ސިޓީ ކައުންސިލުން ގާތުން ބަލަމުންދާކަމަށް ވިދާޅުވެފައެވެ. މި އިންސްޕެކްޝަންގައި އެއްވެސް ފަރާތްކާއި ދެކޮޅަށް ފިުޔަވަޅެއް އަޅާފައިނުވާކަން ޝަމާއު ފާހަގަކުރެއްވިއެވެ.