އައްޑޫ ދަމަނަވެށިން ވެކްސިން ތައްގަނޑެއް ވަގަށް ނަގާފައިވާ ކަމަށް އެތަނުން ހާމަ ކޮށްފިއެވެ.
އައްޑޫ މަރަދޫ-ފޭދޫގައި ހުންނަ ދަމަނަވެށިން ވައްކަން ކުރި މައްސަލައެއް ފުލުހުންނަށް މިދިޔަ މަހުގެ 26 ވަނަ ދުވަހު ހުށަހަޅާފައިވާކަން ފުލުހުން ވަނީ ޔަޤީން ކޮށްދީފައެވެ.
މިކަމާއި ގުޅިގެން އައްޑޫ ދަމަނަވެށިން ބުނީ އިދާރީ ގޮތުން ބޭނުން ކުރަމުން ދިޔަ ބައެއް ލިޔެކިއުންތަކާއި އެކު، އޮފީސް ވައްގަނޑުގައި ހުރީ ފައިސާ ތަކެއްވެސް ނަގާފައިވާ ކަމަށެވެ. މިތައްގަނޑު ނަހަމަ ގޮތުގައި ބޭނުން ކުރެވިދާނެތޯ ސުވާލު ކުރުމުން އެ އޮފީހުން ބުނީ އިދާރީ ތައްގަނޑަކާއި އެކު ވެކްސިން ތައްގަނޑުވެސް ބޭނުން ކުރުމުގެ ފުރުޞަތު އެބައޮތް ކަމަށެވެ.
ދަމަނަވެށިން ވައްކަން ކުރި މައްސަލަ ފެންމަތި ވެފައި މިވަނީ، އައްޑޫގައި ވެކްސިން ނުޖަހާ ދަރިވަރުން ވައްދާ ސްކޫލެއް ހުރި ކަމަށް ކުޑަކުދިން ޚާއްޞަ ޑޮކްޓަރު އަޙްމަދު ފައިޞަލް ސޯޝަލް މީޑިއާގައި ހާމަކޮށްފައި ވަނިކޮށެވެ. މިމައްސަލައިގައި އޭނާ ކުރި ޓްވީޓް ތަކެއްގައި ބުނެފައިވަނީ، ވެކްސިން ނުޖަހާ 'އަޑިއަޑިން' ރާއްޖޭގެ ސްކޫލުތަކަށް ކުދިން ވައްދާ ކަމަށާއި، ނަމަވެސް އައްޑޫގައި ހުންނަ މިސްކޫލް އޭނަ ވަނީ ޚާއްޞަ ގޮތެއްގައި ފާހަގަ ކޮށްފައެވެ.
އެޑިއުކޭޝަން މިނިސްޓަރ އައިޝަތު އަލީ ވަނީ، ވެކްސިން ނުޖަހާ ކުދިން ވައްދާ ސްކޫލްތަކުގެ މަޢުލޫމާތު ޙިއްޞާ ކޮށްދިނުމަށް އެދިވަޑައިގެންފައެވެ. ރައްޖޭގެ ސްކޫލުތަކުގެ ގްރޭޑް 1 އަކަށް ކުދިން ވައްދާއިރު، ވެކްސިން ފުރިހަމަ ކޮށްފައިވޭތޯ ބަލަން ލާޒިމު ކުރެއެވެ.
ރާއްޖޭގައި ފަހަކަށް އައިސް ވެކްސިން ދިނުމާ ދެކޮޅަށް ބައެއް ފަރާތްތަކުން ދަނީ ވަކާލާތު ކުރަމުންނެވެ.