މާލެއަތޮޅު ހިންމަފުށީގައި އަލަށް ޤާއިމުކުރި ނަރުދަމާ ނިޒާމުގެ ހިންގުމާ، ސްޓެލްކޯއިން ހަވާލުވެއްޖެއެވެ.
ހިންމަފުށީގައި ޤާއިމުކުރި ނަރުދަމާ ނިޒާމުން 261 ގޭބިސީއަށް ޚިދުމަތްދޭނެއެވެ.
މާލެއަތޮޅު ހިންމަފުށީގައި ނަރުދަމާ ނިޒާމު ޤާއިމުކުރުމުގެ މަސައްކަތް ފަށާފައިވަނީ 2017ވަނަ އަހަރުއެެވެ. އަދި މި މަސައްކަތް 2018ވަނަ އަހަރުގެ ނިޔަލަށް ނިންމައި ޚިދުމަތް ފެށުމަށް އެއްބަސްވެފައިވީނަމަވެސް މިހާތަނަށް ޚިދުމަތް ފަށާފައެއް ނުވެއެވެ.
މިނިޒާމު ހިންގުމާ ސްޓެލްކޯއިން ރަސްމީކޮށް ޙަވާލުވުމަށް ހިންމަފުށީގައި ބޭއްވި ރަސްމިއްޔާތުގައި ކުންފުނީގެ ޗެއަރމަން މުޙައްމަދު ރަޝީދާއި މެނޭޖިންގ ޑިރެކްޓަރ ހަސަން މުޣުނީވަނީ ބައިވެރިވެވަޑައިގަންނަވާފައެވެ.
މަސައްކަތާ ޙަވަލުވެވަޑައިގެން ވާހަފުޅުކަދައްކަވަމުން ސްޓެލްކޯގެ މެނޭޖިންގ ޑިރެކްޓަރ ހަސަން މުޢުނީ ވިދާޅުވީ ޚިދުމަތް ނުފެށި މިހާ ދުވަސްވީ، ނަރުދަމާ ނިޒާމުގެ ބައެއް ޢަމަލީ މަސައްކަތްތައް ނުނިމޭތީކަމަށެވެ. މުޣުނީ ވިދާޅުވީ ސިސްޓަމަށް މައްސަލައެއް ދިމާވެއްޖެނަމަ ޙައްލުކުރުމަށް ޤާއިމުކުރަންޖެހޭ ސިސްޓަމް ޤާއިމުކުރުމުގެ މަސައްކަތް މިހާރުވެސް ކުރިއަށްދާކަމަށެވެ.
މި މަސައްކަތްތައް ކުރިއަށްދިޔަ ނަމަވެސް، ގޭބިސީތައް ރަޖިސްޓްރީވުމަށް މިހާރު ހުޅުވާލާފައިވާކަމަށާ މި މަސައްކަތްތައް ނިމުނުހާ އަވަހަށް ޚިދުމަތް ފަށާނެކަމަށްވެސް މުޢުނީ ވިދަޅުވިއެވެ.
"ޚިދުމަތް ފަށައިގަތުމަށް ބޭނުންވާ އެސެސްމަންޓްތައް ހެދުމާއި، މަސައްކަތް ފަށައިގަންނަން ބޭނުންވާ ފައިސާ ހަމަޖެއްސުމުގެ މަސައްކަތް އެބަ ކުރިއަށްދޭ. އަދި މި ސިސްޓަމަށް ދިމާވަ މައްސަލަތައް ކުޑަކުރުމަށް، އާއްމުން ހޭލުންތެރިކުރމިގެ ހަރަކާތަތްކެއް ކުރިއަށްގެންދާނަން." މުޣުނީ ވިދާޅުވިއެވެ.
ހިންމަފުށި ކައުންސިލްގެ ރައީސް ޝާން އިބްރާހީމް ވިދަޅުވީ ރަށުން ނަޖިސް ބޭރުކުރުމުގައި ޢާއްމު ރައްޔިތުންނަށް ބޮޑެތި ދަތިތައް ހުރިކަމަށެވެ. މިކަމަށް ފަސޭހަކުރުމުގެ ގޮތުން ބައެއް ގެތަކުން އަމިއްލައަށް ނަރުދަމަ ހަދައިގެން ބޭނުންކުރަމުން އައިކަމަށްވެސް ޝާން ވިދާޅުވިއެވެ. ނަމަވެސް މިއީ ދެމެހެއްޓެނިވި ކަމަކަށްނުވެ، މީގެ ސަބަބުން އިތުރު މައްސަލަތައް ނިކުންނމުންދިޔަކަން ކައުންސިލް ރައީސް ފާހަގަކުރިއެެވެ.
"16ގެއަކުން އަމިއްލައަށް ނަރުދަމަ ހޮޅި މޫދަށް އެޅި. މިކަމުން ރަށުގެ ލޯކަލް ޓުއަރިޒަމަށް ނޭދެވޭ އަސަރު ކުރޭ. އަދި ބައެއް ގޭގޭގެ ނަޖިސް ވަޅު ފުރި، އޭގެ އުނދަގުވެސް ދިމާވޭ." ޝާން ވިދާޅުވިއެވެ.
ހިންމަފުށީ ނަރުދަމަ ނިޒާމުގެ މަސައްކަތް ކުރަނީ ސިއެރަ ކޮންސްޓްރަކްޝަން ޕްރައިވެޓް ލިމިޓެޑުންނެވެ. މިއީ ސަރުކާރާއި އިސްލާމިކް ޑިވެލޮޕްމަންޓް ބޭންކް ގުޅިގެން ކުރިއަށްގެންދާ 45މިލިއަން ރުފިޔާގެ ޕްރޮޖެކްޓެކެވެ. މި މަޝްރޫއުގެ ދަށުން ރަށުގެ 261 ގެއާއި، އަދި ރަށުގެ އޮފީސްތަކައި ސިނައީ މަސައްކަތްކުރާ ތަންތަނަށްވެސް މި ޚިދުމަތް ދޭނެއެވެ.