ނިމުނު ހަފުތާ: ތިލަފުށީ ޕޯޓާއި، ތަރައްޤީގެ ބިޔަ މަޝްރޫއުތައް ކުރިއަށް

ނިމުނު ހަފުތާގައިވެސް ތަފާތު އެކި ދާއިރާތަކުން މުހިންމު ކަންތައްތަކެއް ހިނގާދިޔައެވެ. (25 ސެޕްޓެންބަރު) ޕީއެސްއެމް ނިއުސްގެ "ނޭޝަން ޗެޓް" ޕްރޮގްރާމުގެ އައު އެޕިސޯޑެއް ގެނެސްދީފައިވަނީ މިދިޔަ ހުކުރު ދުވަހުއެވެ. މި ޕްރޮގްރާމަކީ ސަރުކާރުގެ މަސައްކަތްތަކާ ގުޅޭ މައުލޫމާތު ރައްޔިތުންނާ ހަމައަށް ގެނެސްދިނުމަށްޓަކައި ކުރިއަށްގެންދާ ޕްރޮގްރާމެކެވެ. މި ޕްރޮގްރާމުގައި ރައްޔިތުންނަށް މައުލުމާތު ފޯރުކޮށްދެއްވާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

ނޭޝަން ޗެޓް" ޕްރޮގްރާމުގެ އުސްއަލިތައް:

- ބޭރު ފަރާތަކަށް ބިން މިލްކުވާނެ ފުރުސަތެއް ނުދެއްވާނެ ކަމަށް ރައީސުލްޖުމްހޫރިއްޔާ ވިދާޅުވުން
- އީގަލް ހިލްސްގެ މަޝްރޫޢަކީ ރަސްމާލޭގެ ބޯހިޔާވަހިކަމަށް ހުރަސްއެޅޭނެ މަޝްރޫޢެއްނޫން ކަމަށް ރައީސުލްޖުމްހޫރިއްޔާ ވިދާޅުވުން
- އިންވެސްޓަރުންގެ އިތުބާރު ހޯދަނީ ދަރަނި ދައްކައި ރައްޔިތުންގެ ބޭނުންތައް ފުއްދަމުން ކަމުގައި ރައީސުލްޖުމްހޫރިއްޔާ ވިދާޅުވުން
- ދަތިތަކެއް ހުއްޓަސް އަންނަ އަހަރު ގިނަ މަޝްރޫޢުތަކެއް ނިމޭނެ ކަމަށް ރައީސުލްޖުމްހޫރިއްޔާ ވިދާޅުވުން

ނިމުނު ހަފުތާގައި ރައީސުލްޖުމްހޫރިއްޔާގެ ދެކަނބަލުން ވަނީ ސިންގަޕޫރަށް ނުރަސްމީ ދަތުރުފުޅެއް ކުރައްވާފައެވެ. ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ސިންގަޕޫރަށް ފުރާވަޑައިގަތީ މިމަހުގެ 26ވަނަ ދުވަހުގެ ރޭގެ ވަގުތެއްގައެވެ. އަދި ދަތުރުފުޅު ނިންމާލެއްވީ މިމަހުގެ 29 ވަނަ ދުވަހުއެވެ. ރައީސުލްޖުމްހޫރިއްޔާ ކުރައްވާ ބައެއް ނުރަސްމީ ދަތުރުފުޅުތަކުގައި، އެމަނިކުފާނު ކުރައްވާ އިދާރީ މަސައްކަތްޕުޅުތަކުގެ ޚަރަދާއި، ޢާއިލާއާއި އަމިއްލަފުޅު ކަންކަންވެސް ހިމެނޭގޮތުން، މުޅި ދަތުރުފުޅުގެ ހުރިހާ ޚަރަދެއްވެސް ކުރައްވަނީ ރައީސުލްޖުމްހޫރިއްޔާ އަމިއްލަފުޅަށެވެ.

(1 އޮކްޓޫބަރު) މާލޭގެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ރައީސުލްޖުމްހުރިއްޔާ ޑރ.މުޙައްމަދު ބައްލަވާލެއްވީ މިދިޔަ ބުރާސްފަތި ދުވަހުއެވެ. ރައީސްގެ މި ޒިޔާރަތުގައި އިޤްތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު، ވަޒީރު، އެމްޕިއެލްގެ ސިއީއޯ ޙުސައިން ޝަފީޤް ބައިވެރިވެވަޑައިގެންނެވިއެވެ. އަދި މި ޕްރޮޖެކްޓްގެ އިންޓަރނޭޝަނަލް ކީ ވޯލްގެ މަސައްކަތް ކުރިއަށްގެންދާ ޗައިނާގެ ކުންފުނިން ބައިވެރިވިއެވެ. ރާއްޖޭގެ މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރުޢުކުރިއަށްދާ ގޮތް ބައްލަވާލެއްވުމަށްފަހު ރައީސުލްޖުމްހޫރިއްޔާ ވިދާޅުވީ މަޝްރޫޢުގެ މަސައްކަތް ކުރިއަށްދާގޮތާމެދު ވަރަށް ހިތްހަމަޖެހޭކަމަށެވެ. ރައީސް ވަނީ މިހާތަނަށް ކުރިއަށްގެންދިޔަ މަސައްކަތްތަކާއި މުޅި މަޝްރޫޢުގެ މަރުހަލާތައް ބެހިފައިވާގޮތާއި މަސައްކަތްތައް ނިންމުމަށް ކުރަމުންދާ މަސައްކަތްތަކުގެ އަދާހަމަ ބައްލަވާލައްވާފައެވެ. މާލެ ވިޔަފާރި ބަނދަރު ތިލަފުއްޓަށް ބަދަލުކުރުމުން ރާއްޖޭގެ އިގްތިސާދަށް ބޮޑު ކުރިއެރުމެއް އަންނާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިޢްޒު ވިދާޅުވިއެވެ.

ވަޠަނީ ޚިދުމަތުގެ ޕްރޮގްރާމަށް 1 އަހަރު:

(1 އޮކްޓޫބަރު) ވަޠަނީ ޚިދުމަތުގެ ޕްރޮގްރާމަށް އެއް އަހަރު ފުރިފައިވަނީ ބުރާސްފަތި ދުވަހުއެވެ. މިދިޔަ އަހަރުގެ އޮކްޓޫބަރު މަހުގެ 1 ވަނަ ދުވަހު ތަމްރީންތައް ފެށި ވަތަނީ ޚިދުމަތުގެ ޕްރޮގްރާމްގެ ފުރަތަމަ ބެޗުގެ 344 ދަރިވަރުން ތަމްރީން ފުރިހަމަ ކުރުމަށްފަހު، ދަސްވެނިވީ މިދިޔަ އަހަރުގެ ޑިސެމްބަރުމަހުގެ 28 ވަނަ ދުވަހުއެވެ. ވަތަނީ ޚިދުމަތުގެ ޕްރޮގްރާމްގެ ދަށުން މިހާތަނަށް 3 ބެޗު ތަމްރީން ފުރިހަމަ ކޮށްފައިވާއިރު، ދެވަނަ ބެޗުގައި 343 ދަރިވަރުން އަދި 3 ވަނަ ބެޗުގައި 341 ދަރިވަރުން ވަނީ ޕްރޮގްރާމް ފުރިހަމަކުރުމަށްފަހު، ދަސްވެނިވެފައެވެ. ވަޠަނީ ޚިދުމަތުގެ ޕްރޮގްރާމުގެ ދަށުން މިހާތަނަށް ޓްރެއިނިން ނިންމާފައިވާ ޒުވާނުންގެ ތެރެއިން 400 އެއްހާ ޒުވާނުންނަށް ވަޒީފާގެ ފުރުސަތުތައް ހަމަޖެހިފައިވާކަމަށް ދިފާޢީ އަދި ވަޠަނީ ޚިދުމަތާ ބެހޭ ވުޒާރާއިން ވިދާޅުވެއެވެ.

ދިވެހި ވަޠަނީ ޚިދުމަތުގެ ޕްރޮގްރާމަށް އަހަރު ފުރުމާއި ގުޅިގެން ސޯޝަލް މީޑީއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ދިވެހި ވަޠަނީ ޚިދުމަތުގެ ޕްރޮގްރާމުގެ ތެރެއަށް ފަންނީ އިތުރު ދާއިރާތައް ތަޢާރަފްކޮށް، ނޭޝަނަލް ސަރވިސްގެ އިންޓަރންޝިޕް ޕްރޮގްރާމްތައްވެސް ތަޢާރަފްކުރެވޭނެ ކަމަށެވެ.

(1 އޮކްޓޫބަރު) ކުންފުނީގެ ޤާނޫނުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުން، "ނޭޝަނަލް އެކްސްޗޭންޖް ލިމިޓެޑް"ގެ ނަމުގައި ސަރުކާރުގެ ކުންފުންޏެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފައްދަވާފައިވަނީ މިދިޔަ ބުރާސްފަތި ދުވަހުއެވެ. މިއީ، ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާއިރު، ސަރުކާރުގެ އެހީތެރިކަމާއެކު ދެވަނަ ހިއްސާގެ ބާޒާރެއް ކުރިޔަށް ގެންދިޔުމަށްޓަކައި %100 ސަރުކާރު ހިއްސާވާގޮތަށް އުފައްދަވާފައިވާ ކުންފުންޏެކެވެ.

މި ކުންފުނީގެ މަޤުސަދުތަކުގެ ތެރޭގައި ދިވެހި ސަރުކާރުގެ ފަރާތުން ދިވެހިރާއްޖޭގެ ކެޕިޓަލް މާކެޓް ކުރިއަރުވައި، މާކެޓުގެ އިތުބާރާއި ދެފުށް ފެންނަ މިންވަރު އިތުރުކުރުމާއި، ޒަމާނީ ސެކިއުރިޓީޒް އެކްސްޗޭންޖުތަކާއި ޓްރޭޑިންގ ފެސިލިޓީތައް ޤާއިމުކޮށް ހިންގުމާއި، ދައުލަތުގެ ސެކިއުރިޓީޒްއާއި އިސްލާމީ ޝަރީޢާގެ ހަމަތަކަށް ފެތޭ ސުކޫކާއި އެހެނިހެން މާލީ ވަސީލަތްތައް ނެރުން ހިމެނެއެވެ.

އދ. ގެ ޢާންމު މަޖިލީހުގެ 81 ވަނަ ސެޝަން:

އދ. ގެ ޢާންމު މަޖިލީހުގެ 81 ވަނަ ސެޝަންގެ ހައި-ލެވެލް ހަފުތާގެ ބައެއް ޙަރަކާތްތައް މި ނިމުނު ހަފުތާގެތެރޭގައިވެސް ކުރިއަށްގެންގޮސްފައިވެއެވެ. (25 ސެޕްޓެންބަރު) ޔަހޫދީންގެ ބޮޑުވަޒީރު އދ. އާންމު މަޖިލީހުގައި ވާހަކަ ދައްކަން ފެށުމުގެ ކުރިން އެކަމާ ދެކޮޅަށް އިހްތިޖާޖު ކުރުމުގެ ގޮތުން ދިވެހި ރާއްޖޭގެ ވަފުދުން އާންމު މަޖިލީހުގެ ޖަލްސާ ދޫކޮށް ނިކުމެފައިވަނީ މިދިޔަ ހުކުރު ދުވަހުއެވެ. އދ. އާންމު މަޖިލީހުގެ ޖަލްސާގައި ޔަހޫދީން ބޮޑުވަޒީރު، ބެންޖަމިން ނަތަންޔާހޫގެ ވާހަކައިގެ ކުރިއަށް ރާއްޖެ ހިމެނެހޭން ގިނަ ޤައުމުތަކުން ވަނީ އާންމު މަޖިލީހުގެ ޖަލްސާ ދޫކޮށް ނުކުމެވެ. މިއީ މިގޮތަށް ދިވެހިރާއްޖެއިން ޢަމަލު ކުރި 3 ވަނަ އަހަރެވެ. މިއަހަރު އާންމު މަޖިލީހުގެ ބައްދަލުވުމުގައި ދިވެހި ސަރުކާރުގެ ވަފުދުގެ އިސްވެރިއެއްގެ ގޮތުގައި ވަޑައިގެންފައިވަނީ ރައީސުލްޖުމްހޫރިއްޔާގެ ނައިބު ހުސެއިން މުޙައްމަދު ލަތީފްއެވެ.

އެމެރިކާގެ ނިއުޔޯކުގައި ކުރިއަށްދާ އދ. ގެ ޢާންމު މަޖިލީހުގެ 81 ސެޝަންގައި ދިވެހިރާއްޖޭގެ ފަރާތުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް
ތަޤުރީރު ކުރެއްވީ މިދިޔަ ހުކުރު ދުވަހުއެވެ. އދ.ގެ އާންމު މަޖިލީހުގައި ތަޤުރީރު ކުރައްވަމުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވަނީ ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ޤަތުލުޢާންމާއި ހަނގުރާމައިގެ ޖަރީމާތައް ކުށްވެރިކުރައްވާ ޤަތުލުޢާންމު ހުއްޓާލުމަށް ގޮވާލައްވާފައެވެ. އަދި ފަލަސްޠީނާއި އެހެނިހެން ބިންތައް އިސްރާއީލުން ޤާނޫނާ ޚިލާފަށް ހިފާފައި އޮތް އޮތުން ނިމުމަކަށް ގެންނަން ޖެހޭކަމަށާއި ޤާނޫނާ ޚިލާފަށް ވަޒަންވެރިކުރުވުން ހުއްޓާލަން ޖެހޭކަމަށްވެސް ވިދާޅުވިއެވެ.

ވިޔަފާރީގެ ދާއިރާ

ވިޔަފާރީގެ ދާއިރާއިން ފާހަގަކޮށްލެވޭ ޚަބަރުަތަކަށް ބަލާލާއިރު، (28 ސެޕްޓެންބަރު) އިންޑިއަން އޯޝަންސް ލީޑިން ޑެސްޓިނޭޝަންގެ މަޤާމު 7 ވަނަ ފަހަރަށް ރާއްޖެއަށް ލިބިފައިވަނީ މިދިޔަ ހޯމަ ދުވަހުއެވެ. ރާއްޖެއަށް މީގެއިތުރުން 4 ދާއިރާއަކުން އެވޯޑު ލިބިފައިވާއިރު ވިޒިޓް މޯލްޑިވްސް ކޯޕަރޭޝަނަށް ވަނީ އިންޑިއަން އޯޝަންސް ލީޑިންގ ޓޫރިސްޓް ބޯޑުގެ ލަޤަބުވެސް ލިބިފައެވެ. ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސް ރޯޑްސްގައިވަނީ "ވޯލްޑް ޓްރެވެލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ 2026" ބާއްވާފައެވެ. މިހަފްލާގައި ރާއްޖެއިން 5 އެވޯޑެއްވަނީ ހޯދާފައެވެ.

(29 ސެޕްޓެމްބަރު) ޤައުމީ އެއާލައިން، މޯލްޑިވިއަންގެ އައު ސީޕްލޭން ޓާމިނަލް ރަސްމީކޮށް ހުޅުވާފައިވަނީ މިދިޔަ އަންގާރަ ދުވަހުއެވެ. މި ޓާމިނަލް ރަސްމީކޮށް ހުޅުއްވައިދެއްވީ އެކަމަށްޓަކައި ބޭއްވި ޚާއްޞަ ރަސްމިއްޔާތެއްގައި ފަތުރުވެރިކަމާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ. މޯލްޑިވިއަންގެ އައު ސީޕްލޭން ޓާމިނަލަކީ މުޅި އިމާރާތް އެއްކޮށް ޒަމާނީ ފެންވަރަށް ބަދަލުކޮށް، ލަގްޒަރީ ފެންވަރުގެ ޚިދުމަތްތަކެއް ލިބޭނޭހެން ތަރައްޤީކޮށްފައިވާ ތަނެކެވެ. އަދި މި ޓާމިނަލް ފަރުމާކޮށްފައިވަނީ ރިސޯޓުތަކާއި އެހެނިހެން ހިއްސާދާރުންނާ ގާތުން މަޝްވަރާކޮށް، ފަތުރުވެރިންނަށް އެންމެ ފުރިހަމަ ތަޖުރިބާއެއް ފޯރުކޮށްދިނުމުގެ މަޤްޞަދުގައި ކަމަށް މޯލްޑިވިއަނުން ވިދާޅުވިއެވެ.

(30 ސެޕްޓެމްބަރު) އައްޑޫ ސިޓީ ކަރަންޓުގެ ޚިދުމަތާއި ސްޓޭޓް އިލެކްޓްރިކް ކޮމްޕެނީ، ސްޓެލްކޯއިން ރަސްމީކޮށް ހަވާލުވީ ނިމުނު ހަފުތާގެތެރޭގައެވެ. ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ރަސްމީކޮށް ފެށުމަށްޓަކައި މިއަދު އައްޑޫ ސިޓީ ހިތަދޫގައި ދިދަ ނެގުމުގެ ޚާއްޞަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތުގައި ޤައުމީ ދިދަ ނަންގަވައިދެއްވީ ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރާއި، ޑެޕިއުޓީ މެނޭޖިންގ ޑިރެކްޓަރ ޢާއިޝަތު މުޒްނާއެވެ. މި ރަސްމިއްޔާތުގައި ވާހަކަ ދައްކަވަމުން ސްޓެލްކޯގެ މެނޭޖިންގ ޑިރެކްޓަރ ޑރ. ޢަލީ އަޒުވަރު ވަނީ މީގެ 17 އަހަރު ކުރިން ސްޓެލްކޯއިން އައްޑޫ ސިޓީގައި ކަރަންޓުގެ ޚިދުމަތް ދެމުން އައިކަން ފާހަގަކުރައްވާފައެވެ. އަދި އައްޑޫ ސިޓީގެ ކަރަންޓުގެ ޚިދުމަތް އަލުން އަނބުރާ ސްޓެލްކޯއާ ޙަވާލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމަކީ އައްޑޫގެ ރައްޔިތުންނަށް އިތުބާރުހުރި، ދެމެހެއްޓެނިވި ޚިދުމަތެއް ކަށަވަރުކޮށްދެއްވުމަށް އެޅުއްވި މުހިންމު ފިޔަވަޅެއް ކަމަށް ޑރ. އަޒުވަރު ވިދާޅުވިއެވެ.

(1 އޮކްޓޫބަރު) ރާއްޖެއިން ބޭރުގައި ރަޖިސްޓްރީވެގެން މަަސައްކަތް ކުރާ ފަތުރުވެރިކަމުގެ އެކި ޕްލެޓްފޯމްތަކުން ޖީއެސްޓީ ނެގުމަށް މުދަލާއި ޚިދުމަތުން ޓެކްސް ނެގުމުގެ ޤާނޫނަށް ގެނައި 8 ވަނަ އިސްލާހަށް ޢަމަލުކުރަން ފަށާފައިވަނީ މިދިޔަ ބުރާސްފަތި ދުވަހުއެވެ. ޤާނޫނަށް ޢަމަލުކުރަން ފަށާފައިވަނީ، އެ ޤާނޫނާއި ގުޅިގެން ހަދަންޖެހޭ ޤަވާއިދުތައް ހެދުމަށްފަހު މީރާ މެދުވެރިކޮށް އެ ވިޔަފާރިތައް ރަޖިސްޓްރީވުމުގެ ފުރުސަތު ދިނުމަށްފަހުއެވެ.

އެހެނިހެން ޚަބަރުތައް

(26 ސެޕްޓެމްބަރު) ރާއްްޖެއަށް ވައިގެ މަގުން އަންނަ މީހުންނާއި ފުރާ މީހުންގެ މައުލޫމާތު މޯލްޑިވްސް އިމިގްރޭޝަނަށް ފޯރުކޮށްދިނުމުގެ ޤަވާއިދެއް އެކުލަވާލާފައިވަނީ ހޮނިހިރު ދުވަހުއެވެ. މި ޤަވާއިދަކީ ރާއްްޖެއަށް ވައިގެ މަގުން އަންނަ އުޅަނދުފަހަރާއި ވައިގެ މަގުން ފުރާ އުޅަނދުފަހަރާއި އެ އުޅަނދު ފަހަރުގައި ދަތުރުކުރާ މީހުންގެ މައުލޫމާތު ހޯދުމަށް އިމިގްރޭޝަންގެ ޤާނޫނުގެ ދަށުން އެކުލަވާލާފައިވާ ޤަވާއިދެކެވެ. މި ޤަވާއިދު އެކުލަވާލުމުގެ މަޤްޞަދަކީ ރާއްޖޭގެ ސަލާމަތާއި ރައްކާތެރިކަން ކަށަވަރު ކުރުމެވެ. އެގޮތުން ބިދޭސީންގެ ތެރެއިން ނުރައްކާތެރި ކުށްކުށާއި އިންތިޒާމުވެގެން ކުރާ ބޮޑެތި ކުށްތަކުގައި ޝާމިލުވާ މީހުންނާއި ޓެރަރިސްޓް ޖަމާޢަތްތަކަށް ނިސްބަތްވާ މީހުންނާއި، އެފަދަ ޖަމާޢަތްތަކާ ގުޅުންހުރިކަމަށް ބެލެވޭ މީހުންނާއި، ޓެރަރިސްޓުންކަމަށް މައުލޫމާތު ލިބިފައިވާ މީހުން ރާއްޖެ އެތެރެވުމުގެ ކުރިން ދުރާލައި ދެނެގަތުމަށް މަގުފަހިވާނެ އިންތިޒާމެއް ހަމަޖެއްސުން ހިމެނެއެވެ.

(27 ސެޕްޓެމްބަރު) ކޮލެޖެއްގެ ގޮތުގައި ހިންގާތާ 15 އަހަރު ވުމުން ޔުނިވަރސިޓީއެއްގެ ގޮތުގައި ރަޖިސްޓްރީކޮށްދޭ ގޮތަށް ހަމަޖައްސައި ދިވެހިރާއްޖޭގައި ޔުނިވަރސިޓީތައް ހިންގުމުގެ ޤަވާއިދު އެކުލަވާލާފައިވަނީ އާދިއްތަ ދުވަހުއެވެ. މަތީ ތަޢުލީމުގެ ޤާނޫނުގެ ދަށުން ހެދި "ދިވެހިރާއްޖޭގައި ޔުނިވަރސިޓީތައް ރަޖިސްޓްރީކޮށް ހިންގުމުގެ ޤަވާއިދު"ގައި ވަނީ ޔުނިވަރސިޓީއަކަށް ބަދަލުވާނެ މުއްދަތާއި އެ ތަނުގައި ހުންނަން ޖެހޭ ޝަރުތުތައް ބަޔާންކޮށްފައެވެ. މި ޤަވާއިދުގެ މަޤުޞަދަކީ ރާއްޖޭގައި ޔުނިވަރސިޓީ ރަޖިސްޓްރީކުރުމާއި ޔުނިވަރސިޓީ ހިންގުމާއި ޔުނިވަރސިޓީ އުވާލުމާގުޅޭ ކަންކަމުގައި އެއް މިންގަނޑައެއްގެ ދަށުން ޢަމަލުކުރާނެ އުޞޫލްތައް ކަނޑައެޅުމާއި ޔުނިވަރސިޓީތަކުގެ މިންގަނޑުތައް ބަޔާންކުރުމެވެ.

(27 ސެޕްޓެމްބަރު) ސަރުކާރުގެ ވުޒާރާތަކުން ކުރަމުން އަންނަ މަސައްކަތްތަކުގެ އަދާހަމަ ހިއްސާކުރުމަށާއި، ވަޒީރުންނާއި ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް ބާއްވާ ވަޒީރުންގެ "އަހާ" ފޯރަމް ކުރިއަށް ގެންގޮސްފައިވަނީ ނިމުނު ހަފުތާގެ އާދިއްތަ ދުވަހުއެވެ. ސަރުކާރުގެ އެކި ވުޒާރާތަކުގެ މަސައްކަތްތަކުގެ ތަފްސީލީ މަޢުލޫމާތު އާންމުންނާ ހަމައަށް ގެނެސްދިނުމަށް ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ، ޕީއެސްއެމް ގުޅިގެން ގެނެސްދޭ މި ފޯރަމްގައި މި ފަހަރުވެސް، 3 ވަޒީރަކު ބައިވެރިވެވަޑައިގެންނެވިއެވެ.

(28 ސެޕްޓެމްބަރު) އަމީނީ މަގު މަރާމާތުކުރުމުގެ މަސައްކަތުގެ ތެރެއިން ދެވަނަ ސެގްމަންޓުގައި ތާރު އެޅުމުގެ މަސައްކަތް ނިންމާލާފައިވަނީ މިދިޔަ ހޯމަ ދުވަހުއެވެ. މި މަޝްރޫއުގެ ތެރެއިން ފުރަތަމަ ސެގްމަންޓުގެ ތާރު އެޅުމުގެ މަސައްކަތް މިމަހުގެ 15 ވަނަ ދުވަހު ވަނީ ނިންމާލާފައެވެ. ތާރުއަޅައިގެން ތަރައްޤީކޮށްފައި އޮތް އަމީނީ މަގުގެ ތާރުފަށަލަ ހަލާކުވުމާއި ގުޅިގެން އެ ސަރަހައްދު މަރާމާތުކުރުމަށް އެމްޓީސީސީއާ ހަވާލުކޮށްފައިވަނީ މިއަހަރުގެ ޖޫން މަހުގެތެރޭގައެވެ. މަގުގެ މަސައްކަތް އެކި ސެގްމަންޓްތަކަށް ބަހާލައިގެން ކުރަމުންދާއިރު ސެގްމަންޓް 1 ގައި ހިމެނެނީ އިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލުކައިރީ އޮންނަ ޕާކާ ހަމައަށް ތާރުއެޅުމުގެ މަސައްކަތެވެ. އެ މަސައްކަތް އެއްކޮށް މިހާރު ވަނީ ނިންމާލާފައެވެ.

(29 ސެޕްޓެމްބަރު) އޮޅުވާލައިގެން ރާއްޖެއަށް އެތެރެކުރި 8 މިލިޔަނަށްވުރެ ގިނަ ސިނގިރޭޓު ކަސްޓަމްސްއިން އަތުލައިގެނެފައިވަނީ މިދިޔަ އަންގާރަ ދުވަހުއެވެ. މި ތަކެތި އަތުލައިގަތީ ކަނޑުމަގުން ރާއްޖެއަށް އެތެރެކުރި ޝިޕްމަންޓެއްގެތެރެއިންނެވެ. ‏ކަސްޓަމްސްއިން ވިދާޅުވީ މިމަހުގެ 27ވަނަ ދުވަހު މާލެ ވިޔަފާރި ބަނދަރުގައި، ހިންގި ޚާއްސަ އޮޕަރޭޝަނެއްގައި "ޖެނެރަލް ކާގޯ"ގެ ގޮތުގައި ޑިކްލެއަރކޮށްފައިވާ ޝިޕްމަންޓެއް ބަލައިފާސްކުރުމުގެ ތެރޭގައި ގިނަ އަދަދެއްގެ ސިނގިރޭޓް ފޮރުވާފައި ހުއްޓާ ފެނިފައިވާކަމަށެވެ.

(30 ސެޕްޓެމްބަރު) ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާއަށްވެސް ފުލުހުންގެ ޚިދުމަތުން ބޭސްފަރުވާކޮށްދޭ ގޮތަށް ފުލުހުންގެ ވަޒީފާގެ ޤަވާއިދު އިސްލާހުކޮށްފައިވަނީ މިދިޔަ ބުދަ ދުވަހުއެވެ. ފުލުހުންގެ ވަޒީފާގެ ޤަވާއިދަށް ގެނައި އިސްލާހުގެ ތެރެއިން އެއް އިސްލާހަކީ ފުލުހުންގެ އާއިލާތަކަށް ބޭސްފަރުވާކޮށްދޭ އުސޫލުން ވާޖިބު އަދާކުރަމުން ދަނިކޮށް ނިޔާވި ފުލުހުންގެ އާއިލާއަށްވެސް ފުލުހުންގެ ޚިދުމަތުން ބޭސްފަރުވާ ކޮށްދޭން ޖެހޭނެކަމެވެ. އަދި ވާޖިބު އަދާކުރަމުންދަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމަށް ނިންމިދާނެ ކަމަށް ޤަވާއިދުގައިވެއެވެ.

(01 އޮކްޓޫބަރު) ރާއްޖޭގައި މަގުމަތީގެ ރައްކާތެރިކަން ކަށަވަރުކުރުމަށް "އެއްގަމު ދަތުރުފަތުރުގެ ޤާނޫނު"ގެ ނަމުގައި މުޅިން އަލަށް އެކުލަވައިލި ޤާނޫނަށް މިއަދުން ފެށިގެން އަމަލުކުރަން ފަށާފައިވަނީ މިދިޔަ ބުރާސްފަތި ދުވަހުއެވެ. މި ޤާނޫނުގައި ނުރައްކާތެރިކޮށް އެއްގަމު އުޅަނދު ދުއްވާ ފަރާތްތަކާއި ޤާނޫނާ ޚިލާފަށް އުޅަނދު ދުއްވާ ފަރާތްތަކަށް ބޮޑެތި ޖޫރިމަނާތަކެއް ވަނީ ކަނޑައަޅާފައެވެ. މި ޤާނޫނުގައިވާގޮތުން ފަރުވާކުޑަކޮށް ނުވަތަ ނުރައްކާތެރިކޮށް އެއްވެސް އުޅަނދެއް ދުއްވުމަކީ ޤާނޫނީ ކުށެކެވެ. އެފަދަ ކުށެއްގެ އަދަބަކީ 25،000 ރުފިޔާ އާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ. މި ކުށުގެ ސަބަބުން މީހަކަށް އަނިއްޔާއެއް ލިިބިއްޖެނަމަ ނުވަތަ މީހަކު މަރުވެއްޖެނަމަ ޖިނާޢީ ދަޢުވާ އުފުލިދާނެ ކަމަށާއި 5 އަހަރާއި 10 އަހަރާ ދެމެދުގެ މުއްދަތަކަށް ލައިސަންސް ބާތިލުކުރެވޭނެ ކަމަށް ޤާނޫނުގައި ވަނީ ބަޔާންކޮށްފައެވެ.

(01 އޮކްޓޫބަރު) އަރިިއަތޮޅު ދެކުނުބުރީ ކުނބުރުދޫގައި އަލަށް ގާއިމްކުރި ޕޮލިސް ސްޓޭޝަން ހުޅުވާފައިވަނީ މިދިޔަ ބުރާސްފަތި ދުވަހުއެވެ. އދ. ކުނބުރުދޫ ޕޮލިސް ސްޓޭޝަން ހުޅުއްވައިދެއްވީ ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު، ޢަލީ އިޙްސާން އާއި ކޮމިޝަނަރ އޮފް ޕޮލިސް އަޙްމަދު މުޙައްމަދުއެވެ. ޕޮލިސްޓޭޝަން ހުޅުވުމަށް ބޭއްވި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ކުނބުރުދޫ ކައުންސިލްގެ ރައީސް އާއި ފުލުހުންގެ ސީނިއަރ އޮފިސަރުންނާއި އެރަށުގައި ހުރި އިދާރާތަކުގެ އިސްވެރިން ބައިވެރިވެލެއްވިއެވެ.

(29 ސެޕްޓެންބަރު) ދަތުގެ ފަރުވާގެ ޚިދުމަތްތެރިޔާ ޢަބްދުﷲ ސަޢީދު ނިޔާވި ޚަބަރު ލިބުނީ މިދިޔަ އަންގާރަ ދުވަހުއެވެ. ސަޢީދު ނިޔާވިއިރު އުމުރުން 89 އަހަރެވެ. ސަޢީދު ނިޔާވީ ނޭވާލާން އުނދަގޫވެގެން އައިޖީއެމްއެޗަށް ގެންގޮސް އެ ހޮސްޕިޓަލުގައި ފަރުވާދެމުންދަނިކޮށް ހާޓްއެޓޭކެއް ޖެހިގެނެވެ. އޭސައީދަކީ 1986 ވަނަ އަހަރުން ފެށިގެން ރާއްޖޭގައި ދަތުގެ ފަރުވާދިނުމުގައި ހަރަކާތްތެރިވެވަޑައިގެންނެވި ސަޢީދަކީ ދަތް އުފުރުމާއި ދަތްޖެހުމުގެ މަސައްކަތުގައި ބޮޑު މަޤްބޫލުތަކެއް ހޯއްދަވާފައިވާ ބޭފުޅެކެވެ. ޑެންޓިސްޓުންގެ ޚިދުމަތް ރާއްޖެއަށް ލިބުމުގެ ކުރިން، އާންމުންނަށް ދަތުގެ ފަރުވާ ހޯއްދަވާދެއްވުމުގައި އޭނާ ވަނީ ފާހަގަކޮށްލެވޭ ފަދަ މަސައްކަތްތަކެއް ކުރައްވާފައެވެ. އެގޮތުން އޭނާވަނީ ރަން ދަތް ޖަހާދެއްވުން ފަދަ ތަފާތު މަސައްކަތްތަކެއް ކުރައްވާފައެވެ. މީގެއިތުރުން އެ ދާއިރާއިން ތަޢުލީމު ޙާސިލްކުރެއްވުމަށްފަހު، ސަރުކާރުގެ ހޮސްޕިޓަލުތަކުގައި ދަތުގެ ފަރުވާދެއްވުމުގައި ގާތްގަނޑަކަށް 50 ވަރަކަށް އަހަރުދުވަހު ސަޢީދު ޚިދުމަތްކުރެއްވިއެވެ. އޭނާ ރިޓަޔަރކުރެއްވީ 2009ވަނަ އަހަރެވެ. ދަތުގެ ފަރުވާގެ އިތުރުން އަތްތެރިަކަމާއި، ކަނބުރުވެރިކަމާއި. ލިޔެލާޖެހުމުގެ މަސައްކަތްކުރުމުގައިވެސް އޭނާ އަކީ އާދަޔާއި ޚިލާފު ހުނަރުވެރި ބޭފުޅެކެވެ. އެގޮތުން، 1972 ވަނަ އަހަރު ކުއީން އެލިޒަބަތު ދެވަނަ ރާއްޖެއަށް ކުރެއްވި ޒިޔާރަތުގައި ސަޢީދު ތައްޔާރުކުރައްވާފައިވާ ޚާއްސަ ގަހަނާ ސެޓެއް އެކަމަނާއަށް ވަނީ އަރުވާފައެވެ. އަދި ޤައުމީ އުފެއްދުންތެރިކަމުގެ މަޢުރަޒުން ތަކުރާރުކޮށް 1ވަނަ ޚާސިލްކުރައްވާފައިވެއެވެ.