މިއަހަރުގެ ރަމަޟާންމަހަށް ޚާއްސަކޮށްގެން މުޅިން އަލަށް އަށް މިސްކިތެއް ހުޅުވުމަށް ހަމަޖެހިފައިވާކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
މިގޮތުން މާލޭގައި ތިން މިސްކިތެއް ހުޅުވުމަށް ވަނީ ހަމަޖެހިފައެވެ. މީގެ ތެރެއިން ވިލިމާލޭގައި ތަރައްޤީކުރި މަސްޖިދުއް ބިއްރި މިމަހުގެ 17ވަނަ ދުވަހު ރައީސް ވަނީ ހުޅުއްވައިދެއްވާފައެވެ.
މީގެ އިތުރުން މާލޭގައި ދެން ހުޅުވުމަށް ހަމަޖެހިފައިވަނީ އަލުން ޢިމާރާތްކޮށް ހުޅުވާ މުޙައްމަދު ޖަމީލް ދީދީ މިސްކިތް ނުވަތަ ފައިފުހޭ މިސްކިތެވެ. މި މިސްކިތުގައި އެއްފަހަރާ އެގާރަ ސަތޭކައަށްވުރެ ގިނަ މީހުންނަށް ނަމާދުކުރެވޭނެއެވެ.
މީގެ އިތުރުން އަންނަ ރަމަޟާންމަށް މާވެޔޮ މިސްކިތް ހުޅުވުމުގެ މަސައްކަތްވެސް ކުރަމުންދާކަމަށް އިސްލާމިކް މިނިސްޓްރީން ވިދާޅުވެއެވެ. މާވެޔޮ މިސްކިތަކީ އެއްފަހަރާ ގާތްގަނޑަކަށް އަށާރަ ސަތޭކައެއްހައި މީހުންނަށް ނަމާދުކުރެވޭ މިސްކިތެކެވެ. އަދި މިސްކިތުގައި އަންހެނުންނަށް ޚާއްސަ ބައެއް ހިމެނެއެވެ.
މީގެއިތުރުން ގއ.ދެއްވަދޫގައި ހަތް ސަތޭކަ މީހުންގެ ޖާގައިގެ މިސްކިތެއް މިމަހުގެ އަށާރަ ވަނަ ދުވަހުވަނީ ހުޅުވާފައެވެ. ރަމަޟާން މަހަށް ޚާއްސަކޮށްގެން ރާއްޖޭގައި އަލަށް ހުޅުވުމަށް ހަމަޖެހިފައިވާ އިތުރު މިސްކިތްތަކަށް ބަލާއިރު، ކ.ކާށިދޫ އާއި ދ.ކުޑަހުވަދޫއާއި ހދ.ކުޅުދުއްފުށީގައި އަލަށް ޢިމާރާތްކޮށްފައިވާ މިސްކިތްތައް ހިމެނެއެވެ.
މީގެ އިތުރުން ށ.ފޭދޫ މިސްކިތްވެސް ހުޅުވުމަށް މަސައްކަތް ކުރަމުންދާކަމަށް އިސްލާމިކް މިނިސްޓްރީން ވިދާޅުވެއެވެ. ފޭދޫގެ މިސްކިތަކީ ފަސް ސަތޭކަ ހަތަރު މީހުންގެ ޖާގައިގެ މިސްކިތެކެވެ. އިސްލާމިކް މިނިސްޓްރީން ވިދާޅުވީ އަލަށް ހުޅުވުމަށް ހަމަޖެހިފައިވާ މިސްކިތްތަކުގައި މިހާރު ކުރިއަށް ދަނީ ހުޅުވުމުގެކުރިން ކުރަންޖެހޭ ކުދިކުދި މަސައްކަތްތައްކަމަށެވެ.