ނ. ކެނދިކުޅުދޫގައި އައު އިންޖީނުގެއެއް ހަދަން ފެނަކަ ކޯރޕަރޭޝަނުން އަމިއްލަ ކުންފުންޏަކާ ޙަވާލުކޮށްފިއެވެ.
ކެނދިކުޅުދޫގައި އިންޖީނުގެއެއް ހަދަން ހަވާލުކޮށްފައިވަނީ ޓޫއެލް ކޮންސްޓްރަކްޝަން ޕްރައިވެޓް ލިމިޓެޑާއެވެ. އެކަމަށްޓަކާ ފެނަކަ ކޯރޕަރޭޝަންގައި ބޭއްވި ރަސްމިއްޔާތެއްގައި އެކުންފުނީގެ ފަރާތުން އެއްބަސްވުމުގައި ސޮއިކުރައްވާފައިވަނީ މެނޭޖިންގ ޑިރެކްޓަރ އަޙްމަދު ސަޢީދު މުޙައްމަދެވެ. އަދި ޓޫއެލް ކޮންސްޓްރަކްޝަންގެ ފަރާތުން ސޮއިކުރައްވާފައިވަނީ އެކުންފުނީގެ އޮޕަރޭޝަންސް ޑިރެކްޓަރ ޙުސެއިން އިބްރާހީމެވެ.
މި މަޝްރޫޢަށް 7.4 މިލިއަނަށް ވުރެ ގިނަ ރުފިޔާ ޚަރަދުވާއިރު، މި މަޝްރޫޢު ނިންމުމަށް އެކުންފުންޏަށް ދީފައިވަނީ 10 މަސް ދުވަހުގެ މުއްދަތެކެވެ.
އަތޮޅުތަކުގެ ރަށްރަށުގައި މީހުން ދިރިއުޅޭ ސަރަޙައްދުގައި ހުރި އިންޖީނުގެތައް މީހުން ދިރިނޫޅޭ ސަރަޙައްދުތަކަށް ބަދަލުކުރުމަށް ކުރަމުންދާ މަސައްކަތުގެ ދަށުން މިއަހަރުގެ ތެރޭގައި 26 ރަށެއްގެ އިންޖީނުގެ ބަދަލުކުރުމުގެ މަސައްކަތް ފެނަކައިން ވަނީ ފަށާފައެވެ. އަދި ރާއްޖޭގެ އެކި ރަށްރަށަށް ޖުމްލަ 67 ޖަނަރޭޓަރު ސެޓް ފޯރުކޮށްދީފައިވާކަމަށާއި، އޭގެ ތެރެއިން މިހާތަނަށް 60 ޖެންސެޓް އިންސްޓޯލްކޮށް ކަރަންޓުގެ ޚިދުމަތްދޭން ފަށާފައިވާކަމަށްވެސް އެކުންފުނިން ބުނެއެވެ.