ވަތަނީ ޚިދުމަތުން 1000 ޒުވާނުން، ޤައުމަށް ޒިންމާދާރު ދަރިންތަކެއް!

ދިވެހި ވަޠަނީ ޚިދުމަތުގެ ޕްރޮގްރާމެއް މިދިޔަ އަހަރުގެ އޮކްޓޯބަރު މަހުގެ 1 ވަނަ ދުވަހު ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު ފައްޓަވައިދެއްވީ ވަރަށް މުހިންމު ތަސައްވުރަކާއެކުއެވެ. ޤައުމާއި ދީން ދެކެ ލޯބިވާ، ޒިންމާދާރު ރައްޔިތުންތަކެއް ބިނާކުރެއްވުމުގެ މަގުސަދުގައެވެ. މި މަސައްކަތުގެ ދަށުން މިއަދު 1000 އަށްވުރެ ގިނަ ޒުވާނުންނަށް ބޭނުންވާ އަސާސީ ތަމްރީނުތައް ދީ، ޒިންމާދާރު ބައެއްގެ ގޮތުގައި މުޖުތަމަޢަށް ވަނީ ނެރެފައެވެ.

ޤައުމެއްގެ ސަލާމަތާއި ރައްކާތެރިކަން ކަށަވަރުކުރެވޭނީ އެ ޤައުމެއްގެ ރައްޔިތުންގެ ހިތްތަކުގައި ޤައުމިއްޔަތަށް އިސްކަން ދެވިގެންނެވެ. އަޅުގަނޑުމެންގެ މި ޤައުމަކީ ސައްތައިން ސައްތަ އިސްލާމީ ޤައުމަކަށްވާއިރު އިސްލާމް ދީނާއި މި ޤައުމުގެ ރައްކާތެރިކަމާ ވަނީ ގުޅި ލާމެހިފައެވެ. އެހެންކަމުން ދީނާއި ޤައުމުދެކެ ލޯބިވާ ރައްޔިތުންތަކެއް ތިބުމަކީ ކޮންމެހެން މުހިންމުކަމެކެވެ.

ދިވެހިރާއްޖެ މިނިވަން ޤައުމުއްގެ ގޮތުގައި މިއަދާހަމައަށް ގެނެސްދީފައިވަނީ ކާބަފައިން ކުރެއްވި ބުރަ މަސައްކަތުންނެވެ. އެ ކާބަފައިންގެ ބުރަ މަސައްކަތް ކުރިއަށް އޮތް ޖީލުތަކަށް ދަމަހައްޓައި އެ ކާބަފައިން ދީނާއި ޤައުމުގެ ޙައްގުގައި ކެރިގެން ކުރިމަތިލިހެން ނުކުންނާނެ ޒުވާނުން އަންނަން އޮތް ޖީލުތަކުގައި ބިނާކުރުމަކީ ކޮންމެހެން މުހިންމު ކަމެކެވެ.

މި މަގުސަދުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި ދިވެހި ވަޠަނީ ޚިދުމަތަކީ މިއަދު ރާއްޖޭގައި މީހުން ބިނާކުރުމުގެ ދާއިރާއިން ހިންގާ އެންމެ ކާމިޔާބު އެއް ޕްރޮގްރާމެވެ. މި ޕްރޮގްރާމުގެ ދަށުން ކުރިއަށްގެންދާ އަސާސީ ތަމްރީނަކީ ޒިންމާދާރު ރައްޔިތުންތަކެއް ބިނާކުރުމަށް އެޅޭ ފުރަތަމަ ފިޔަވަޅެވެ. އެގޮތުން، މި ފާއިތުވެދިޔަ އެއް އަހަރު ތެރޭގައި 3 ބެޗެއްގައި 1،028 ޒުވާނުން ވަނީ މި ތަމްރީނުތައް ފުރިހަމަކޮށްފައެވެ. އެއީ 842 ފިރިހެން ބައިވެރިންނާއި 186 އަންހެން ބައިވެރިންނެވެ. މިއީ އަޅުގަނޑުމެންގެ މިކުޑަ މުޖުތަމަޢަށް ބަލާއިރު ވަރަށް ބޮޑު އަދަދެކެވެ.

ސްކޫލް މަރުހަލާގައި އެކަށީގެންވާ ނަތީޖާ ނުލިބޭ ދަރިވަރުންނަށް ރާއްޖޭގައި ފުރުސަތުތައް މީގެ ކުރިން މަދުކަން އެއީ ޙަގީގަތެކެވެ. މުޖުތަމަޢުގައި ބައެއް ޒުވާނުން ބާކީވެ، ކުށުގެ މާހައުލަށް ވަނުމަކީ އެތައް ބެލެނިވެރިންގެ ކަންބޮޑުވުމެކެވެ. ނަމަވެސް މިއަދު އެ ބެލެނިވެރިންގެ މި ކަންބޮޑުވުމަށްވެސް މިވަނީ ހައްލު ލިބިފައެވެ. ދަރިފުޅުގެ މުސްތަގުބަލު ބިނާކުރުމަށް އެކަށީގެންވާ ފުރުސަތުތަކެއް ވަޠަނީ ޚިދުމަތުގެ ޕްރޮގްރާމުގެ ދަށުން ލިބިގެންދާނެކަން މިއަދު ބެލެނިވެރިންނަށްވެސް ސަރުކާރުން ވަނީ ސާބިތުކޮށްދެއްވާފައެވެ.

މި ތަމްރީނުތައް ފުރިހަމަ ކުރި ކޮންމެ ޒުވާނެއްގެވެސް ބެލެނިވެރިން މިއަދު ބުނަމުންދަނީ އެ ކުދިންގެ އަޚްލާގާއި އުޅުމަށް ބޮޑެތި ހެޔޮ ބަދަލުތަކެއް އައިސްފައިވާ ކަމަށެވެ. އެ ކުދިން ދީނީ ކަންކަމަށް އިސްކަންދީ ދިރިއުޅުމުގެ ކަންކަމަށް ތައްޔާރުވެފައި ތިބިކަމަށެވެ.

"ދަރިފުޅަކީ ވަރަށް ގިނަ ވަގުތު ފޯނުގައި ހޭދަކޮށް، ހޭލާ ހުންނަ ކުއްޖެއް. ފަސްވަގުތު ނަމާދުކުރިޔަސް ނަމާދު ކުރަނީ ގަޑިއަކަށްނޫން. އެކަމަކު އެތަނަށް (ތަމްރީން ކޯސް) ގޮސް އައި ފަހުން ގަޑިއަށް ނިދާ، ފަތިހު ހޭލައި ނަމާދުވެސް ވަގުތުން ވަގުތަށް ކުރޭ. މިކަންކަމަށް ވަރަށް ބޮޑަށް އަހުލުވެރިވެފައި ހުރީ. ކޮއްކޮމެންނަށްވެސް ވަރަށް ބޮޑަށް ވިސްނުވަދޭނެ،" ވަޠަނީ ޚިދުމަތުގެ އަސާސީ ތަމްރީން ނިންމި ދަރިވަރެއްގެ ބެލެނިވެރިޔަކު ކިޔައިދިނެވެ.

މި ތަމްރީނުތަކުގެ ބައިވެރިންވެސް ތަމްރީނުތައް ނިންމާލައި މުޖުތަމަޢަށް ނުކުންނަނީ އަމިއްލަ ނަފުސާމެދު ހިތްހަމަޖެހިގެންނެވެ.

"ވަރަށް އުފާކުރަން ޓްރެއިނިންއަށް ދެވުނީމަ. އަޅުގަނޑަށް ވަރަށް ގިނަ އެއްޗެހި ދަސްވި އެތަނުން. އަޅުގަނޑުގެ ސްލީޕިން ޝެޑިއުލްވެސް ވަރަށް އެހެން ގޮތަކަށް ކުރިން ހުންނަނީ. އެކަމަކު އެތަނަށް ދިޔަ ފަހުން ވަރަށް ރަނގަޅު،" އަސާސީ ތަމްރީން ނިންމި ބައިވެރިޔަކު ކިޔައިދިނެވެ.

ދިވެހި ވަޠަނީ ޚިދުމަތުގެ ދަށުން މިއަދު 400 އަށްވުރެ ގިނަ ޒުވާނުންނަށް މި ފާއިތުވެދިޔަ 1 އަހަރުގެ ތެރޭގައި ވަޒީފާވެސް ވަނީ ހަމަޖެހިފައެވެ. މި ތަމްރީނުތައް ނިންމާ ޒުވާނުންނަށް އިތުރު ފުރުސަތުތައް ފަހިކޮށްދިނުމުގެ ގޮތުން އިންޓަރންޝިޕް ޕްރޮގްރާމެއް ފެއްޓެވުމަށް ސަރުކާރުން ނިންމަވާފައިވާއިރު ސްކިލްސް ޓްރެއިނިންތައްވެސް މިހާރުވަނީ ފަށާފައެވެ.

ސްކިލްސް ޓްރެއިނިންއަކީ އަސާސީ ތަމްރީނުތަކުން ހޮވާލެވޭ ދަރިވަރުން ބައިވެރިވާ ޕްރޮގްރާމަކަށްވާއިރު އެ ޕްރޮގްރާމުގައި މިހާތަނަށް 136 ދަރިވަރުން އަންނަނީ ތަމްރީނުތައް ހަދަމުންނެވެ. މިއީ އެކި ދާއިރާތަކުން ހުނަރުތައް އިތުރަށް ތަރައްގީ ކުރުމަށް ކުރިއަށްގެންދާ މުހިންމު ތަމްރީނެކެވެ.

ސަރުކާރުން ވަތަނީ ޚިދުމަތުގެ ޕްރޮގްރާމް ކުރިއަށްގެންދަނީ މުޅި ރާއްޖެއަށް ހުޅުވާލައިގެންނެވެ. މިއަދު ހއ. އިން ފެށިގެން އައްޑު އަތޮޅާ ހަމައަށް ރާއްޖޭގެ ކޮންމެ އަތޮޅެއްގައިވެސް މި ޕްރޮގްރާމުގެ އަސާސީ ތަމްރީން ފުރިހަމަކޮށްފައިވާ ޒުވާނުން އެބަތިއްބެވެ. މިއިން ކޮންމެ ޒުވާނަކީވެސް މިއަދު ޒިންމާދާރު ބައެއްގެ ގޮތުގައި މުޖުތަމަޢަށް ނުކުންނަށް ޒުވާނުންނެވެ.

މި ޕްރޮގްރާމުގެ ދަށުން ކޮންމެ އަހަރަކު 1000 އަށްވުރެ ގިނަ ޒުވާނުން ތަމްރީން ކުރެވޭނަމަ ޤައުމުގެ މުސްތަގުބަލާމެދު ސުވާލު އުފައްދަން ނުޖެހޭނެއެވެ. މިއީ ޖީލުތަކަށް ދެމިގެންދާނެ މުހިންމު ޚިދުމަތެކެވެ.