ލިބޭ ޢާމްދަނީން ޚަރަދުތައް ހަމަޖައްސަން ދަސްނުވެއްޖެނަމަ ޤައުމު ބަނގުރޫޓުވެދާނެ ކަމަށް އެމް.އެމް.އޭގެ ގަވަރުނަރު އަހުމަދު ނަސީރު ވިދާޅުވެއްޖެއެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ 29.6 ބިލިއަން ރުފިޔާގެ ބަޖެޓަށް ލަފާއެރުވުމުގެ ގޮތުން މިއަދު އޮތް ބަޖެޓު ދިރާސާކުރާ ކޮމެޓީގައި ވާހަކަފުޅުދައްކަވަމުން ގަވަރުނަރ ވިދާޅުވީ ދަރަނި އަދާ ނުކުރެވި އިތުރަށް ދަރަނި ނަގަމުންދާނަމަ ޤައުމު ބަނގުރޫޓުވުމުގެ ބިރު އެބައޮތް ކަމަށެވެ. އެހެންކަމުން އެމަނިކުފާނު ވިދާޅުވީ ލިބޭ ޢާމްދަނީން ޚަރަދު ކުރަން ދަސްކުރަން ވެއްޖެ ކަމަށެވެ.
"އެންމެ ބޮޑު އެއް ކަމަކީ ލިބޭ ޢާމްދަނީން ޚަރަދުތައް ފުއްދުމުގެ މައްސަލަތައް. އެނގިވަޑައިގަންނަވާނެ ގެއެއްގެ ނިސްބަތުންވެސް ކޮންމެ މަހަކު ލިބޭ އެއްޗަކަށްވުރެ ޚަރަދު ބޮޑުވަންޏާ، ކޮންމެ ގޮތަކުން އެ ޚަރަދު ހަމަޖެއްސުމަށްޓަކައި މިޖެހެނީ ކޮންމެވެސް މީހެއްގެ އަތުން ލޯނެއް ނަގަން. މިހެން ކޮންމެ މަހަކު ނަގަމުން ނަގަމުން ގޮއްސާ ތިން ހަތަރު އަހަރުވެގެންދާއިރުގައި ދަރަނި ވަރަށް ބޮޑުތަން އިތުރުވެގެން ގޮސް އެ ދަރަނި އަދާކުރަން ޢާމްދަނީގެ ވަރަށް ބޮޑު އެއްޗެއް އެބަ ޚަރަދު ކުރެވިގެންދޭ،" ގަވަރުނަރ ވިދާޅުވިއެވެ.
ރާއްޖޭގެ މާލީ ޙާލަތު އޮތީ އަހަރުން އަހަރަށް ޑެފިސިޓް ވާ ގޮތަށް ކަމަށް ވިދާޅުވެ ގަވަރުނަރ ނަޞީރު ވިދާޅުވީ އެކަން ބަދަލު ކުރުމަށް މަސައްކަތްތަކެއް އެންމެން ގުޅިގެން ކުރަންޖެހޭ ކަމަށެވެ. އެމަނިކުފާނު ވިދާޅުވީ މީގެ 8 އަހަރުކުރިން ދަޢުލަތް ހިންގުމަށް ދެނީ 8 ބިލިއަން ރުފިޔާ ކަމަށާއި ނަމަވެސް އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި މުވައްޒަފުންގެ މުސާރައަށް އެކަނިވެސް މިހާރު އަށް ބިލިއަން ޚަރަދުވާކަމަށެވެ.
"މިހާރު އަޅުގަނޑުމެންނަށް ޢާމްދަނީގެ ގޮތުގައި ގާތްގަނޑަކަށް 20 ބިލިއަން ރުފިޔާ އެބަލިބޭ. އެހެންވީމަ ކީއްވެގެންތޯ އަޅުގަނޑުމެންނަށް މި 20 ބިލިއަން ރުފިޔާގެ ތެރެއިން އަޅުގަނޑުމެންނަށް ޚަރަދުތައް ހަމަ ނުޖެއްސެންވީ. އެހެންވީމަ ފިޒިކަލް ޕޮޒިޝަން އަޅުގަނޑުމެން އެންމެން ވެގެން އެބަޖެހޭ ލިބޭ ޢާމްދަނީ އިން ޚަރަދު ހަމަޖެއްސުމަށް ދަސްކުރަން. އެ ނޫން ގޮތެއް އަޅުގަނޑުމެންނަކަށް ނެތް،" ގަވަރުނަރ ވިދާޅުވިއެވެ.
އެމަނިކުފާނު ވިދާޅުވީ ދަރަނި އަދާނުކުރެވި ދަރަނި ނަގަމުންދާ ކަމަށްވާނަ "އާޚިރުގައި" ދުނިޔޭގެ އެހެން ޤައުމުތަކަށް ދިމާވެފައިވާ ގޮތްތައް ރާއްޖެއަށް ދިމާވެދާނެ ކަމަށެވެ. ނަޞީރު ވިދާޅުވީ ދަރަނި އަދާ ނުކުރެވިގެން ރާއްޖެ ބަނގުރޫޓުވެދާނެ ކަމަށެވެ.