އައްޑޫސިޓީގައި ހޯމް ކަރަންޓީނު އުޞޫލުގެ ދަށުން 22 ގެއެއް ކަރަންޓީން ކޮށްފިއެވެ.
އައްޑޫސިޓީ ކައުންސިލުން އާއްމު ކޮށްފައިވާ ލިސްޓުގައި، ހިމެނޭ ގެތައް ކަރަންޓީނަށް ލާފައިވަނީ ރޭގެ ދަންވަރު ވަގުތެއްގައެވެ. މިއީ މާލެއިން އައްޑޫއަށް ދިޔަ މީހުން ދިރިއުޅެން ހަމަޖެއްސި ގެތަކެވެ. އެގޮތުން އައްޑޫގެ އެކި އަވަށްތަކުން ޖުމްލަ 41 މީހުން، ގެތަކުގައި ކަރަންޓީނު ވުމަށް އެސިޓީއަށް ދިޔަ ކަމަށް އައްޑޫ އިމަޖެންސީ އޮޕަރޭޝަންސް ސެންޓަރުން މައުލޫމާތު ދެއެވެ.
އައްޑޫގައި ކަރަންޓީނު ކޮށްފައިވާ ގެތަކުގެ ތެރޭގައި، ހިތަދޫ 8 ގެއަކާއި، މަރަދޫގެ 3 ގެއަކާއި، ފޭދޫގެ 4 ގެއަކާއި މީދޫ 4 ގެއަކާއި، ހުޅުދޫގެ 3 ގެއެއް ހިމެނެއެވެ. އެޗްޕީއޭއިން ކަނޑައަޅާފައިވާ ހޯމް ކަރަންޓީނު އުސޫލުގެ ދަށުން މިގެތަށް ކަރަންޓީނަށް ލާފައިވަނީ 24 ދުވަހުގެ މުއްދަތަށެވެ.
މިގޭގޭގައި ދިރިއުޅޭ އެއްވެސް މީހަކަށް އެއްވެސް ކަމެއްގައި ގެއިން ބޭރަށް ނިކުތުން މިމުއްދަތުގެ ތެރޭގައި މަނާ ވާނެއެވެ. މިމުއްދަތު ތެރޭގައި ޟަރޫރީ ބޭނުންތައް ފުއްދުމަށް ކުރާކަންތައްތަކުގައި އެޗްޕީއޭގެ ގައިޑްލައިނާއި އެއްގޮތަށް އެއަވަށެއްގެ ސޯޝަލް ސަޕޯޓް ޑެސްކުން އެހީތެރިވާނެ ކަމަށް އައްޑޫސިޓީ ކައުންސިލުން ބުނެއެވެ.
މިއީ ސަރުކާރުން ހޯމް ކަރަންޓީނު އުޞޫލު ކަނޑައަޅައި ގޭގައި ކަރަންޓީންވާ ގޮތަށް ރަށަށް މީހުން ފޮނުވާލި ފުރަތަމަ ފަހަރެވެ. މިއުސޫލުގެ ދަށުން މީހުން ރަށަށް ފޮނުވާލަނީ ޓެސްޓު ކުރުމަށް ފަހު ނަތީޖާ ނެގެޓިވް ވުމުންނެވެ. އަދި އަނބުރާ ރަށަށް ދާ މީހުން ކަރަންޓީންވާ ގެތަކީ ހައިރިސްކް ގްރޫޕް މީހަަކު ދިރިނުއުޅޭ ގެއަކަށް ވާން ޖެހޭ ކަމަށް އެޗްޕީއޭގެ ގައިޑްލައިންގައި ބުނެއެވެ.
އަައްޑުއަށް އެނބުރި ދިއުމަށް މިހާތަނަށް އައްޑޫ އިމަޖެންސީ އޮޕަރޭޝަންސް ސެންޓަރުގައި 900 އެއްހާ މީހުން ވަނީ ރެޖިސްޓްރި ކޮށްފައެވެ. މީގެ ތެރެއިން މިހާތަނަށް އެސިޓީ އަށް ގެންދެވުނީ 250 އެއްހާ މީހުން ކަމަށް އައްޑޫ އިމަޖެންސީ ސެންޓަރުން ބުނެއެވެ.