މަންޓާ އެއަރ އިން ގއ.ކޫއްޑުއަށް ކުރަމުންދިޔަ ދަތުރުތައް ހުއްޓާލަން ނިންމައިފިއެވެ. އަދި ކޫއްޑޫ ފިޔަވައި ދެން އެ އެއަރލައިނުން ދަތުރުކުރާ މަންޒިލްތަކުގެ ދަތުރުތައްވެސް ވަނީ މަދުކުރުމަށް ނިންމާފައެވެ.
ދުނިޔޭގައި މިހާރު ފެތުރެމުންދާ ކޯވިޑް-19އާ ގުޅިގެން ކުންފުނިތަކުގެ ހިންގުމަށް އަންނަނީ ބޮޑު ބަދަލުތަކެއް ގެންނަމުންނެވެ. މަންޓާ އެއަރ އިން ނެރެފައިވާ ބަޔާނެއްގައި ވަނީ ކޯވިޑް-19އާގުޅިގެން އެ އެއަރލައިންގެ ދަތުރުތަކުގެ ޑިމާންޑް ވަރަށްބޮޑަށް ދަށްވެ، ދަތުރުތައް ކެންސަލްވާ މިންވަރު އިތުރުވަމުންދާކަމަށެވެ.
އެހެންކަމުން ކޫއްޑުއަށް ކުރަމުންދިޔަ ދަތުރުތައް ވަގުތީގޮތުން މެދުކަނޑާލަން ނިންމާފައިވާކަމަށެވެ. އަދި ދަރަވަންދޫ އާއި ދާލު އެއަރޕޯޓަށް ކުރަމުންއަންނަ ދަތުރުތައް މަދުކުރުމަށް ހަމަޖެހިފައިވާކަން މަންޓާ އެއަރއިން ވަނީ ހާމަކޮށްފައެވެ. މިބަދަލު ގެނައުމަށް ނިންމާފައިވަނީ މިމަހުގެ 29ވަނަ ދުވަހުން ފެށިގެންނެވެ.
މަންޓާ އެއަރއިން ބުނީ އެ އެއަރލައިނުގެ ދަތުރުތަކާގުޅޭ އެންމެ ފަހުގެ މަޢުލޫމާތު އެއަރލައިނުގެ ވެބްސައިޓުން ލިބޭނެކަމަށެވެ. އެހެންކަމުން ދަތުރުކުރުމުގެ ކުރިން އެންމެފަހުގެ މަޢުލޫމާތު ވެބްސައިޓް މެދުވެރިކޮށް ހޯދުމަށްވެސް ކަސްޓަމަރުންނަށް އެއަރލައިނުން ވަނީ އަންގާފައެވެ.
މަންޓާ އެއަރގެ ދަތުރުތައް ފަށާފައިވަނީ މިދިޔަ އަހަރުގެ ތެރޭގައެވެ. މިއީ ރާއްޖޭގައި ވައިގެ އުދުހުންތަކުގެ ޚިދުމަތްދޭ އަމިއްލަ ކުންފުންޏެކެވެ. ކުޑަ ދުވަސްކޮޅެއްގެ ތެރޭގައި އެ ކުންފުނިން ވަނީ ޙިދުމަތް ވަރަށްބޮޑަށް ފުޅާކޮށްފައެވެ. އޭގެތެރޭގައި ސީޕްލޭންގެ ޙިދުމަތްވެސް ވަނީ ދޭންފަށާފައެވެ.