އަލަށް ވިޔަފާރިއަށް ނިކުންނަން ބޭނުންވާ ފަރާތްތަކަށް އަމާޒުކޮށްގެން ފުވައްމުލަކުގައި ފޯރަމެއް ފަށައިފި

އަލަށް ވިޔަފާރިއަށް ނިކުންނަން ބޭނުންވާ ފަރާތްތަކަށް އަމާޒުކޮށްގެން ފުވައްމުލަކުގައި "ބިޒްނަސް އިނޮވޭޝަން ވީކް" ނަމުގައި ފޯރަމެއް ފަށައިފިއެވެ.

މިމަހުގެ 1 އިން 5 އަށް ޏ. އަތޮޅު ތަޢުލީމީ މަރުކަޒުގައި ކުރިއަށް ގެންދާ މިފޯރަމް ފައްޓަވައި ދެއްވީ ފުވައްމުލަކު ސިޓީ ކައުންސިލުގެ ޑެޕިއުޓީ މޭޔަރ މުހައްމަދު ލިރާރުއެވެ. މިފޯރަމުގެ މަޤްސަދަކީ އަލަށް ވިޔަފާރީގެ ދައިރާއަށް ނިކުންނަ ޒުވާނުންނަށް ވިޔަފާރިއެއް ފަށޭނެ ގޮތް ކިޔައިދީ އީޖާދީ ޚިޔާލުތަކެއް ނެރުން ކަމުގައި މިފޯރަމް އިންތިޒާމު ކުރާ ފަރާތުން ބުނެއެވެ. މިފޯރަމް އިންތިޒާމު ކުރަނީ، އައިބޭއާއި، ފެޓް އައިޑިއާސް އަދި ކްރޮވް މޯލްޑިވްސް ގުޅިގެންނެވެ.

މިޙަރަކާތާއި ގުޅޭ ގޮތުން ޕީއެސްއެމް ނިއުސް އަށް މައުލޫމާތު ދެމުން އައިބޭގެ ފައުންޑަރ، އިސްމާއިލް ރަފީގު ވިދާޅުވީ ފުވައްމުލަކުގައި މިއީ މިފަދަ ފޯރަމެއް ބޭއްވޭ ފުރަތަމަ ފަހަރު ކަމަށެވެ. އޭނާ ވިދާޅުވި ގޮތުގައި މިފޯރަމް ބޮޑަށް އަމާޒު ކޮށްފައިވަނީ އަލަށް ވިޔަފާރީގެ ދައިރާއަށް ނިކުންނަ ފަރާތްތަކަށް ކަމަށާއި، ފޯރަމުގައި ގިނައިން ބައިވެރިވެފައި ވަނީވެސް ޒުވާނުން ކަމަށެވެ. ފޯރަމް ކުރިއަށްދާ ގޮތާއި ބެހޭ ގޮތުން ވާހަކަ ދައްކަވަމުން އިސްމާއިލް ވިދާޅުވީ، ފުރަތަމަ ދެދުވަހު ދާނީ ތަޖުރިބާ ޙިއްސާ ކުރުމުގެ ސެޝަންތަކެއް ކަމަށެވެ.

ފޯރަމުގެ ބާކީ ދުވަސްތަކުގައި ގުރޫޕުތަކަކަށް ބެހިގެން ޕްރޮޖެކްޓެއް ނެގި ބައިވެރިންނަށް ވިޔާފާރި ފަށާނެ ގޮތާއި، މާލީ އަދި ފަންނީ ދަތިތަށް ޙައްލު ކޮށް ވިޔާފާރި ކުރިއަރުވާނެ ގޮތް ކިޔާ ދެވޭނެއެވެ. އަދި އޭގެ ފަހުން ވިޔަފާރި ފަހު ދުވަހު ބައިވެރިންގެ ޕްރޮޖެކްޓުތަށް އިންވެސްޓަރުންނަށް ޕްރޮޕޯސަލް ހުށަހެޅުމުގެ ފުރުސަތު ލިބިގެންދާނެއެވެ. އިސްމާއިލް ރަފީގު ވިދާޅުވީ މިކަމާ ގުޅިގެން ރަނގަޅު ޚިޔާލެއް ހުށަހެޅިއްޖެނަމަ ޕްރޮޖެކްޓު ހިނގުމަށް ފަންޑު ލިބިގެން ދިއުމަކީ އެކަށީގެންވާ ކަމެއް ކަމަށެވެ.

މިއީ މިފަދަ ފޯރަމެއް ފުވައްމުލަކުގައި ބޭއްވި ފުރަތަމަ ފަހަރެވެ. މިފޯރަމް އިންތިޒާމު ކުރާ ފަރާތުން ބުނި ގޮތުގައި ފުވައްމުލަކުގައި މިފޯރަމް ބޭއްވުމަށް ނިންމީ، އިންތިޒާމު ކުރާ ފަރާތްތަކަކީ ފުވައްމުލަކަށް ނިސްބަތްވާ ބަޔަކަށް ވެފައި މިރަށުގެ ފަރާތްތަކަށް އަލަށް ވިޔަފާރި ފެށުމުގައި އެހީތެރިވެދިނުމުގެ ގޮތުން ކަމަށެވެ.