އިންޑިއާއިން ހަދިޔާކުރި ވެހިކަލްތަކުގެ ސަބަބުން މާލެސިޓީ ކައުންސިލްގެ މަސައްކަތް އިތުރަށް ހަރުދަނާވާނެ - ފޮރިންގ މިނިސްޓަރ

އިންޑިއާގެ އެހީގައި މާލެ ސިޓީ ކައުންސިލަށް ލިބިގެންދިޔަ ވެހިކަލްތަކުގެ ސަބަބުން ރައްޔިތުންނަށް ފޯރުކޮށްދޭން ޖެހޭ ޚިދުމަތްތައް ދިނުމުގައި އިތުރު ލުއިފަސޭހަތަކެއްވެ ފެންވަރު ރަނގަޅު ޚިދުމަތެއް ފޯރުކޮށްދެވޭނެ ކަމަށް އުއްމީދުކުރައްވާކަމުގައި ފޮރިންގ މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ. އިންޑިޔާއިން ދިވެހިރާއްޖެއަށް ފޯރުވައިދީފައިވާ ގްރާންޓް ސްކީމްގެ ދށުން ގަނެފައިވާ ވެހިކަލްތައް މާލެ ސިޓީ ކައުންސިލަށް ހަދިޔާކުރުމަށް ބޭއްވި ރަސްމިއްޔާތުގައި އިންޑިއާގެ ފަރާތުން ރަމްޒީގޮތުން ވެހިކަލް ހަވާލުކޮށްދެއްވީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރެވެ. އަދި ސިޓީ ކައުންސިލްގެ ފަރާތުން ވެހިކަލްތަކާއި ހަވާލުވެވަޑައިގަތީ މާލެ ސިޓީ ކައުންސިލްގެ މޭޔަރ ސިފާ މުޙައްމަދެވެ.

ވެހިކަލްތައް މާލެ ސިޓީ ކައުންސިލަށް ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ފޮރިންގ އެފެއާޒް ޢަބްދުﷲ ޝާހިދު ވިދާޅުވީ ސަރުކާރުން ކައުންސިލްތަކަށް ދީފައިވާ ބާރާއެކު ރަނގަޅު ޚިދުމަތެއް ދިނުމަށް ފެންވަރު ރަނގަޅު ވަޞީލަތްތައްވެސް ކައުންސިލްތަކަށް ބޭނުންވާކަމަށެވެ. އެގޮތުން ރާއްޖޭގެ އާބާދީގެ ބޮޑުބައެއް ދިރިއުޅެމުން އަންނަ މާލެ ސިޓީ ކައުންސިލަށް ބޭނުންވާ މުހިއްމު ގިނަ ވަޞީލަތްތަކެއް އިންޑިއާގެ އެހީގައި ލިބިފައިވާކަން މިނިސްޓަރ ފާހަގަކުރެއްވިއެވެ. މިނިސްޓަރ ޝާހިދު ވިދާޅުވީ މިވަގުތު ސިޓީ ކައުންސިލަށް ލިބިގެންދިޔަ ވެހިކަލްތަކުގެ ސަބަބުން ރައްޔިތުންނަށް ޚިދުމަތްކުރުމުގައި އިތުރު ފުރިހަމަކަމެއް އަންނާނެކަމަށް ޤަބޫލުކުރައްވާކަމުގައެވެ. މިރަސްމިއްޔާތުގައި ފޮރިންގ މިނިސްޓަރ ޢަބްދުﷲ ޝާހިދުވަނީ އިންޑިއާއިން ރާއްޖެއާއި މެދު ބަހައްޓަވާ ގާތްކަމާއި ވެދެއްވަމުންގެންދަވާ އެހީތެރިކަމަށް ޝުކުރުއަދާކުރައްވާފައެވެ.

މިރަސްމިއްޔާތުގައި ވާހަކަފުޅުދައްކަވަމުން އިންޑިޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވީ ރާއްޖެއާއި އިންޑިއާއާއި ދެމެދު އަބަދުވެސް އޮންނަ ގުޅުމަކީ ނަމޫނާ ގުޅުމެއް ކަމަށާއި ރާއްޖޭގެ ތަރައްޤީގެ ބައިވެރިއެއްގެ ގޮތުގައި އިންޑިއާއިން އަބަދުވެސް އޮންނާނެކަމަށެވެ.

އިންޑިއާގެ އެކްސްޓާރނަލް އެފެއާޒް މިނިސްޓަރ 2019 ވަނަ އަހަރު ރާއްޖެއަށް ކުރެއްވި ޒިޔާރަތުގައި ރާއްޖެއަށް ދިނުމަށް ހަމަޖެއްސެވި 106 މިލިއަން ރުފިޔާގެ އެހީގެ ދަށުން މާލެ ސިޓީ ކައުންސިލަށް ބޭނުންވާ ވެހިކަލްތައް ހޯދުމަށް 8 މިލިއަން ރުފިޔާ ސިޓީ ކައުންސިލަށްވަނީ ދީފައެވެ. މި އެހީގެ ދަށުން މަގު ހެދުމާއި މަގު ބެލެހެއްޓުމަށް ބޭނުންވާ 16 ވެހިކަލެއް ފޯރުކޮށްދިނުމަށް އިންޑިއާއިންވަނީ ނިންމާފައެވެ. މީގެ ތެރެއިން 5 ވެހިކަލް މިހާރު ސިޓީ ކައުންސިލަށް ލިބިފައިވާއިރު އިތުރު ވެހިކަލްތައް މިއަހަރުގެ 2 ވަނަ ކުއާޓާގެ ތެރޭގައި ލިބޭނެކަމަށް ސިޓީ ކައުންސިލުން ވިދާޅުވެއެވެ.

އިންޑިޔާގެ ސަރުކާރުގެ އެހީގައި ރާއްޖޭގެ މަގުތަކުގައި ލެޑްލައިޓް ހަރުކުރުމުގެ ޕްރޮގްރާމެއް 2019 ވަނަ އަހަރުން ފެށިގެން ދަނީ ކުރަމުންނެވެ.