ނުރައްކާތެރި އަލިފާނުގެ ހާދިސާގައި ނިޔާވި ޝައުނާގެ ޖަނާޒާ މާދަމާގެ މެންދުރު ނަމާދަށްފަހު އިސްލާމީ މަރުކަޒުގައި ބޭއްވުމަށް ހަމަޖައްސައިފިއެވެ.
މިރޭ ހިނގައިދިޔަ އަލިފާނުގެ ހާދިސިގައި ނިޔާވި ޝައުނާގެ ހަށިގަނޑު އާސަހަރާއަށް ގެންގޮސްފައިވަނީ މިރޭ މެންދަމުގެ ވަގުތެއްގައެވެ. ހަށިގަނޑު އާސަހަރާއަށް ގެންދިއުމާއިއެކު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙާއި، ކެބިނެޓްގެ ވަޒީރުންވަނީ އާސަހަރާއަށް ވަޑައިގެންފައެވެ.
މީގެ އިތުރުންވެސް ގިނަ އަދަދެއްގެ އާންމުންނާއި، ޝައުނާގެ އާއިލާގެ މެމްބަރުންވެސް މިހިތާމާގައި ބައިވެރިވުމަށް އާސަހަރާއަށް ޖަމާވިއެވެ. މި އެންމެންވެސް ސަހަރާއަށް ޖަމާވަމުންދިޔައީ ބޯވާރޭތެރޭގަކަން ފާހަގަކޮށްލެވެއެވެ.
އަލިފާނުގެ މި ހިތާމަވެރި ހާދިސާގައި ނިޔާވި ޝައުނާގެ ޖަނާޒާ މާދަމައަށް ފަސްކޮށްފައިވާއިރު، ހަށިގަނޑު މިރޭ މޯޖަރީގައި ބޭއްވުމަށްވެސް ވަނީ ހަމަޖެހިފައެވެ. ޝައުނާގެ މަރާއެކު މުޅި ސަރުކާރާއި، ރައްޔިތުންވެސް ދަނީ ހިތާމަ ފާޅުކުރަމުންނެވެ.