2 ރަށެއްގެ މަގު ހެދުމުގެ މަސައްކަތް ކޮށްދޭނެ ފަރާތެއް ހޯދުމަށް އިޢުލާންކޮށްފިއެވެ.
މަގު ހެދުމުގެ މަސައްކަތް ކޮށްދޭނެ ފަރާތެއް ހޯދުމަށް ފިނޭންސް މިނިސްޓްރީން އިޢުލާންކޮށްފައިވާ ދެ ރަށަކީ ތ. ތިމަރަފުށްޓާއި، ގދ. ގައްދޫއެވެ. މި 2 މަޝްރޫޢަށްވެސް އިޢުލާންކޮށްފައިވަނީ ޑިޒައިން އެންޑް ބިލްޑް އުޞޫލުން ކުރުމަށެވެ.
ފިނޭންސް މިނިސްޓްރީން ވިދާޅުވީ، މި 2 މަޝްރޫޢަށް ކޮންޓްރެކްޓަރަކު ހަމަޖައްސަވާނީ އިންޓަރނޭޝަނަލް ކޮމްޕެޓިޓިވް ބިޑިންގ، އައި.ސީ.ބީ އުޞޫލުގެ މަތިން ރާއްޖޭގައި ހެދިފައިވާ ޕަބްލިކް ފައިނޭންސްގެ ޤާނޫނުތަކާ އެއްގޮތްވާގޮތުގެ މަތިންކަމަށެވެ.
މި 2 މަޝްރޫޢުގެ ތެރެއިން ތިމަރަފުށީ މަގުހެދުމުގެ މަޝްރޫޢަށް ބިޑް ސެކިއުރިޓީގެ ގޮތުގައި ތިން ސަތޭކަ ފަންސާސް ހާސް ރުފިޔާ އަދި ގައްދޫ މަގު ހެދުމުގެ މަޝްރޫޢަށް ހަތް ސަތޭކަ ފަންސާސް ހާސް ރުފިޔާ ހުށަހަޅަންޖެހޭނެއެވެ. އަދި މި ބީލަމުގައި ބައިވެރިވުމަށް ފަނަރަސަތޭކަ ރުފިޔާގެ ނޮންރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭއިރު، ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 120 ދުވަސްކަމަށްވެސް އެ މިނިސްޓްރީން ވިދާޅުވެއެވެ.
މި ބީލަމުގައި ބައިވެރިވެވޭނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ޤަވާއިދު" ގައިވާ ގޮތުގެމަތީން ރަޖިސްޓަރީ ވެފައިވާ ފަރާތްތަކަށް ކަމަށްވެސް ފިނޭންސް މިނިސްޓްރީން ވިދާޅުވެއެވެ. މި 2 މަޝްރޫޢަށް ޝަޢުގުވެރިވާ ފަރާތްތަކަށް ބީލަން ހުށަހެޅުމުގެ ފުރުޞަތު އަންނަމަހުގެ 20 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.