ޚަބަރު

ކެލާގައި ހަކުރު ބައްޔަށް ސްކްރީން ކުރުމުގެ ޕްރޮގްރާމެއް ހިންގައިފި


ހއ. ކެލާގައި ހަކުރު ބައްޔަށް ސްކްރީން ކުރުމުގެ ފްރޮގްރާމެއް ހިންގައިފިއެވެ.

މި ޕްރޮގްރާމަކީ ކެލާ ވުމަން ޑިވެލޮޕްމަންޓުން އިސްނަގައިގެން ޓްރާންސްޕޭރެންސީ މޯލްޑިވްސް ހިންގާ ”ބާރު ގްރާންޓް އިން ރާވާ ހިންގި ޕްރޮގްރާމެކެވެ. މި ޕްރޮގްރާމުގައި މޯލްޑިވްސް ޑައިބިޓިކް ސޮސައިޓީއާ، ކެލާ ކައުންސިލާއި ކެލާ ހެލްތު ސެންޓަރު ވެސް ވަނީ ބައިވެރިވެފައެވެ.

މިއަދު ކެލާ ޔޫތް ސެންޓަރުގައި ކުރިއަށް ދިޔަ މި ޕްރޮގްރާމުގައި ހަކުރު ބައްޔާއި ބެހޭގޮތުން މައުލޫމާތު ދީފައިވެއެވެ. އަދި ހަކަރު ބައްޔަށް ޓެސްޓު ކޮށްދިނުމާއި ލޭގެ ޕްރެޝަރު ބަލައިދިނުމާއި، އިސްކޮޅާ ގުޅުވައިގެން ބަރުދަން ބަހައްޓަންވީވަރު ބަލައި، އޮޅުންފިލުވައި ދިނުމާއި، ހަކުރުބަލީގެ ސަބަބުން އިތުރަށް ދިމާވާ މައްސަލަތައް ހުރިތޯ ބެލުމަށް ސްކްރީން ކުރުމާއި އުނަގަނޑުގެ ވަށަމިން ހުންނަ މިންވަރު ބެލުމާއި ހަށިގަނޑުގައި ސަރުބީ ހުރި މިންވަރު ބަލައިދިމުނުގެ އިތުރުން ހަކުރުބައްޔަށް ފުރުޞަތު އޮތް މިންވަރު ބަލައިދިނުން ހިމެނެއެވެ.

ބާރު ގްރާންޑު ޕްރޮޖެކްޓުގެ މަޤްޞަދަކީ އަންހެންނުން ބާރުވެރިކުރުވުމާއި ޕްރޮޖެކްޓް މެނޭޖްމަންޓު އަދި ސިޔާސަތު ތަންފީޒު ކުރުމުގެ ތެރެއަށް އަންހެނުން ވެއްދުމެވެ.