މަލޭގައި މިނީ ބަހުގެ ޚިދުމަތްދިނުމަށް މަގުތަކުން ޖާގަ ހެދުމުގެ މަސައްކަތް މާލޭ ސިޓީ ކައުންސިލާއި ގުޅިގެން ކުރަމުން އަންނަކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ވިދާޅުވެއްޖެއެވެ.
މާލޭގައި މިނީ ބަހުގެ ޚިދުމަތް ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއާއި ހަވާލުކޮށްފައިވަނީ ނިމުނު އަހަރުގެ ފެބްރުއަރީމަހުއެވެ. މި މަސައްކަތް ހަވާލުކުރީ ފެބްރުއަރީ މަހުން ފެށިގެން 4 މަސް ތެރޭގައި ބަހުގެ ޚިދުމަތް އާއްމުންނަށްދޭން ފެށުމަށެވެ.
ޓްރާންސްޕޯޓް މިނިސްޓްރީން ވިދާޅުވީ މިނީ ބަހުގެ ހިދުމަތް ނުފެށި ލަސްވަނީ ހިދުމަތް ފެށުމުގެ ކުރިން މާލޭގެ ބައެއް މަގުތަކަށް ގެންނަންޖެހޭ ބަދަލުތައް ގެންނަމުންދާތީކަމަށެވެ. ޓްރާންސްޕޯޓް މިނިސްޓްރީން މިހާރުވަނީ ބަސްތައް ދަތުރުކުރާނެ މަގުތައްވެސް ކަނޑައަޅާފައެވެ. އަދި ބަހުގެ ޚިދުމަތް ފެށުމަށް މާލޭގެ މަގުތަކުން ބޭނުންވާ ޖާގަތައް ހެދުމުގެ މަސައްކަތްވެސް މާލެ ސިޓީ ކައުންސިލާއިއެކު ގުޅިގެންދަނީ ކުރަމުންނެވެ. އެގޮތުން ބަސް ދަތުރުކުރަން ހަމަޖެހިފައިވާ މަގުތަކުގެ ޕާކިންގ އޭރިއާތައް އެހެން ސަރަޙައްދުތަކަށް ބަދަލުކޮށް ޖާދަ ހެދުން ހިމެނެއެވެ.
މަގުތައް ބަދަލުކުރުމުގެ އިތުރުން ބަސްތައް ގެނައުމަށް ބޭނުންވާ ބަޖެޓް މުޅިން އަދި ހަމަޖެހިފައި ނުވާކަން މިނިސްޓްރީން ވަނީ ފާހަގަކުރައްވާފައެވެ. މިނީ ބަހުގެ ޚިދުމަތް ފެށުމަށް ގެންނަން ކަނޑައަޅާފައިވަނީ 15މިނީ ބަހެވެ. މި ބަސްތައް ހެދުމުގެ މަސައްކަތް ނިމިފައިވާކަމަށާއި، މި 15ބަސް ގެންނަނީ ހަމަޖެހިފައިވަނީ ޗައިނާއިންކަމަށްވެސް ޓްރާންސްޕޯޓް މިނިސްޓްރީން ވިދާޅުވެއެވެ.
ޕަބްލިކް ޓްރާންސްޕޯޓް ނިޒާމު ޤާއިމުކުރުމަށް މާލެ ގެންނަނީ މާލޭގެ ހަނި މަގުތަކުގައި ދުއްވޭނެހެން ކުދި ބަސްތަކެއް ފަރުމާކޮށްގެންނެވެ. މިއީ ތިމާވެއްޓާއ ރައްޓެރި "އިލްކްޓްރޯނިކް ބަސް"ތަކެކެވެ. މިއިން ބަހެއްގެ ދިގުމިނުގައި ހުންނާނީ 6 މީޓަރުކަމަށް މިނިސްޓްރިއިން މަޢުލޫމާތުދެއެވެ. އަދި މިއިން ބަހެއްގައި އެއްފަހަރާ އުފުލެނީ 16 މީހުންނެވެ.
މާލޭގެ މަތުތައް ޒަމާނީ ފެންވަރަށް ހެދުމުގެ މަޝްރޫއުގެ ތެރޭގައި ޕަބްލިކް ޓްރާންސްޕޯޓަށް އަމާޒުކޮށްގެން ބައެއް ބަދަލުތައް ގެނައުމަށް ސިޓީ ކައުންސިލުން ވަނީ ނިންމާފައެވެ. މިގޮތުން ބައެއް މަގުތަކުގެ ޕޭމަންޓްތަކަށް ބަދަލު ގެނެސް ބައެއް ސަރަހައްދުތަކުގެ މަގުތައް ފުޅާކުރުން ހިމެނެއެވެ. އަދި ސްކޫލްކުދިންނާއި އާއްމުންނަށް ބަސް ތައާރަފުކުރުމަށްވެސް ވަނީ ނިންމާފައެވެ.